الجزء 10
غزل وزينب ومريم رجعن من المدرسه سرمد حاطلهن خط خاص يجيبهن من مدارسهن دخلن للبيت
سلمن عالحجيه جانت تتغدى هي وقتيبه
زينب : هلاوو بيبي
قتيبه : هييي دينب وركض حضنها هي شالته وباسته
طلعت من جنطتها حبشكلات وانطته هو فرح متعود عليها كلما تجي من المدرسه تجيبله حلويات
هو اخذ العلاكه وركض
الحجيه : ولج بيبي ليش تنطيه حلويات خل يتغده هذني مايفيدن يلا بيبي فوتن بدلن ونزلن تغدن ماطول صابه الغده
البنات صعدن لغرفهن
غزل بدلت وسبحت ونزلت لكتهن نازلات قبلها
صبتلها غده وكعدت تاكل وتستمع لمريم شون تحجي لبيبيتها عن مدرستها وصديقاتها وهي متحمسه
كملت اكلها غسلت ماعين وصعدت
راحت لغرفه زينب
لكت زينب تلعب بفونها تمنت عدها فون بس تستحي تطلب منهم يشترولها وهي ماتحتاجه جانت قبل عدها موبايل بسيط تخابر بيه على ابوها أو ادزله رسائل ولسه محتفضه بيه
غزل : زينب راح تنامين لو تضلين كاعده
زينب : وهي عينها بالموبايل وتشوف فلم ماكملته من البارحه ..لا مانام اخلص هذا الفلم وابدي اقره ليش ؟
غزل : اي لعد فدوه اني حنام ساعتين وكعديني حتى اقره امتحان بس تعبانه ماكدر اقره هسه
زينب بعدم اهتمام : اي ان شاء الله
غزل : زينب مو تنسين حبابه
زينب : اي مو كتلج اي وهي منتبه عالفلم
غزل راحت لغرفتها ونامت وره فتره فزت على زينب تكعد بيها
زينب : ولج غزل كومي صار المغرب
غزل : امممم انتبهت الدنيا ضلمه كامت من فراشه
عززه هاي شنو
زينب : ولج كومي والله اسفه بس نسيت اكعدج راح عن بالي هسه نزلت ليجوه وبيبي ذكرتني
غزل : عززه بعيني ولج امتحان رياضيات واني شوني بيه عاد خررب بيومج ليش نسيتي مو وصيتج هنيالي اي والله
زينب : مدريني اني والله نسيت كومي بدل هذا الحجي وهي تجر بيها من الفراش
غزل : اي اي كايمه بعد شلحك صخام وجهي
زينب : عود اكول لبابا يدرسنه يله كومي
غزل : لا لا استحي ماريد خل يفهمج الماده وتعاي اشرحيلي
زينب : ولج غزيله اكعدي راحه غير صارلج أكثر من 4 اشهر يمنه ماتعودتي
غزل : شتعود يمعوده هو اني طبعي خجوله وخاصه من عموو سرمد استحي كلش ديله انتي روحي اني اصلي وابلش اقره لاتصيحيلي عالعشا
زينب : اي يله رايحه
غزل بساع صلت وحطت كتبها وبلشت تقره
.
.
.
.
.
.
اجه سرمد من الشغل فات من باب المطبخ لكاهم يتعشون سلم عليهم وصعد لغرفته سبح وبدل ونزل
