قلب مستعمل

الــجزء الـرابـع

دوزو وقت قصير مع هارون كايرحبو بيه و ناضو يتغداو مجموعين بعدما وجد الغدا و تحط كولشي فوق الطبلة .. بداو كياكلو بشوووية حتى علات هند عينيها فسمية من اللي سمعات صوتها كاتقول

سمية هازة الفرشيطة عند فم هارون مبتاسمالو:حل أحبيبي، آاااا

هارون شاف فمو معلي حواجبو باستغراب و هي جايبالو اللقمة لفمو فحال شي وليد صغير، مابغاش يحشمها مع ابتسامتها ليه و الكل شاف فيهم .. حل فمو بشوية مستقبل لقمتها و بدا يمضغها بدون أي ملامح باينين فوجهو .. تصرفهم خلا هند تعوج فمها كاتميق فيهم .. بانتلها سمية فحالا باغا تقليلها السم و هي من داك النوع ديال العگوزات المغيارات على ولادهم

مزادتش طولات الشوفة فيهم .. كملات الغدا بكل هدوء و بطئ كاتلذذ بماااكلتها حتى سالاو و ناضو .. هارون طلع لبيتو خلاهم عاودو تجمعو فالصالون .. هند بغات تجلس معاهم متهربة من انفرادها بيه حتى سمعات أحلام قالتلها عند وذنيها

-طلعي عند هارون راه سبقك للبيت بلعاني

هند بهدوء:غايكون باغي يرتاح دابا بلا مانصدعو

سلمى قربات حتى هي :لا بالعكس .. هارون كايعجبو اللي يتهلا فيه و يرد بالو عليه من جميع النواحي (غمزاتها بمشاكسة)

شافتهم كايشجعوها بعويناتهم تطلع، مابغاتش تزيد ترفض باش مايشكوش فطبيعة علاقتهم .. تحنحنات و ناضت وقفات كاتقاد شعرها و هوما كايتغامزو عليها و يتمتمولها بصوت خافت

سلمى:الحلوة تنادي

احلام:ناري سيمانة دالبعاد ماتخرجو من البيت حتى لغدا هههه

قهقهو بصوت عالي كايتناغزو عليها و هي تزنگااات من كلامهم كاتصرط فريقها .. طلعات لفوق بشوية عليها كاتمختر فالمشية .. وصلات للبيت مع حلات الباب مع تصمرات مكانها كاتصنط ليه كايدوي بصوت عالي من الدريسينغ ديالو و كايجاوبو صوت أنثوي من التليفون اللي محطوط قبالتها فوق الكوافوز مع داير اوت باغلوغ .. سمعات گاع الحوار اللي دار بيناتهم

هارون:هممم السيمانة دازت مزيانة

الصوت:اه و بزاف گاع خاص نعاودوها عن قريب

هارون:تتعاود عن قريب ماتخافيش

الصوت:راني كانتسنا هههه ماسخيتش گااااع

هارون خارج من الدريسينغ بعدما بدل حوايجو، غي خرج بانتلو على وقفتها معلية حواجبها بعدم رضى لهاد الحوار هذا .. ماطولش فيها الشوفة نخلها فحالا مكايناش فحال عادتو الدائمة و هز تليفونو حيدلو السبيكر و بدا كايدوي و يضحك قدامها