دارت الدنيا لتدق طبول قلبي

البارت السابع عشر

الماتحس يمه بدفو تاكل بصبعك من تضل بصوره واكف يمه

والرحمة من تشتم هوى مورحمة هاي التنحسب بالراس طلقة رحمة..

المهم موعيب النشد منا وجرحي اتعلم
وماثق وحلل كل وجه واخذ الزين عله الدم
واحد لواحد مايحن كاولي وجاره معمم

ومبريه ذمة كل شخص بايكني... سرحته الحرس ...لايجي انوب ملثم

الحارس اليحجيلك حلم لوحارسك مايحلم..
غير انه بيتي عله النهر ليش بترابه اتيمم
ماراهمين نضل سوه مانرهم ولاترهم..

________________________

البصرة..

هجان
بلشت اميل الها بيوم السابع مال علي ابن فهد جانوا مسويلة حفلة ضخمة بيت جدي..

جنت كاعد بالاستقبال ويه الرياجيل و الفاصل بين الغرفة الكاعد بيها والغرفة الكاعدة بيها ستائر ، جانت وحده منهن  مرفوعة بشكل نصفي والغرفة جانت ظلمة بس ضوى خافت برز وحدة من البنات شعرها طويل واسود يشبه الليل جذبني شعرها ..

استغربت هاي منو بيهن هيج شعرها طويل وحلو معقولة وحدة من المعازيم ،

ظليت اراقبها وهي على وضعيتها مدنكة راسها ، ياهو اليحجي ويايه اجاوب ب اي او لا ومركز وياها كامت وكفت وتتنقل بالغرفة طبت بنص الظلمة كمت ما اشوفها ،

بس حفظت لون ملابسها ، انتظرت ترجع لنفس المكان الجنت اشوفها بيه ما رجعت سبيتها بكلبي ،

فكرت ليش من دون الناس معزولة ذني بناتنا دك وركص هي ليش منزوية تملكني الفضول واخذتني رجلي للغرفة الكاعدة بيها ..

قبل لا ادخل بلحظات فكرت اكو شي بهاي الغرفة يخصني ، حسيت نصفي الثاني هنا ، بين المراقبة والانتظار والقلق خاف لا احرج البنية قررت افتح الضوه ، هي خلت ايديها على عيونها ك ردة فعل لان ظلمة وفجأة اشتغل تأذت ، وخرت ايديها شافتني تبسمرت بمكانها ، كامت تمتمت ،.

ملاك : هجان ؟شلونك.

هجان : هاي انتِ هنا وانه عبالي وحدة غريبة شعندج كاعدة وحدج بالظلمة..

جرت نفس وكالت..

ملاك : ما احب هاي الاجواء .

هجان : ليش ؟

ملاك : ماعرف راسي يوجعني واختنك..

ضحكت بوكتها وسديت الباب من يومها يانغم طبت ملاك بكلبي عبالك انزرعت وانطم عليها التراب تجذرت مثل النبته ،

كمت بكل مناسبة ننجمع بيها اراقبها وصرت اتحجج واجي لبيت جدي علمودها  عيوني وراها صعدت نزلت راحت لغرفتها ،،

مرات تختفي ساعتين اكثر من تنزل اعصب عليها ما احس الأ واني مرزلها جانت تنزل دموعها تنقهر مني عبالها اضوج منها بس انه جنت اريد اشوفها كبالي بدون لا المسها ولا اسولف وياها بس اتأملها رغم جانت صغيره وانه جنت شاب يعني على وجه زواج بس كلت لو ملاك لو ماتنام مرة بحضنك غيرها..