البارت 15
كعدت من النوم فتحت عيونها شويه ضلت تباوع بالفراغ وتحاول تصحصح جان تفز من الفراش باوعت منا ومنا لكت ماكو احد يمها وسرمد ماكو حطت ايدها على كلبها براحه (اووف طلع حلم بس شنو من حلم طاح حظج غزل )انتبهت على أيدها الحاطتها. على صدرها شافت الخاتم باوعتله بصدمه وكمزت من الفراش (عزززه هذا منين اجاني يعني مو حلم البارحه مو حلم وعم...عموو جان هنا شهكت ولطمت على خدها ياايمه خل اطم روحي احسن هاي شسويت اني. عبالي حلم طلع صدك)
بسرعه بدلت ملابسها ولكن شعرها ضلت تروح منا وتجي منا تفتح باب غرفتها وتسده متردده تنزل خايفه لاتشوفه وشون تباوع بوجهه بعد ( يله غزل شجاج انزلي اكيد هسه بالشغل انزلي والله كريم ) سمت باسم الله عدلت شالها على رأسها ونزلت الدرج على كيف وتباوع خاف موجود شهكت من شافت هناء حجت وياهه
هناء : والله هي حظوظ المسعده نايمه للضهاري والبارحه حفله وهدايا واني طايحه بيها ...
هيييي انتي !! تره انتي جنه بهالبيت مثلي ولازم تشتغلين ..عاد انتي شلون جنه الله اعلم منين جابج وحطج على كلبنه
اسمعي زين لج انوب تنزلين من وكت تشتغلين ويانه مو صايرين خدم عد جنابج والله يالله وهزت أيدها ومشت الغرفتها وهي ماعاجبها
غزل تعودت على كلامها الجارح وكالعاده ماجاوبت لان تحس نفسها ثقل عليهم وانو هم متفضلين عليها
ضاجت كلش توجهت للمطبخ
ماكو احد موجود غسلت وجهه حتى تخفي دموعها
صبتلها استكان جاي ولفت جبنه بالخبزه واكلته وهي العبره بداخلها
نزلت زينب الدرج وهي تركض
_ هلاوو غزل أخيرا كعدتي اليوم تأخرتي بالنوم واني مليت وحدي كاعده ..
غزل ماجاوبت هزت راسها تحاول تخفي العبره الي بداخلها
زينب باوعتلها بتساؤل غزوله شبيج حبي
غزل باوعت لزينب بعيون مدمعه وبعدين حضنتها وكامت تبجي
_ ياا غزوله حبيبتي شجاج منو وياج عمري ولج شبيج احجي وكافي بجي
_ غزل وهي تمسح بدموعها لا ماكو شي بس هيج ضايجه
_ زينب بحزن ميخالف حبيبتي بس متأكده ماكو شي ثاني
_ لا ماكو
_ زين يله كومي خل نصعد لغرفتي نشوف فلم اني وياج
كامت وياها وصعدن الدرج فاتن للغرفه شافن قتيبه ومريم مهوسين الغرفه ومشمرين الملابس بكل مكان ويكمزون عالجربايه بس شافوا زينب خافوا وكعدوا عالجربايه عاقلين
زينب : بفزع ولكممم هااي شنووو ادبسززيه نزلت خمس دقائق هيج مسوين بالغرفه من خربحظي شوو كدامي انزلوا واليصعد اكسر رجليه يللله
لزمت قتيبه من أيده تخاف عليه يوكع ابوها منبهها ماينزل وحده
نزلته الدرج وكالتلهم روحوا يم بيبي واليجي ياويله
همه ركضوا لغرفه بيبيتهم وهي صعدت تتحلطم فاتت الغرفه شافت غزل تعزل بالغرفه بهدوء
زينب : اووف منهم اعزل منا يوسخون منا والله الصوج مني مصعدتهم يمي
