عشيقة اربعيني (باللهجة الجزائرية)

الحلقة الاولى (by aridj)

   الذكريات ممكن تكون حلوة او مرة اما لحلوة ممكن ننساوها صعب باه نتفكروها سعات بصح المرة تبقى ديما في قلوبنا مهما صرا سيرتو اذا كانت من اقرب الناس لينا اليوم راح نحطو رحالنا مع قصة جديدة راح نبكيو معاها نضحكو راح تكون قصة من نوع جديد ...قصة عشيقة اربعيني
هابطة تكركر في فاليزتها في اكبر مطارات روسيا العملاء تاعها وراها لابسة كلش اسود حتى من شعرها لي يدي فيه الريح نحات لينتها نظرتها باردة ما توحي بشي خرجت البرا لقات الطاكسي لي طلبتها تسنى فيها ركبت ديمارات طايرا لدارها
في بلاصة خرا في نفس الدولة حاط رجل على رجل مقابلو كاسو المفضل تاع الشراب حاكم سكينة فيدو يلعب بيها مقابلو معلق من رجليه يتوجع ...ناظ هبط لمستواه و هز يدو نفظو بكف ..اركان:شكون بعثك؟ اخر سؤال... حط السكينة على خدو و يضغط عليها...الراجل:لوكان تقتلني مش راح نحكي ...عيط متوجع كي دخلت في السكينة ...اركان:وصل سلامي لسيدك كي يلحقك بعد ايام... فخطفو بضربة على رقبتو خلى دمو يسيل هز روحو جبد كتانة يمسح فسكينو و شور لواحد من رجالو وقف قدامو... حطو جثتو في تابوت و بعثوها لاهلو و عيطو لنبيل يلحقني لدار هز مفاتحو و خرج خلاهم ينظفو فالحالة لي خلاها ... هذا هو مصير اللي يخون داركن من اكبر المافيا الروسية طبيعتو فالعمل خلاتو يكون من انجح رجال الاعمال و المافيا ... نزل من طاكسي لقا عيلتو ملمومين على طابلة لعشا جا فايت عيطتلو جداتو ...كهينة:وليدي ارواح تتعشا ...اركان:معنديش نفس اميما كولو نتوما بصحتكم لاح كلامو و طلع لغرفتو حط البومو قدامو يتفرج في تصاورو معاها دمعة سخونة هبطت من عينو دمعة قهر و وجع ايه راجل مقهور على مرتو و وليدو لي قتلوهملو المافيا بصح مش عارف شكون هز يدو مسح الدمعة لي طاحت من عينو ...اركان: مهما صرا راح نردلك حقك الينا... مسح على صورتها غلق الالبوم رجعو لبلاصتو و تكا حاط يديه على عينيه ..وصل لدار صاحبو صونا يدعي في ربي متحلوش هيا الباب معمبالوش وش يصرالو منين يشوفها من صغرو يصرالو هكاك ...لكن لسوء حظو حلتلو هي ...اماني:اووو جود مرحبا نعلك لاركان؟... جود : لالا ..اه نقصد هيه هيه جاي عندو ... خزرت فيه اماني باستغراب هزت كتافها و طلعت تجري تعيط لاركان ...بقا يرد فنفس راح دخل قعد فصالو يسنا فيه ينزل و يخمم فيها و في عينيها لي كل ما يخزر فيهم قلبو يولي ينفض وحدو  قطع تخمامو اليد لي تحطت على كتفو هز راسو لقاه اركان.... اركان: و اخيرا شرفت لوكان زت طولت شوي... جود:هات وش عندك برك بركا تم**** تاعك علاه عيطتلي و مستعجل و منعرف واش؟...اركان:شوفلنا خبير فالهواتف و هكر يكون يعرف خدمتو عندنا خدمة كبيرة ليام هذو مذابيك تنظم ر* روحك لا ن** لازم نخرجو شكون بعث الراجل هذاك باه يقتل اماني هذيك نهار الشخص هذا راهو يحاول يصفلي عيلتي بالواحد لازم نعرفو شكون...