ချင်းတွင်းသက်သေ(ခ်င္းတြင္းသက္ေသ) COMPLETED

22 (U)

🎶လွမ်း…
ရင်ထဲလှိုက်လို့ သိပ်ကိုလွမ်း🎶

ဒီအတောအတွင်း ကျွန်တော့်နှုတ်ဖျားက အမြဲရေရွတ်နေမိခဲ့တဲ့ သီချင်းစာသားလေး။ဦးခင်မောင်တိုးရဲ့ လွမ်းဆိုတဲ့ ဒီသီချင်းလေးကိုကြားမိတိုင်း မျက်ရည်ကြည်တို့က ရစ်သိုင်း၍လာရသည်။လူက မန္တလေးကိုရောက်နေရပေမယ့် ကျွန်တော့်ရဲ့နှလုံးသားတစ်ခုလုံးက မုံရွာမှာကျန်ရစ်ခဲ့ရတာလေ။ဒီအချိန်ဆို လရောင်လေးဘာများလုပ်နေမလဲ၊နေမှကောင်းရဲ့လား၊ဒီကလေးလေးကစိတ်ခံစားလွယ်၊ထိရှလွယ်လေးမို့ တစ်နေ့တစ်ရက်မှစိတ်ဖြောင့်ဖြောင့်နဲ့မေ့ထားလို့မရနိုင်ခဲ့ပါဘူး။
ပထမဦးဆုံးတွေ့ဆုံခဲ့ရတဲ့ နွေရာသီက လှပခဲ့သလောက် ခွဲခွာရတဲ့ နွေရာသီအချိန်ကတော့ သိပ်ကိုအထီးကျန်ဆန်ခြောက်သွေ့လွန်းနေသည်။

မန္တလေးရဲ့နွေရာသီ…
အရိုးပြိုင်းပြိုင်းပင်အိုကြီးတွေက အလွမ်းဓာတ်ခံရှိသူကျွန်တော့်အား လွမ်းအားတွေတိုးစေခဲ့သည်။ရွက်ဝါဟောင်းလေးတွေများကြွေ၍ လေပေါ်ပြေးလွှားလွင့်စင်နေခိုက် နွေရာသီကျောင်းပိတ်ရက်တွေမှာ လရောင်လေးနဲ့အတူ ဆော့ကစားခဲ့တဲ့ ပုံရိပ်လေးတွေကို သတိရလွမ်းဆွတ်လိုက်ရတာ။နွေဦးမှာပွင့်ဖူးတတ်တဲ့ ကံ့ကော်ပန်းလေးတွေကိုမြင်ရင် ကံ့ကော်ပန်းကိုချစ်ပေမယ့် ကံ့ကော်ပန်းအနားမှာရသ်ဝဲနေတတ်တဲ့ပျားကောင်းကြီးတွေကိုကြောက်တယ်ဆိုတဲ့ လရောင်လေးကိုပြေးမြင်မိရပြန်ပါတယ်။ရေခဲမုန့်ကြိုက်တတ်တဲ့ လရောင်လေးက အခုလို ပူပြင်းလှတဲ့နွေရာသီမှာ ရေခဲမုန့်တွေဘယ်လောက်စားနေလိမ့်မလဲ။ရေခဲမုန့်တွေအလွန်အကျွံစားပြီး ချောင်းတွေများဆိုးနေလေမလား၊ထိရှလွယ်သူလေးမို့ အပူမိပြီး နေမကောင်းများဖြစ်နေလေမလား အမျိုးမျိုးစိုးရိမ်ပူပန်ခဲ့ရပါသေးတယ်။

မိုးရာသီ ဝသန်ဓာတ်…
ရှစ်ခွင်တိုက်နယ်မှာ မိုးတိမ်တိုက်များ အုံ့ဆိုင်း၍နေချိန် အနယ်မထိုင်သေးတဲ့ အလွမ်းအဆွေးတွေက ဝရုံးသုံးကားထကြွလာရပြန်သည်။
အိပ်ခန်းရဲ့ ပြတင်းပေါက်လေးမှသည် မိုးစက်၊မိုးပေါက်ကလေးတွေကို ငေးကြည့်ရသည့်အဖြစ်က ယောက်ျားရင့်မာကြီးတစ်ယောက်ပင်လျှင် မျက်ရည်ကျလုမတက်အလွမ်းပိုစေပါတယ်။လျှပ်စီးလတ်လို့ မိုးခြိမ်းသံကျယ်ကျယ်ကြားလိုက်ရလျှင်ဖြင့် အသည်းနုသူလရောင်လေးတစ်ယောက် ဘယ်လောပ်များကြောက်လန့်နေလိမ့်မလဲဆိုပြီး သောကဝေရပြန်ပါသေးတယ်။ငယ်စဉ်က မိုးရွာထဲ ဓမ္မာရုံတဆက်မြိတ်အောက်မှာ မိုးအတူခိုခဲ့ဖူးတဲ့ အတိတ်ရဲ့အရိပ်တွေက ရင်ကိုတဆစ်ဆစ်နာကျင်ရစေပြန်ပါတယ်။