مشاعر

الحلقة الرابعة والعشرون

#مشاعر
ﺍﻟﺠﺰﺀ ﺍﻟﺮﺍﺑﻊ ﻭﺍﻟﻌﺸﺮﻳﻦ 💖
للكاتبة GomanFared
ﻃﻠﻌﺖ ﻣﻦ ﺍﻟﺪﻭﺵ ﻭﻻﻓﻪ ﻉ ﺭﺍﺳﻬﺎ ﻓﻮﻃﻪ ﻭﻻﺑﺴﻪ ﺗﻮﺗﻪ ﺷﺘﻮﻳﻪ ..
ﺷﺒﺤﺖ ﺍﻣﻬﺎ ﻓﻲ ﺍﻟﺪﺍﺭ ﻣﻘﻌﻤﺰﺓ ﺗﺸﺒﺤﻠﻬﺎ ﻓﺸﺒﺤﻪ ﻭﺣﺪﻩ ﺗﺒﻲ ﺗﻔﺴﻴﺮ ..
ﺳﻼﻑ : ﻳﻤﻲ ﺑﺎﻟﻠﻪ ﻋﻠﻴﻚ ... ﻳﻤﻲ ... ﺗﻨﻬﺪﺕ ... ﺍﻧﺘﻲ ﻣﺶ ﻭﺍﺛﻘﻪ ﻓﻴﺎ ..
ﺳﺎﻟﻤﻴﻦ : ﻣﻦ ﺍﻟﻠﻲ ﻭﺻﻠﻚ ﻫﻨﺎ .. ﻭﻋﻨﺪ ﻣﻦ ﻛﻨﺘﻲ ﺍﻣﺲ ...
ﺳﻼﻑ ﺷﺒﺤﺘﻠﻬﺎ ﺑﻴﺄﺱ ... ﺯﻓﺮﺕ ... ﻭﻧﺰﻟﺖ ﺭﺍﺳﻬﺎ ﻟﻮﻃﺎ ﻭﺣﻮﻟﺖ ﺍﻟﻤﻨﺸﻒ ... ﻭﻗﻌﺪﺕ ﺗﻨﺸﻒ ﻓﺸﻌﺮﻫﺎ ..
ﺳﺎﻟﻤﻴﻦ : ﺗﻤﺎﻡ .. ﻣﻌﻨﺎﻫﺎ ﻟﻤﻲ ﺩﺑﺸﻚ ﻭﺑﻄﺮﻳﻘﻨﺎ ﻟﺪﺭﻧﻪ ﻗﻌﺪﻩ ﻫﻨﺎ ﺍﻛﺜﺮ ﻣﻦ ﻫﻚ ﺑﺮﻭﺣﻚ ﻻ ..
ﺳﻼﻑ ﺍﻟﺘﻔﺘﺖ ﻭﻣﺸﺘﻠﻬﺎ : ﻣﺎﺍﺍﻣﺎ ..
ﺳﺎﻟﻤﻴﻦ : ﻣﺎﻣﺎ؟ ! ﻭﻣﻦ ﺍﻣﺘﻰ ﺗﺠﻌﻮﻳﻦ ﻫﻀﺎ؟ !!
ﺳﻼﻑ ﺷﺒﺤﺘﻠﻬﺎ ﺑﻀﻴﻖ ﻭﻗﻌﺪﺕ ﺳﺎﻛﺘﻪ ..
ﺳﺎﻟﻤﻴﻦ : ﺍﻧﺎ ﻭﺍﻧﺘﻲ ﺩﻳﻤﺎ ﺻﺤﺎﺏ ﻭﻋﻤﺮﻙ ﻣﺎﺩﺭﻗﺘﻲ ﻋﻠﻴﺎ ﺣﺎﺟﻪ ﻟﻬﺎﻟﺴﺒﺐ ﺛﻘﺘﻲ ﻓﻴﻚ ﺛﺎﺑﺘﻪ .. ﺑﺲ ﻣﺎﺩﺍﻣﻚ ﺑﺪﻳﺘﻲ ﺍﺩﺭﻗﻲ .. ﻣﻌﻨﺎﻩ ...
ﻗﺎﻃﻌﺘﻬﺎ ﺳﻼﻑ : ﺧﻼﺹ ﺣﻨﺤﻜﻴﻠﻚ ﺑﺲ ﺗﻮﻋﺪﻳﻨﻲ ﺍﻧﻚ ﺗﺘﻔﻬﻤﻴﻨﻲ ﺍﺭﺟﻮﻙ ..
ﺳﺎﻟﻤﻴﻦ ﺷﺒﺤﺘﻠﻬﺎ ﻫﻠﺒﻪ ﺑﻌﺪﻳﻦ ﻗﺎﻟﺖ : ﻧﻮﻋﺪﻙ ...
ﺧﺪﺗﻬﺎ ﺳﻼﻑ ﻭﻗﻌﻤﺰﺗﻬﺎ ﻭﺑﺪﺕ ﺗﺤﻜﻴﻠﻬﺎ ..
***
ﻣﻜﺴﺪﻩ ﻣﺎﻋﻨﺪﻫﺎ ﺷﻲ ... ﻣﻘﻌﻤﺰﺓ ﺗﺸﻮﻑ ﻓﻲ ﻛﺘﺎﻟﻮﺟﺎﺕ ﻟﻸﺯﻳﺎﺀ ﻭﺗﻔﻜﺮ ﻓﻲ ﻛﻼﻡ ﻛﻤﺎﻝ ﻉ ﺍﻧﻬﺎ ﻻﺯﻡ ﺍﺩﻳﺮ ﻋﺮﺽ ﻟﺘﺼﺎﻣﻴﻤﻬﺎ ...
ﺣﻄﺖ ﺍﻟﻜﺘﺎﻟﻮﺝ .. ﻭﺑﻌﺪﻳﻦ ﺧﺪﺕ ﺍﻵﻳﺒﺎﺩ ﻭﺧﺸﺖ ﻉ ﺍﻟﻘﺮﻭﺑﺎﺕ ﺍﻟﺨﺎﺻﻪ ﺑﺘﺼﻤﻴﻢ ﺍﻻﺯﻳﺎﺀ ... ﺟﺖ ﻗﺪﺍﻣﻬﺎ ﺗﺼﺎﻣﻴﻢ ﺑﺪﺍﻟﻲ ﺭﺟﺎﻟﻴﻪ ... ﺷﺒﺤﺖ ﺍﻟﻤﻮﺩﻝ ﻛﻴﻒ ﻻﺑﺴﻴﻨﻬﻢ .. ﻭﻋﺠﺒﻮﻫﺎ ... ﻭﻓﻠﺤﻈﻪ ﺟﻲ ﺑﻴﻦ ﻋﻴﻮﻧﻬﺎ ﻫﻮ 💖
ﺳﺮﺣﺖ ﺑﺘﻔﻜﻴﺮﻫﺎ ﻓﻴﻪ ﺗﺘﺨﺎﻳﻞ ﻓﻴﻪ ﻟﻤﺎ ﻳﻠﺒﺲ ﺑﺪﻟﻪ ﻛﻴﻒ ﺣﻴﻄﻠﻊ ﻓﻴﻬﺎ ... ﻓﻜﺮﻫﺎ ﺷﻄﺢ ﺷﻄﺤﻪ ﺑﻌﻴﻴﻴﺪﻩ .. ﻭﺗﺨﺎﻳﻠﺖ .. ﺻﺎﻟﻪ ﺍﻓﺮﺍﺡ ...
ﻣﻌﺎﺯﻳﻢ ... ﺍﻏﺎﻧﻲ .. ﻭﺍﻟﻤﻨﺸﻄﻪ ﺗﻘﻮﻝ ..
" ﺍﻟﻤﺘﺤﺠﺒﻪ ﺗﻠﺒﺲ ﺍﻟﻌﺮﻳﺲ ﺑﻴﺨﺶ .."
ﻭﺷﻮﻳﻪ ﻭﻫﻮ ﺧﺶ ... ﻛﺎﻥ ﻏﺎﻳﻪ ﻓﻲ ﺍﻟﺠﻤﺎﻝ ﻭﺍﻟﺠﺎﺫﺑﻴﻪ ... ﻭﻳﺸﻮﻓﻠﻬﺎ ... ﺑﺲ ﻟﻤﺎ ﺟﺖ ﺗﺘﺨﺎﻳﻞ ﺭﻭﺣﻬﺎ ﺍﻟﻌﺮﻭﺳﻪ ...
ﻫﺰﺕ ﺭﺍﺳﻬﺎ ﺑﺎﻟﻨﻔﻲ ﺑﺴﺮﻋﻪ ﻭﻫﻲ ﻣﻐﻤﻀﻪ ﻋﻴﻮﻧﻬﺎ ... ﺑﻌﺪﻳﻦ ﻓﺘﺤﺖ ﻋﻴﻮﻧﻬﺎ ﺍﻟﻠﻲ ﺗﻌﺒﻮﺍ ﺑﺎﻟﺪﻣﻮﻉ ﺍﻟﻠﻲ ﺷﻮﻳﻪ ﻭﻧﺰﻟﻮﺍ .. ﻗﻌﺪﺕ ﺗﺴﻤﺢ ﻓﻴﻬﻢ .. ﺑﻌﺪﻳﻦ ﻧﺎﺿﺖ ... ﻗﻌﻤﺰﺕ ﻭﺭﺍ ﻃﺎﻭﻟﺘﻬﺎ .. ﻭﺧﺪﺕ ﻛﺮﺍﺳﻪ ﺭﺳﻢ ﺍﻟﺘﺼﻤﺎﻣﻴﻢ ... ﻗﻌﺪﺕ ﺗﺸﺒﺢ ﻟﻠﻮﺭﻗﻪ ﺍﻟﻠﻲ ﻗﺪﺍﻣﻬﺎ ... ﻭﺷﻮﻳﻪ ﻟﻘﺖ ﺭﻭﺣﻬﺎ ﺗﻠﻘﺎﺋﻴﺎ ﻭﺍﺧﺪﻩ ﻗﻠﻢ ﺍﻟﺮﺳﻢ ﻭﺗﺮﺳﻢ ﻉ ﺍﻟﻮﺭﻗﻪ .. ﻭﺑﺪﺕ ﺗﺮﺗﺴﻢ ﻉ ﻭﺟﻬﻬﺎ ﺍﺑﺘﺴﺎﻣﻪ ﻭﻋﻴﻮﻧﻬﺎ ﺗﻠﻤﻊ 💖...
🌺🌺🌺
ﺣﻴﻪ ﻋﻠﻴﻚ ﻭﺣﻴﻪ ..
ﺳﻼﻑ ﺑﺘﺬﻣﺮ : ﻳﻤﻲ ...
ﺳﺎﻟﻤﻴﻦ : ﻳﺎﺑﻨﺖ ﺍﻧﺘﻲ ﻛﻨﻚ ﻫﺎﻩ ... ﺗﺒﻲ ﺗﻘﺘﻴﻠﻨﻲ ﻧﺎﻗﺼﺔ ﻋﻤﺮ .. ﺣﺮﺍﻡ ﻋﻠﻴﻚ ﻭﺍﻟﻠﻪ ﺣﺮﺍﻡ
ﺳﻼﻑ ﻧﺎﺿﺖ : ﺍﻧﺘﻢ ﺍﻟﻠﻲ ﺣﺮﺍﻡ ﻋﻠﻴﻜﻢ ﺍﻧﺘﻢ .. ﺗﺒﻮﻧﻲ ﻧﺠﻮﺯ ﺑﺲ ﺗﺨﻠﺼﻮﺍ ﻣﻦ ﻫﻤﻲ ﺗﺒﻮﻧﻲ ﻧﻘﻌﺪ ﻋﻤﺮﻱ ﻧﺨﺪﻡ ﺟﺎﺭﻳﻪ ﻟﻌﻴﻞ ﺗﺎﻓﻪ ﻛﻴﻒ ﻋﺒﺪﺍﻟﻤﻠﻮﻧﺪﻓﻦ ﻋﻤﺮﻱ ﻭﺣﻠﻤﻲ ﻭﻃﻤﻮﺣﻲ ﺗﺤﺖ ﺯﻟﻴﺰ ﺍﻟﻤﻄﺒﺦ .. ﻻﻻ ﻻ ... ﺑﻌﺪﺕ ﺷﻮﻳﻪ .. ﺑﻌﺪﻳﻦ ﻭﻟﺖ ﻷﻣﻬﺎ ﻭﻗﺎﻟﺖ .. ﺑﺎﺗﻲ ﺑﺎﺗﻲ ... ﻫﻮ ﺍﻛﺜﺮ ﻭﺍﺣﺪ ﺷﺠﻌﻨﻲ ﻛﺎﻥ ﻳﺤﻘﻨﻲ ﺑﻨﻈﺮﺓ ﻏﻴﺮ ﻧﻈﺮﺗﻜﻢ ﻫﺬﻱ .. ﺍﻟﻠﻪ ﻳﺮﺣﻤﻪ ﻋﺪﺍ ﻭﺧﻼﻧﻲ ﺍﻧﻜﺴﺮ ﻇﻬﺮﻱ ﻣﻦ ﺑﻌﺪﻩ .. ﻭﺑﺪﺕ ﺗﺒﻜﻲ
ﺳﺎﻟﻤﻴﻦ ﻧﺎﺿﺖ ﻭﻣﺸﺘﻠﻬﺎ : ﻳﺎﺃﻣﻲ ﻧﺤﻨﺎ ﺧﺎﻳﻔﻴﻦ ﻋﻠﻴﻚ .. ﺍﻧﺘﻲ ﺟﺮﻳﺌﻪ ﻭﻣﺎﺗﺨﺎﻓﻴﺶ ﻭﺍﻟﻠﻲ ﻛﻴﻔﻚ ﻫﻤﺎ ﺍﻟﻠﻲ ﻳﻨﺨﺎﻑ ﻋﻠﻴﻬﻢ ﻳﺎﺍﻣﻲ ﻷﻧﻬﻢ ﻣﺶ ﻣﺪﺭﻛﻴﻦ ﻟﻌﻮﺍﻗﺐ ﺍﻟﻠﻲ ﻳﺪﻳﺮﻭﺍ ﻓﻴﻪ .. ﺍﻧﺘﻲ ﺑﻨﺘﻲ ﺍﻟﻮﺣﻴﺪﻩ ﻣﺎﻧﺒﻴﺶ ﻧﺨﺴﺮﻙ ﻻﻗﺪﺭ ﺍﻟﻠﻪ ..
ﺗﻠﻔﺖ ﺳﻼﻑ ﻷﻣﻬﺎ ﻭﺣﻀﻨﺘﻬﺎ : ﺍﻫﺎ ﺍﻧﺎ ﻛﻴﻒ ﻣﺎﻗﻠﺘﻲ ﻣﺎﻧﺨﺎﻓﺶ ﺑﺲ ﺣﺬﺭﻩ ﻳﺎﺍﻣﻲ ﻭﻋﻨﺪﻱ ﻋﻘﻞ ﻳﺤﺴﺒﻬﺎ ﺻﺢ .. ﺑﻌﺪﺗﻬﺎ ﻭﺷﺪﺕ ﻭﺟﻬﻬﺎ .. ﻳﺎﻋﻤﺮﻱ ﺍﻧﺎ ﻓﻲ ﻣﻦ ﻳﺤﻤﻲ ﻓﻴﺎ ﻏﺎﺩﻱ ﺻﺪﻗﻴﻨﻲ ..
ﺳﺎﻟﻤﻴﻦ : ﺍﻟﺸﺎﺏ ﺍﻟﻠﻲ ﺟﺎﺑﻚ ﺍﻟﺼﺒﺢ ..
ﺳﻼﻑ ﺧﺪﻭﺩﻫﺎ ﺍﺣﻤﺮﻭﺍ : ﺍﻫﺎ ..
ﺳﺎﻟﻤﻴﻦ ﺿﺤﻜﺖ ﻣﻦ ﺑﻴﻦ ﺩﻣﻮﻋﻬﺎ : ﺣﻴﻴﻲ ﺍﻧﺘﻲ ﻳﺎﺫﻳﺒﻪ ... ﺍﻋﺘﺮﻓﻲ ﺷﻦ ﺍﻟﺤﻜﺎﻳﻪ ..
ﺳﻼﻑ ﺗﻠﺨﺒﻄﺖ : ﻻﺣﻜﺎﻳﻪ ﻻﺭﻭﺍﻳﻪ ...
ﺳﺎﻟﻤﻴﻦ : ﺳﻼﺍﺍﺍﻑ ..
ﺳﻼﻑ : ﻭﺍﻟﻠﻪ ﻳﻤﻲ ﻣﺎﻓﻲ ﺣﺎﺟﻪ .. ﻫﻮ ﺣﺎﺏ ﻳﺴﺎﻋﺪﻧﻲ ﺑﺲ ﻭﻫﻮ ﺭﺍﺟﻞ ﻛﻮﻳﺲ ﻭﻣﺤﺘﺮﻡ ﻳﻤﻲ ..
ﺳﺎﻟﻤﻴﻦ : ﺍﻫﺎ .. ﻗﻠﺘﻲ ﻓﻴﻪ ﺻﻔﺎﺕ ﺳﻤﺤﻪ ﻭﺍﻧﺘﻲ ﻋﻤﺮﻙ ﻣﺎﺷﻜﺮﺗﻲ ﻓﺮﺍﺟﻞ ﻏﻴﺮ ﺑﺎﺗﻚ ﺍﻟﻠﻪ ﻳﺮﺣﻤﻪ .. ﻣﻌﻨﺎﻫﺎ .. ﻋﺎﺟﺒﻚ ..
ﺳﻼﻑ : ﻳﻤﻤﻤﻤﻲ 😳
ﺳﺎﻟﻤﻴﻦ ﺑﻀﺤﻜﻪ : ﻳﺎﻭﺩﻱ ﻫﺎﻩ ﺳﻜﺘﻨﺎ ... ﺑﺲ ﺣﺘﻰ ﺍﻧﺘﻲ ﻧﺒﻴﻚ ﺗﻌﻄﻴﻨﻲ ﻭﻋﺪ ﻧﻬﺎﺭ ﻳﺼﻴﺮ ﺷﻲ ﺗﺤﻜﻴﻠﻲ .. ﻭﺗﺤﺎﻓﻈﻲ ﻉ ﻧﻔﺴﻚ ﻳﻤﻲ ﻭﻣﺎﺗﻔﺠﻌﻨﻴﺶ ﻓﻴﻚ ...
ﺳﻼﻑ ﺣﻀﻨﺘﻬﺎ : ﺍﻧﺘﻲ ﺍﺩﻋﻴﻠﻲ ﻳﺎﺳﻠﻮﻣﻪ ﺑﺲ ..
ﺳﺎﻟﻤﻴﻦ ﺑﻀﺤﻜﻪ : ﺍﺳﺘﻮﺩﻋﺘﻚ ﺭﺑﻲ ﻳﺎﺑﻨﺘﻲ ❤..
***
ﺍﻟﻌﺸﻴﻪ ...
ﻫﻲ ﻫﻚ ﻗﺎﻟﺖ ..
ﺷﻬﺎﺏ : ﺗﻤﺎﻡ ... ﻧﺎﺽ ... ﻭﻣﺸﻲ ﺭﻛﺐ ﻟﺪﺍﺭﻩ ..
ﻧﻮﺭﺍﻥ ﺗﻨﻬﺪﺕ .. ﺷﻮﻳﻪ ﻭﺧﺸﻮﺍ ﺭﺿﻮﺍﻥ ﻭﺭﻳﻬﺎﻡ ..
ﻧﻮﺭﺍﻥ ﻧﺎﺿﺖ : ﻳﺎﻫﻼ ﺑﺎﻟﻜﻨﺎﺭﻱ ...
ﺭﺿﻮﺍﻥ ﺿﺤﻚ ... ﺳﻠﻤﺖ ﻋﻠﻴﻪ .. ﻭﺑﻌﺪﻳﻦ ﺳﻠﻤﺖ ﻉ ﺭﻳﻬﺎﻡ ..
ﺭﻳﻬﺎﻡ ﺑﺈﺑﺘﺴﺎﻣﻪ : ﺗﻮﺣﺸﺘﻚ ...
ﻧﻮﺭﺍﻥ : ﺣﺘﻰ ﺍﻧﺎ ﻭﺍﺟﺪ .. ﺫﻛﺮﻯ ﺯﻭﺍﺝ ﺳﻌﻴﺪﻩ .. ﻭﺇﻥ ﺷﺎﺀ ﺍﻟﻠﻪ ﺩﻭﻡ ﻣﻊ ﺑﻌﻀﻜﻢ ..
ﺭﺿﻮﺍﻥ ﻭﺭﻳﻬﺎﻡ : ﺁﺍﺍﻣﻴﻦ ..
ﺭﺿﻮﺍﻥ ﻗﺮﺻﻬﺎ ﻣﻦ ﺧﺪﻫﺎ : ﻫﻲ ﻋﻦ ﺍﺫﻧﻚ ﻳﺎﺳﻤﺤﻪ ﺑﻨﻌﺪﻭﺍ ﻧﺮﺗﺎﺣﻮﺍ ..
ﻧﻮﺭﺍﻥ : ﻋﻤﻲ ﺍﻧﺖ ﻛﻮﻳﺲ؟
ﺭﺿﻮﺍﻥ ﻫﺰ ﺭﺍﺳﻪ ﺑﺈﻳﺠﺎﺏ ﻣﻊ ﺍﺑﺘﺴﺎﻣﻪ ﺧﻔﻴﻔﻪ ..
ﻧﻮﺭﺍﻥ : ﺍﻟﺤﻤﺪ ﻟﻠﻪ ...
ﺭﻛﺐ ﺭﺿﻮﺍﻥ ﺑﺮﻳﻬﺎﻡ ..
ﻭﻧﻮﺭﺍﻥ ﺗﻨﻬﺪﺕ : ﺗﺲ ﺍﻟﺤﻮﺵ ﻣﻦ ﻏﻴﺮ ﺳﺎﺭﻩ ﺧﻴﻲ ﺑﻜﻞ ..
ﻃﻠﻌﺖ ﺑﺮﺍ ... ﻣﺎﻟﻘﺖ ﺣﺪ ﻏﻴﺮ ﺍﻟﺤﺮﺍﺳﻪ ﺍﻟﻤﺘﻮﺯﻋﻴﻦ ﻉ ﺣﺪﻳﻘﺔ ﺍﻟﻔﻴﻼ ... ﻟﻔﺖ ﻭﺧﺸﺖ ﻭﻣﺸﺖ ﺭﻛﺒﺖ ﻟﺪﺍﺭﻫﺎ ... ﺷﺒﺤﺖ ﻟﺮﻭﺷﻦ ﺍﺑﺘﺴﻤﺖ ﻭﻗﺮﺑﺖ ﻓﺘﺤﺎﺗﻪ ...
ﻟﻘﺎﺗﻪ ﻓﺎﺗﺢ ﺍﻟﺮﻭﺷﻦ ﻭﻭﺍﻗﻒ ﺑﺎﻟﺠﻨﺐ ﻻﺑﺲ ﻧﻈﺮﺍﺕ ﻭﻓﻴﺪﻩ ﻛﺘﺎﺏ .. ﻣﺎﺑﺘﺶ ﺗﺤﺴﺴﻪ ﺑﻮﺟﻮﺩﻫﺎ ﻛﺎﻧﺖ ﺗﺒﻲ ﺗﺘﺄﻣﻠﻪ ﻭﺑﺲ .. ﻣﺎﻓﻴﺶ ﺍﺣﻠﻰ ﻣﻦ ﻫﻜﻲ ﻋﻨﺪﻫﺎ ... ﻭﻋﻨﺪ ﺍﻱ ﺣﺪ ﻳﺤﺐ ﻣﻦ ﻗﻠﺒﻪ ...
🌹 ﻣﺎﺍﺳﺘﻜﻤﻠﺖ ﻟﻲ ﻓﻴﻚ ﺃﻭﻝ ﻧﻈﺮﺓ ..
ﺣﺘﻰ ﻋﻠﻤﺖ ﺍﻥ ﺣﺒﻚ ﻓﺎﺿﺤﻲ ..
ﺍﻫﻮﺍﻩ ﺣﺘﻰ ﺍﻟﻌﻴﻦ ﺗﺄﻟﻒ ﺳﻬﺪﻫﺎ ..
ﻓﻴﻪ،ﻭﺗﻄﺮﺏ ﺑﺎﻟﺴﻘﺎﻡ ﺟﻮﺍﺭﺣﻲ ..
ﻳﻘﻠﺐ ﻓﻲ ﺍﻟﺼﻔﺤﺎﺕ ﻭﻣﻨﺴﺠﻢ .. ﻛﺎﻥ ﻻﺑﺲ ﻓﺎﻧﻴﻠﻪ ﺯﻳﺘﻴﻪ ﻏﻠﻴﻄﻪ ﺷﻮﻳﻪ ﻭﺭﺍﻓﻊ ﻛﻤﺎﻣﻬﺎ ﺷﻮﻳﻪ ﻭﺳﺮﻭﺍﻝ ﺗﻮﺗﻪ ﺍﺳﻮﺩ ... ﻭﻻﺑﺲ ﺳﺎﻋﻪ ﻓﻴﺪﻩ ﺍﻟﻠﻲ ﻛﺎﻧﺖ ﺷﺎﺩﻩ ﺍﻟﻜﺘﺎﺏ .. ﻭﺍﻟﺘﺎﻧﻴﻪ ﻛﺎﻥ ﻳﺴﺎﻭﻱ ﺑﻴﻬﺎ ﻓﺎﻟﻨﻈﺎﺭﻩ ﻭﻳﻘﻠﺐ ﻓﻲ ﺍﻟﺼﻔﺤﺎﺕ ...
ﺍﻧﻘﻄﻌﺖ ﻋﻦ ﺍﻟﻌﺎﻟﻢ .. ﻭﺗﻤﻨﺖ ﻳﻘﻌﺪﻭﺍ ﻫﻜﻲ ﻃﻮﻝ ﻋﻤﺮﻫﺎ ﻫﻮ ﻗﺒﺎﻟﺔ ﻋﻴﻨﻬﺎ ﻭﻫﻲ ﺗﺘﻤﻠﻰ ﻣﻨﻪ ... ﻛﺎﻧﺖ ﻣﻦ ﻗﻮﺓ ﺷﻌﻮﺭﻫﺎ ﺑﻴﻪ ﻋﻴﻮﻧﻬﺎ ﻳﺘﻌﺒﻮﺍ ﺩﻣﻮﻉ .. ﻣﻦ ﺍﻟﺤﺐ .. ﻣﻦ ﺍﻟﻌﺸﻖ .. ﻣﻦ ﺍﻟﻮﻟﻪ .. ﻣﻦ ﺍﻟﺸﻮﻕ ... ﻣﻦ ﺍﻟﻬﻴﺎﻡ ... ﻛﻞ ﺷﻲ ﻋﺸﺎﺗﻪ ﻣﻌﺎﻩ .. ﻣﺮﺍﺣﻞ ﺍﻟﺤﺐ ﻛﻠﻬﺎ ﻋﺎﺷﺘﻬﺎ ﺑﻜﻞ ﻗﻮﺓ .. ﻣﺶ ﺑﻴﺪﻫﺎ ﺷﻲ ﻓﻮﻕ ﺍﻹﺭﺍﺩﻩ
💙 ﻧﻮﺭﺍﻥ ..
ﺍﻫﺎ ﻓﻮﻕ ﺍﺭﺍﺩﺗﻲ .. ﺍﻟﻠﻲ ﻋﺎﺷﺖ ﺍﻟﺤﺐ ﺍﻟﺤﻘﺎﻧﻲ ﺍﻟﺤﺐ ﺍﻟﻠﻲ ﻳﺨﻠﻲ ﻗﻠﺒﻚ ﻳﻨﺒﺾ ﻧﺒﻀﺎﺕ ﻗﻮﻳﻪ ﺍﺗﻌﺐ ﺍﻟﺠﺴﻢ ﻣﻌﺎﻫﺎ .. ﺍﻟﺤﺐ ﺍﻟﻠﻲ ﻳﺨﻠﻴﻚ ﻟﻤﺎ ﺗﺤﻘﻲ ﺍﻟﻠﻲ ﺗﺤﺒﻴﻪ .. ﺍﺿﻴﻌﻲ .. ﻭﺗﻨﺴﻲ ﺣﺘﻰ ﺍﻧﺘﻲ ﻣﻦ ﺗﻜﻮﻧﻲ .. ﺍﻟﺤﺐ ﺍﻟﻠﻲ ﻳﺨﻠﻴﻚ ﺗﺮﺿﻰ ﺑﺎﻟﻘﻠﻴﻞ ﻣﻦ ﺍﻟﺤﺒﻴﺐ ﺣﺘﻰ ﻧﻈﺮﺓ ﻋﺎﺑﺮﻩ ﺗﺒﺮﺩ ﺷﻮﻳﻪ ﻣﻦ ﻧﺎﺭﻙ ... ﺍﻟﻠﻲ ﻋﺎﺷﺖ ﻫﻀﺎ ﻛﻠﻪ ﺣﺘﻔﻬﻢ ﻛﻼﻣﻲ ... ﺑﺪﻭﻥ ﻣﺎﻧﺤﻜﻲ ﺍﻛﺜﺮ .
ﺻﻜﺮ ﺍﻟﻜﺘﺎﺏ ... ﻭﺭﻓﻊ ﻧﻈﺎﺭﺍﺗﻪ ﻉ ﺭﺍﺳﻪ .. ﻭﻗﻌﺪ ﻳﺤﺮﻙ ﻓﻲ ﺭﻗﺒﺘﻪ ... ﺗﻨﻬﺪ ... ﻭﺗﻠﻔﺖ ﻟﻠﺮﻭﺷﻦ ..
ﺍﺑﺘﺴﻤﺖ ﻣﻦ ﻭﺳﻂ ﻗﻠﺒﻬﺎ ﻭﻫﻲ ﺷﺎﺩﻩ ﻓﺮﺩﺓ ﺍﻟﺮﻭﺷﻦ ﻭﻣﺘﻜﻴﻪ ﻋﻠﻴﻬﺎ ...
ﺍﺑﺘﺴﻢ ﻭﻗﺮﺏ ﻣﻦ ﺍﻟﺮﻭﺷﻦ ..
ﻛﻤﺎﻝ : ﺷﻦ ﺟﻮ ..
ﻧﻮﺭﺍﻥ : ﺗﻤﺎﻡ .. ﺷﻦ ﺟﻮﻙ ﺍﻧﺖ ..
ﻛﻤﺎﻝ : ﻣﻠﻴﺢ ﻭﺍﻟﺤﻤﺪ ﻟﻠﻪ ..
ﻧﻮﺭﺍﻥ : ﻣﺎﺗﺘﻌﺒﺶ ﻣﻦ ﺍﻟﻘﺮﺍﻳﻪ ..
ﻛﻤﺎﻝ ﺑﻀﺤﻜﻪ : ﺗﺲ ... ﺍﻧﻲ ﻣﺴﺘﻤﺘﻊ ﺑﻴﻬﺎ ﻣﺎﻧﻤﻠﺶ .. ﺍﻫﺎ .. ﺫﻛﺮﺗﻴﻨﻲ .. ﺷﻦ ﺻﺎﺭ ﻓﻲ ﺍﻟﺮﻭﺍﻳﻪ ﺍﻟﻠﻲ ﻋﻄﺘﻬﺎﻟﻚ ﻣﻦ 150 ﺳﻨﻪ ﺗﻘﺮﻳﺒﺎ ..
ﻧﻮﺭﺍﻥ : ﻫﻬﻬﻬﻬﻬﻬﻬﻬﻬﻬﻬﻪ .. ﻳﺎﺻﺎﻣﺖ .. ﻗﺮﻳﺘﻬﺎ ..
ﻛﻤﺎﻝ ﺑﻀﺤﻜﻪ : ﻛﻠﻬﺎ ..
ﻧﻮﺭﺍﻥ : ﺍﻫﺎ ﻭﺍﻟﻠﻪ .. ﺛﻼﺙ ﺍﻳﺎﻡ ﺑﺲ ﻭﻛﻤﻠﺘﻬﺎ ﻣﻦ ﻟﻤﺎ ﻋﻄﺘﻴﻬﺎ ﻟﻴﺎ .. ﻭﻣﺎﺻﺪﻗﺘﺶ ﺭﻭﺣﻲ ..
ﻛﻤﺎﻝ : ﺑﺎﻫﻲ ﺷﻦ ﺭﺍﻳﻚ ﻓﻴﻬﺎ ..
ﻧﻮﺭﺍﻥ : ﺍﻧﺎ ﻛﺘﺒﺖ ﺭﺃﻳﻲ ﻓﻮﺭﻗﻪ ﻭﺩﺍﺳﺘﻬﺎ ﻓﻲ ﺍﻟﺮﻭﺍﻳﻪ .. ﺗﻮﺍ ﻟﻤﺎ ﻧﺮﺩﻫﺎ ﻟﻚ ﺍﻧﺖ ﺍﻗﺮﺍﻫﺎ ..
ﻛﻤﺎﻝ ﺍﺑﺘﺴﻢ : ok ﻳﺎﺳﺘﻲ ..
ﻓﺠﺄﺓ ﺍﻟﻤﻄﺮ ﺑﺪﺕ ﺗﺼﺐ ﻃﻮﻝ ﺑﻘﻮﺓ .. ﻗﻌﺪﻭﺍ ﻳﺸﺒﺤﻮﻟﻬﺎ ...
ﻭﻣﺒﺘﺴﻤﻴﻦ ...
ﻧﻮﺭﺍﻥ : ﺧﺎﻃﺮﻙ ﻓﻲ ﺳﺤﻠﺐ ..
ﻛﻤﺎﻝ ﺍﺑﺘﺴﻢ ﻭﻫﺰ ﺭﺍﺳﻪ ﺑﺈﻳﺠﺎﺏ ..
ﺍﺑﺘﺴﻤﺖ ﻭﺻﻜﺮﺕ ﺍﻟﺮﻭﺷﻦ ﻭﻫﻲ ﺗﺸﺒﺤﻠﻪ ..
ﻫﻮ ﺿﺤﻚ .. ﺑﻌﺪﻳﻦ ﺗﻨﻬﺪ ﻭﺻﻜﺮ ﺍﻟﺮﻭﺷﻦ ..
ﻃﻠﻌﺖ ﻣﻦ ﺍﻟﺪﺍﺭ ﻭﻧﺰﻟﺖ ﻟﻮﻃﺎ ﻭﻟﻠﻜﻮﺟﻴﻨﻪ ﻃﻮﻝ ..
ﻧﻮﺭﺍﻥ : ﻧﻮﺑﻲ ﻳﺎﻗﻠﺒﻲ ﺩﻳﺮﻱ ﺳﺨﺎﻥ ﻛﺒﻴﺮ ﺳﺤﻠﺐ ...
ﻧﺒﻮﻳﻪ ﺑﻀﺤﻜﻪ : ﺣﺎﺿﺮ ....
ﺍﻣﺎ ﻫﻮ ﻣﺸﻲ ﻟﺴﺮﻳﺮﻩ .. ﻗﺎﻡ ﺍﻟﺘﺨﺖ ﻭﻃﻠﻊ ﺍﻟﻤﺬﻛﺮﺓ ... ﻭﻗﻌﻤﺰ ﻉ ﺍﻟﻜﺮﺳﻲ ﻭﻧﺰﻝ ﺍﻟﻨﻈﺎﺭﺍﺕ ﻉ ﻋﻴﻮﻧﻪ ... ﻭﻓﺘﺢ ﻭﻳﻦ ﻣﺎﻭﺻﻞ ..
‏( ﻳﺎﺧﻮﺍﺗﻲ ﺑﺤﺒﻬﺎ ﺩﻱ ﺣﺒﻴﺒﺔ ﺍﻣﻬﺎ ... ﺍﻻﻏﻨﻴﻪ ﻋﻠﻘﺖ ﻓﺮﺍﺳﻲ ﻣﻦ ﻛﺜﺮ ﻣﺎﻧﻐﻨﻲ ﻓﻴﻬﺎ ﻟﺼﺒﺢ ﺍﻟﺴﻤﺤﻪ .. ﻋﺴﺴﻞ ﺗﻌﻠﻤﺖ ﻛﻠﻤﻪ ﺿﺤﻜﺖ ﻣﺘﺖ ﻣﻦ ﺍﻟﻀﺤﻚ ﻟﻤﺎ ﻗﺎﻟﺘﻬﺎ ... ﻛﺎﻧﺖ ﺗﻘﻮﻝ " ﺗﻤﺎ .. ﺗﻤﺎ " ﻭﻟﻴﻬﺎ ﻳﻮﻣﻴﻦ ﺗﻼﺗﻪ ﺗﻘﻮﻝ ﻓﻴﻬﺎ ﻭﻻ ﺍﻧﺎ ﻭﻻﺑﺎﺗﻬﺎ ﻓﻬﻤﻨﺎﻫﺎ .. ﺍﻻ ﺍﻟﻴﻮﻡ ..
ﻧﺎﺩﺍﻧﻲ ﺑﺎﺗﻬﺎ ﻗﺪﺍﻣﻬﺎ .. ﻗﻌﺪﺕ ﺗﻘﻮﻝ ﻭﺭﺍﻩ " ﺗﻤﺎ .. ﺗﻤﺎ " ..
ﻟﻤﺎ ﻓﻬﻤﺘﻬﺎ ﻟﺒﺎﺗﻬﺎ ﻗﺮﻳﺐ ﻛﻼﻫﺎ ﻣﻦ ﺍﻟﺒﻮﺱ ... ﺳﻔﻴﺎﻥ ﻳﻌﺸﻖ ﺑﻨﺘﻪ .. ﻭﺩﻳﻤﺎ ﻳﻘﻮﻟﻲ ﻫﺬﻱ ﻟﻼ ﺑﺎﺗﻬﺎ ... ﻣﺎﻏﺮﺗﺶ ﻣﻨﻬﺎ ﺑﺎﻟﻌﻜﺲ ﻓﺮﺣﺖ ﺑﺤﺒﻪ ﻟﻴﻬﺎ ﻭﺣﺐ ﺟﺪﻫﺎ ﻭﺣﺐ ﺣﻨﻬﺎ .. ﺣﺘﻰ ﺭﺿﻮﺍﻥ ﺍﻟﻠﻲ ﻣﻐﺮﻗﻬﺎ ﺑﺎﻟﻬﺪﺍﻳﺎ ﻓﻜﻞ ﺟﻴﻪ .. ﺍﻟﺤﻖ ﻳﻘﺎﻝ ... ﻧﺸﻮﻑ ﻓﻌﻴﻮﻧﻪ ﻧﻈﺮﺓ ﺣﺐ ﻟﻬﺎ ﺗﻨﺴﻴﻨﻲ ﻟﻠﺤﻈﺎﺕ ﻣﻦ ﻳﻜﻮﻥ ﺭﺿﻮﺍﻥ .. ﻭﻧﻘﻮﻝ ﻓﻨﻔﺴﻲ ﺭﺑﻲ ﺣﻂ ﻓﻲ ﻗﻠﻮﺏ ﺍﻟﻨﺎﺱ ﺣﺒﻬﺎ ﺍﻟﻠﻲ ﻳﺤﻘﻬﺎ ﻳﻤﻮﺕ ﻋﻠﻴﻬﺎ ..
ﻧﺮﺟﻲ ﺍﻣﺘﻰ ﺗﺴﻜﺮ ﺍﻟﺴﻨﻪ .. ﺗﻼﺗﻪ ﺷﻬﻮﺭ ﺷﻦ ﺑﻴﻔﻮﺗﻬﻦ ... ﻧﺒﻲ ﻧﻠﺒﺴﻬﺎ ﻗﻔﻄﺎﻥ ﻓﺼﻼﺗﻪ ﻟﻬﺎ ﺣﻨﺘﻬﺎ .. ﺍﻣﻲ ... ﺗﻠﺒﺴﻪ ﻓﻲ ﻋﻴﺪ ﻣﻴﻼﺩﻫﺎ ...
ﺻﺒﺢ ﻗﻠﺐ ﺍﻣﻬﺎ .. ﻭﻟﺖ ﺑﻬﺠﻪ ﻫﺎﻟﺤﻮﺵ ﻭﻧﺴﺘﻨﺎ ﻭﻟﻮ ﺷﻮﻳﻪ ﻣﻦ ﺍﻟﻢ ﻭﺣﺰﻥ ﺳﻨﻴﻦ ﻓﺎﺗﻦ ... ‏) ﻭﻗﻔﺖ ﻟﻌﻨﺪ ﻫﻨﻲ ...
ﻛﻤﺎﻝ ﺣﻮﻝ ﻧﻈﺎﺭﺍﺗﻪ ﻭﺣﻄﻬﻢ ﻉ ﺍﻟﻤﺬﻛﺮﺓ ﻭﺍﺗﻜﻰ ﻉ ﺍﻟﻜﺮﺳﻲ ﻭﺣﻂ ﺍﻳﺪﻳﻪ ﻭﺭﺍ ﺭﺍﺳﻪ ﻭﻗﻌﺪ ﻳﻔﻜﺮ .. ﻭﻳﻤﺮ ﻋﻠﻴﻪ ﺷﺮﻳﻂ ﻣﻮﺍﻗﻔﻪ ﻣﻊ ﺻﺒﻴﺤﻪ .. ﻣﻦ ﺍﻭﻝ ﻣﺮﺓ ﺷﺎﻓﻬﺎ ﻓﻴﻬﺎ ﻟﻌﻨﺪ ﻫﺎﻟﻠﺤﻈﻪ ..
ﻗﻠﺒﻪ ﻗﻌﺪ ﻳﺘﻠﺨﺒﻂ ﻓﻲ ﺍﻟﻨﺒﺾ ... ﺿﺤﻚ .. ﺳﻤﻊ ﺻﻮﺕ ﺍﻟﺒﺎﺏ ﻧﺎﺽ ..
ﻃﻠﻊ ﻣﻦ ﺍﻟﺪﺍﺭ ﻭﺗﻮﺟﻪ ﻟﻠﺒﺎﺏ ﻓﺘﺤﺘﻪ ..
ﻟﻘﻲ ﻭﺍﺣﺪ ﻣﻦ ﺍﻟﺤﺮﺍﺳﺎﺕ ﻓﻴﺪﻩ ﺻﻔﺮﻩ ﻓﻴﻬﺎ ﻃﺮﻣﺲ ﻟﻮﻧﻪ ﺍﺧﻀﺮ .. ﻭﻓﺎﺯﻭﺍ ﺷﻜﻼﻃﻪ ﻭﺣﻜﻪ ﺻﻐﻴﺮﻩ ﺑﻼﺳﺘﻚ ﻓﻴﻬﺎ ﻣﻜﺴﺮﺍﺕ ..
: ﻣﻦ ﺍﻵﻧﺴﻪ ﻧﻮﺭﺍﻥ ..
ﻛﻤﺎﻝ ﻗﻠﺒﻪ ﺭﺟﻊ ﻳﺘﻠﺨﺒﻂ ﻓﻲ ﺍﻟﻨﺒﺾ ﺍﻛﺜﺮ ﻣﻦ ﺍﻷﻭﻝ ﺧﺪﻱ ﻣﻨﻪ ﺍﻟﺼﻔﺮﺓ : ﺍﺷﻜﺮﻫﺎﻟﻲ .. ﻭﻣﺸﻜﻮﺭ ﺣﺘﻰ ﺍﻧﺖ ﻭﺳﺎﻣﺤﻨﻲ ﻓﺘﻌﺒﻚ ﻓﺠﻮ ﺯﻱ ﻫﺬﺍ ..
ﺍﻟﺸﺎﺏ ﺍﺑﺘﺴﻢ ﻭﻟﻒ ﻭﻧﺰﻝ ﻭﻫﻮ ﺧﺶ ﻭﺻﻜﺮ ﺍﻟﺒﺎﺏ ﺑﻜﺘﻔﻪ ...
ﻗﻌﺪ ﻣﺒﺘﺴﻢ ﻃﻮﻝ ﺍﻟﻮﻗﺖ ﻣﺸﻲ ﻟﻠﻜﻮﺟﻴﻨﻪ ﺧﺪﻱ ﻣﻖ ﺻﺐ ﻓﻴﻪ ﺍﻟﺴﺤﺎﺏ ﻭﺧﺪﻱ ﻛﺎﺷﻴﻚ ﺩﺍﺭ ﺷﻮﻳﻪ ﻣﻦ ﺍﻟﺸﻜﻼﻃﻪ .. ﻟﺤﺲ ﺍﻟﻜﺎﺷﻴﻚ ﻭﺣﻄﻪ .. ﺑﻌﺪﻳﻦ ﻓﺘﺢ ﺍﻟﺤﻜﻪ ﻭﻃﻠﻊ ﺑﻜﻤﺸﻪ ﺑﺴﻴﻄﻪ ﻭﻭﺯﻋﻬﻢ ﻓﻮﻗﻬﺎ ﻭﺍﺑﺘﺴﻢ ﻟﻤﺎ ﺷﺎﻑ ﺷﻜﻠﻪ ... ﻣﺸﻲ ﻟﻠﺪﺍﺭ ﻭﻭﻻ ﻟﻜﺮﺳﻴﻪ ﻭﻗﻌﻤﺰ .. ﻟﻜﻦ ﻣﺎﻗﺮﺍﺵ ... ﻛﺎﻥ ﻳﺴﻤﻊ ﻓﻲ ﺻﻮﺕ ﺍﻟﻤﻄﺮ ﻭﻣﺴﺘﻤﺘﻊ ﺑﺸﺮﺏ ﺍﻟﺴﺤﻠﺐ..💖
***
ﺍﺩﻳﺮ ﻓﻲ ﺍﻟﺴﺤﻠﺐ ﻭﺩﻣﻮﻋﻬﺎ ﻳﻨﺰﻟﻮﺍ ..
ﻓﻼﺵ ﺑﺎﻙ ..
ﻳﺎﻡ ﻛﺜﺮﻱ ﺳﻜﺮ ﺑﺎﻟﻠﻪ ...
ﻋﻼ : ﻻ ﻣﺎﻣﺎ ﺧﻠﻴﻪ ﻧﺎﻗﺺ ..
ﻋﻼﺀ : ﺑﺎﻫﻲ ﻟﻤﺎ ﺗﺠﻲ ﺗﺼﺒﻴﻠﻲ ﻛﺘﺮﻳﻠﻲ ﺳﻜﺮ ..
ﺗﻬﺎﻧﻲ : ﺍﺳﻜﺖ ﺍﻧﺖ ﻭﻳﺎﻫﺎ ﺑﻮﻛﻢ ﻳﺒﻴﻪ ﻣﻌﺪﻝ ﺑﻨﺪﻳﺮﻩ ﺯﻱ ﻣﺎﻳﺒﻲ ﻫﻮ ﻭﺍﻟﻠﻲ ﻳﺒﻲ ﺣﺎﺟﻪ ﻳﺪﻳﺮﻩ ﺑﺮﻭﺣﻪ ..
ﻋﻼﺀ : ﺭﻳﺘﻲ ﻳﺎﻟﻮﻟﻮ .... ﺣﻨﻲ ﻣﺎ ﻧﺠﻮﺍ ﺷﻲ ﺣﺪﺍ ﻧﺎﺻﺮ ..
ﻋﻼ : ﺍﻳﻪ ﻧﺼﻮﺭﺓ ﺣﺘﻰ ﻫﻮ ..
ﺍﻟﺘﻔﺘﺖ ﻭﻫﻲ ﺷﺎﺩﻩ ﻛﺎﺷﻴﻚ ﺍﻟﻠﻮﺡ : ﻳﺎﻗﻠﻴﻠﻴﻦ ﺍﻷﺩﺏ ﺍﻧﺖ ﻭﻳﺎﻫﺎ ﻛﺎﻥ ﻣﺎﻃﻠﻌﺘﻮﺵ ﺗﻮﺍ .. ﺷﻠﻂ ﺑﻴﻬﺎ ... ﻭﺗﻬﺪﺩ ﺑﺎﻟﻜﺎﺷﻴﻚ ..
ﻋﻼ ﻧﺎﺿﺖ ﻭﻫﻲ ﺗﻀﺤﻚ ﻭﺑﻌﺘﺘﻠﻬﺎ ﺑﻮﺳﻪ ﻭﻃﻠﻌﺖ ..
ﺿﺤﻜﺖ ﺑﻌﺪﻳﻦ ﺍﻟﺘﻔﺘﺖ ﻟﻌﻼﺀ ﻗﻌﺪﺕ ﺗﺸﺒﺤﻠﻪ ﺑﺮﻓﻌﺔ ﺣﺎﺟﺐ ..
ﻋﻼﺀ ﺑﺒﺮﻭﺩ ﺣﺮﻙ ﺭﺍﺳﻪ ﺑﻤﻌﻨﻰ ﺷﻨﻮ ..
ﺗﻬﺎﻧﻲ ﺑﺼﻮﺕ ﻋﺎﺍﻟﻲ : ﺗﻴﻴﻴﻴﻲ ﻧﻮﻭﻭﺽ ..
ﻧﺎﺽ ﻃﻮﻝ ﻭﻃﻠﻊ ﺑﺴﺮﻋﻪ .. ﻭﻟﺖ ﻟﻄﻨﺠﺮﺗﻬﺎ ﻭﻫﻲ ﺗﻀﺤﻚ ﻭﺗﺤﺮﻙ ﻓﺮﺍﺳﻬﺎ ﺍﻳﻤﻴﻦ ﻭﻳﺴﺎﺭ .. ﺷﻮﻳﻪ ﻭﻗﺎﻣﺖ ﺭﺍﺳﻬﺎ ﻟﻘﺎﺗﻪ ﻣﺒﻴﻦ ﺭﺍﺳﻪ ﻣﻦ ﺍﻟﺒﺎﺏ ..
ﻋﻼﺀ ﺑﻀﺤﻜﻪ : ﺣﺒﻲ ﻛﺘﺮﻱ ﻓﻴﻪ ﺳﻜﺮ ...
ﺗﻬﺎﻧﻲ : ﺑﺎﻫﻲ ﺑﺎﻫﻲ ... ﻳﺎﺣﺒﻚ ﻟﻠﺤﻠﻮ ﺧﺎﻳﻔﻪ ﻳﺮﻛﺒﻚ ﺍﻟﺴﻜﺮ ﻳﻮﻡ ﻣﻦ ﺍﻷﻳﺎﻡ ..
ﻋﻼﺀ : ﻫﻬﻬﻬﻬﻬﻬﻪ .. ﻣﺎﺗﺨﺎﻓﻴﺶ ﻫﻮ ﺭﺍﻛﺒﻨﻲ ..
ﺗﻬﺎﻧﻲ ﺑﺨﻠﻌﻪ : ﺑﻌﻴﺪ ﺍﻟﺴﻮ .. ﺗﺤﺮﻙ ﻣﻦ ﻣﻜﺎﻧﻚ ..
ﻋﻼﺀ ﺑﻀﺤﻜﻪ : ﻳﺎﺣﺒﻲ ﻗﺼﺪﻱ ﺯﺍﻳﺪ ﺣﻼﻭﺓ ... ﻣﺎﻳﻀﺮﺵ ...
ﺗﻬﺎﻧﻲ : ﻫﻬﻬﻬﻬﻬﻬﻪ ...
ﺍﻟﻮﻗﺖ ﺍﻟﺤﺎﺿﺮ ..
ﻗﻌﺪﺕ ﺗﺒﻜﻲ ﺑﺎﻟﻌﺒﺮﻩ ..
ﺗﻬﺎﻧﻲ : ﻭﻟﻴﺪﻱ ﺷﺎﺏ ﺯﻱ ﺍﻟﻮﺭﺩ ﺍﻟﻤﻔﺘﺢ ﺧﺪﺍﺗﻪ ﺍﻟﻤﻮﺕ ﻭﻣﺶ ﺍﻱ ﻣﻮﺕ .. ﺍﺍﺍﺍﺍﻩ ﻳﺎﺭﺑﻲ .. ﺻﺒﺮﻧﻲ ﻳﺎﺍﺍﺭﺑﻲ ﺻﺒﺮﻧﻲ ..
ﺟﺎﻫﺎ ﺭﺍﺟﻠﻬﺎ ..
ﻧﺎﺻﺮ؛ ﺗﻬﺎﺍﺍﺍﺍﺍﻧﻲ ..
ﺗﻬﺎﻧﻲ ﺣﻄﺖ ﻳﺪﻫﺎ ﻉ ﺻﺪﺭﻫﺎ : ﻣﻤﻤﻤﻤﻢ ... ﻳﺎﻧﺎﺻﺮ .. ﻧﺎﺭﻩ ﻣﺎﺑﺘﺶ ﺗﻄﻔﻰ ﻣﺎﺑﺘﺶ ... ﺟﺎﻫﺎ ﻭﺣﻀﻨﻬﺎ .... ﻭﻳﻬﺪﻱ ﻓﻴﻬﺎ ﺷﻢ ﺭﻳﺤﺔ ﺷﻴﺎﻁ ﺭﻛﺰ ﻉ ﺍﻟﻄﻨﺠﺮﻩ ﻃﻔﺎ ﻋﻠﻴﻬﺎ .. ﻭﻃﻠﻊ ﻣﺮﺗﻪ ﻣﻦ ﺍﻟﻜﻮﺟﻴﻨﻪ ..
***
ﻓﻲ ﺍﻟﻠﻴﻞ ..
ﻛﺎﻧﺖ ﻣﺘﻜﻴﻪ ﻉ ﺳﺮﻳﺮﻫﺎ ﻭﺗﻔﻜﺮ .. ﻓﺒﺎﻟﻬﺎ ﺣﻜﺎﻳﺔ ﺍﻟﺮﻳﻔﻮﺩﺟﻲ ... ﻣﻤﻜﻦ ﻫﻮ ﻣﻜﺎﻥ ﺍﻷﺳﺮﺍﺭ ﻭﺍﻟﻠﻲ ﺣﻴﻜﺸﻒ ﻫﻠﺒﻪ ﺣﺎﺟﺎﺕ ﻣﺨﻔﻴﻪ .. ﺑﺲ ﻛﻴﻒ ﺗﻘﺪﺭ ﺗﺨﺶ ... ﻫﻨﻲ ﺍﻟﺴﺆﺍﻝ ...
ﺑﺮﺍ ..
ﻣﻘﻌﻤﺰﺓ ﺍﻣﻬﺎ ﻭﺧﻮﻫﺎ ﻭﻭﻟﺪ ﻋﻤﻬﺎ ..
ﻋﺒﺪﺍﻟﻤﻠﻚ : ﺗﻲ ﻛﻴﻒ ﺻﺎﺭ ﻳﺎﻣﺮﺍﺕ ﻋﻤﻲ ..
ﺳﺎﻟﻤﻴﻦ : ﻣﺎﺗﺒﻴﺶ ﻳﺎﻭﻟﺪﻱ ﻣﺶ ﺑﺎﻟﻐﺼﺐ .. ﺧﻼﺹ ﺳﺎﺩ ﻣﺎﺟﺮﻳﺖ ﻓﺠﺮﺗﻬﺎ .. ﺗﻠﻘﻰ ﺧﻴﺮﻣﻨﻬﺎ ﻭﻟﺪﻱ .. ﺍﻟﺒﻨﺖ ﻣﺶ ﻟﻚ ..
ﻋﺒﺪﺍﻟﻤﻠﻚ ﺷﺒﺢ ﻟﻤﻌﺘﺰ ..
ﻣﻌﺘﺰ : ﻗﺘﻠﻚ ﻣﻦ ﺍﻟﺒﺪﺍﻳﻪ .. ﺳﻼﻑ ﻣﺶ ﻣﻘﺘﻨﻌﻪ ﺑﻴﻚ ..
ﻋﺒﺪﺍﻟﻤﻠﻚ : ﻣﺎﻝ ﺑﻤﻦ ﻣﻘﺘﻨﻌﻪ ..
ﺳﺎﻟﻤﻴﻦ ﺭﻓﻌﺖ ﺣﻮﺍﺟﺒﻬﺎ ﻭﻣﻌﺘﺰ ﺭﻗﺘﻠﻪ ..
ﻣﻌﺘﺰ : ﺍﺩﻭﻱ ﺯﻳﻦ ﻳﺎﻋﺒﺪﺍﻟﻤﻠﻚ .. ﻣﺎﻧﺒﻴﺶ ﻧﻐﻠﻂ ﻓﻴﻚ ..
ﺳﺎﻟﻤﻴﻦ : ﻋﻴﺐ ﻳﺎﻭﻟﺪﻱ ﻫﺎﻟﻜﻼﻡ ﻫﺬﻱ ﺑﻨﺖ ﻋﻤﻚ ﻣﺶ ﻋﺸﺎﻧﻬﻲ ﺭﻓﻀﺎﺗﻚ ﺍﺗﻘﻮﻝ ﻋﻠﻴﻬﺎ ﻫﻚ .. ﻫﺬﻱ ﻣﺶ ﺍﺧﻼﻕ ﺭﺍﺟﻞ ﻭﻟﺪ ﺑﻴﺘﻴﻪ ..
ﻋﺒﺪﺍﻟﻤﻠﻚ ﻣﺴﺢ ﺑﻴﺪﻩ ﻉ ﻭﺟﻬﻪ : ﺍﺳﻒ .. ﻉ ﺍﻟﻌﻤﻮﻡ ﺧﻼﺹ ﺑﻜﺮﺍ ﺭﺍﺩ ﻟﺪﺭﻧﻪ ..
ﺳﺎﻟﻤﻴﻦ : ﺑﻜﺮﺍ ﻛﻠﻨﺎ ﺭﺍﺩﻳﻦ .. ﺳﻼﻑ .. ﻋﻨﺪﻫﺎ ﺷﻐﻞ ﻭﺍﺟﺪ .. ﻣﺶ ﻓﺎﺿﻴﻪ ..
ﻣﻌﺘﺰ : ﻗﻠﺘﻬﺎﻟﻚ ﻣﻦ ﺍﻷﻭﻝ ..
ﺳﺎﻟﻤﻴﻦ : ﺧﻼﺹ ﻭﺍﻫﻮ ﺟﻴﺖ ﺣﻘﻴﺖ ﺑﻌﻴﻨﻲ .. ﺭﺑﻲ ﻳﻜﻮﻥ ﻓﻌﻮﻧﻬﺎ ﺑﻨﺘﻲ ..
ﻓﻲ ﺍﻟﺪﺍﺭ ..
ﺳﻼﻑ ﻣﻘﻌﻤﺰﺓ ﻉ ﺍﻟﺴﺮﻳﺮ ﺗﺨﻄﻂ .. ﺭﻥ ﺗﻠﻴﻔﻮﻧﻬﺎ ﻣﺪﺕ ﻳﺪﻫﺎ ﻭﺧﺪﺍﺗﻪ ﻣﻦ ﻉ ﺍﻟﻜﺎﻣﺪﻳﻨﺎ .. ﻟﻤﺎ ﺷﺎﻓﺖ ﺍﻟﻤﺘﺼﻞ ﺿﺤﻜﺖ .. ﻭﺭﺩﺕ ..
ﺳﻼﻑ : ﺍﻟﻮ ..
ﺍﻛﺮﻡ : ﺷﻦ ﺩﺍﻳﺮﺓ ..
ﺳﻼﻑ ﺳﻜﺘﺖ ..
ﺍﻛﺮﻡ : ﺁﺍﺍﻟﻮ ..
ﺳﻼﻑ ﺑﻨﺒﺮﺓ ﺣﺰﻥ ﻣﺼﻄﻨﻌﻪ : ﻧﺴﻤﻊ ﻓﻴﻚ ..
ﺍﻛﺮﻡ : ﻛﻨﻪ ﺻﻮﺗﻚ ..
ﺳﻼﻑ ﺳﻜﺘﺖ ..
ﺍﻛﺮﻡ ﺑﻌﺼﺒﻴﻪ : ﺍﺩﻭﻭﻱ ..
ﺳﻼﻑ ﺑﻌﺪﺕ ﺍﻟﺘﻠﻴﻔﻮﻥ ﻭﻫﻲ ﺗﻀﺤﻚ ﺑﻜﺘﻤﺎﻥ ﺑﻌﺪﻳﻦ ﻗﺮﺑﺎﺗﻪ : ﺍﻣﻢ .. ﺍﻛﺮﻡ ﻧﺒﻲ ﻣﻨﻚ .. ﺗﺸﻜﺮﻟﻲ ﻧﻮﺭﺍﻥ ﻉ ﻛﻞ ﺷﻲ .. ﺧﻼﺹ .. ﻭﺳﻜﺘﺖ ..
ﺍﻛﺮﻡ ﺑﺼﺪﻣﻪ ﻭﻗﻠﺒﻪ ﺗﺎﻛﻞ ﻓﻴﻪ ﺍﻟﻨﺎﺭ : ﺗﻴﻴﻲ .. ﺗﻜﻠﻤﻤﻤﻲ ﺍﻟﻬﻬﻬﻢ
. ﻣﺎﺗﻘﻌﺪﻳﻴﺶ ﺗﻘﻄﺮﻱ ﻓﻴﻬﺎﺍﺍ ..
ﺳﻼﻑ : ﺑﻨﺮﺩ ﻟﺪﺭﻧﻪ ﺧﻼﺹ ...
ﺍﻛﺮﻡ : ﻟﻴﺶ !!!! ؟
ﺳﻼﻑ : ﻣﺠﺒﻮﺭﺓ ﻣﺎﻓﺶ ﻗﺪﺍﻣﻲ ﻏﻴﺮ ﺍﻧﻲ ﻧﺮﺿﻰ ﺑﺎﻷﻣﺮ ﺍﻟﻮﺍﻗﻊ ..
ﺍﻛﺮﻡ ﻧﺎﺭﻩ ﻭﺍﻟﻌﻪ ﻭﻗﻠﺒﻪ ﻳﺪﻕ ﺑﻌﻨﻒ : ﻣﺠﺒﻮﺭﺓ ..!! ﻣﺎﻻ ﻣﻦ ﺍﻟﻠﻲ ﺍﻟﺼﺒﺢ ﻛﺎﻧﺖ ﺗﻘﻮﻝ " ﺍﻧﺎ ﻣﺎﺣﺪ ﻳﻘﺪﺭ ﻳﻐﺼﺒﻨﻲ ﻋﻠﻰ ﺷﻲ " ﻗﺎﻟﻬﺎ ﻭﻫﻮ ﻳﻘﻠﺪ ﻓﺼﻮﺗﻬﺎ .. ﻃﻠﻌﺘﻲ ﺩﻭﺓ ﺑﺲ .. ﺷﻮﺭﺍﺏ ﻳﺘﺤﺮﻛﻦ ... ﻛﻼﻡ ﻓﺎﺿﻲ ..
ﺳﻼﻑ؛ﻣﺶ ﺑﻴﺪﻱ ..
ﺍﻛﺮﻡ ﻳﻌﺠﺐ ﻋﻠﻴﻬﺎ ": ﻣﺶ ﺑﻴﺪﻱ ..." ﻣﻦ ﺍﻣﺘﻰ ﺍﻧﺘﻲ ﻣﺮﺧﻴﻪ ﻭﺗﺤﻜﻲ ﻛﻴﻒ ﺍﻟﺒﻨﺎﺕ ... ﻳﺎﺧﺴﺎﺭﺓ ..
ﺳﻼﻑ ﻃﻠﻌﺖ ﻣﻦ ﺍﻟﻤﻮﺩ : ﻛﻴﻒ ﺍﻟﺒﻨﺎﺕ؟ !!! ﺷﻦ ﺗﺤﻖ ﻓﻴﺎ ﺭﺍﺟﻞ ﺑﺸﻨﺎﺑﺎﺗﻲ ... ﻳﻠﻲ ﻣﺎﺗﺤﺸﻢ ﻳﺎﻗﻠﻴﻞ ﺍﻟﺬﻭﻕ .. ﻳﺎﻋﺪﻳﻢ ﺍﻟﺬﻭﻕ .. ﻳﺎ ..
ﺍﻛﺮﻡ : ﻏﻤﻲ ﻓﻤﻤﻤﻚ ... ﻏﻤﻴﻪ .. ﻣﺶ ﺍﻧﺎ ﺍﻟﻠﻲ ﺗﻌﻠﻲ ﺻﻮﺗﻚ ﻋﻠﻴﻪ .. ﻋﺪﻱ ﻋﻠﻴﻪ ﻉ ﺍﻟﻤﻨﻌﻨﻊ ﻫﺬﻛﻲ ..
ﺳﻼﻑ : ﺍﻫﺎ ... ﺭﺍﺟﻠﻲ .. ﺍﻗﻠﻬﺎ ﻋﻨﺪﻩ ﺫﻭﻕ ﻭﺍﺩﺏ ﻭﻳﺤﻖ ﻓﻴﺎ ﺍﺣﻠﻰ ﺍﻟﺒﻨﺎﺕ .... ﻭﺻﻜﺮﺕ ﻉ ﻭﺟﻬﻪ ﻭﺭﻗﺘﻠﻬﺎ ﻣﻨﻪ ﺭﺳﻤﻲ ..
ﺍﻣﺎ ﻫﻮ ﺷﺪ ﺗﻠﻴﻔﻮﻧﻪ ﺑﻘﺒﻀﺔ ﺍﻳﺪﻩ ﺑﻘﻮﺓ ﺑﻌﺪﻳﻦ ﻟﻒ ﻭﺣﺪﻓﻪ ﻉ ﻃﻮﻝ ﻳﺪﻩ .. ﻭﻣﺸﻲ ﻟﻠﻤﻠﺤﻖ ..
🌺🌺🌺
ﻋﻨﺪ ﻧﻮﺭﺍﻥ ..
ﻛﺎﻧﺖ ﻣﺸﻐﻮﻟﻪ ﺑﺘﺼﻤﻴﻤﻬﺎ ﺍﻟﺨﺎﺹ ﺍﻟﺠﺪﻳﺪ .. ﺟﺘﻬﺎ ﺭﺳﺎﻟﻪ ﻉ ﺗﻠﻴﻔﻮﻧﻬﺎ ﻓﺘﺤﺘﻬﺎ ..
‏( ﻣﻤﻜﻦ ﻳﻄﻞ ﺍﻟﺼﺒﺢ ﺷﻮﻳﻪ ‏) ... ﺍﺑﺘﺴﻤﺖ .. ﺗﻨﻬﺪﺕ " ﺁﺍﺍﺍﺍﻩ ﻣﻨﻚ ﻭﺍﻟﻒ ﺁﺍﺍﻩ ... ﻭﻣﻠﻴﻮﻥ ﺁﺍﺍﺍﺍﻩ .." ﻧﺎﺿﺖ ﻭﻣﺸﺖ ﻟﻠﺮﻭﺷﻦ ﻭﻓﺘﺤﺎﺗﻪ ..
ﻛﻤﺎﻝ : ﻣﺶ ﺣﻨﺎﺧﺪ ﻣﻦ ﻭﻗﺘﻚ ﻫﻠﺒﻪ .. ﻣﺸﻜﻮﺭﺓ ﻉ ﺍﻟﺴﺤﻠﺐ ..
ﻧﻮﺭﺍﻥ ﺑﺈﺑﺘﺴﺎﻣﻪ : ﺻﺤﺘﻴﻦ ..
ﻛﻤﺎﻝ : ﺑﺲ ﺍﻟﻠﻲ ﺷﺮﺑﺘﻪ ﺍﻣﺲ ﻋﺠﺒﻨﻲ ﺍﻛﺜﺮ ..
ﻧﻮﺭﺍﻥ ﺍﺑﺘﺴﺎﻣﺘﻬﺎ ﻉ ﻭﺟﻬﻬﺎ ﻭﻗﻌﺪﺕ ﺳﺎﻛﺘﻪ ..
ﻛﻤﺎﻝ : ﺍﻣﻢ .. ﺑﻨﺴﺎﻟﻚ ..
ﻧﻮﺭﺍﻥ : ﺍﺳﺄﻝ ..
ﻛﻤﺎﻝ : ﺷﻦ ﺑﻴﺼﻴﺮ ﻓﻲ ﺍﻟﻤﺴﺘﺸﻔﻰ ﺑﻌﺪ ﻣﺎﺳﻴﺐ ﺍﻟﺪﻛﺘﻮﺭ ﻋﻴﺴﻰ ... ﻻﺯﻡ ﺗﺠﻲ ﺍﻷﻳﺎﻡ ﻫﺎﺩﻱ ﻭﺩﻳﺮﻫﺎ ﺑﺮﻭﺣﻚ ﻟﻴﻦ ﺗﻠﻘﻲ ﺣﺪ ﺗﺎﻧﻲ ..
ﻧﻮﺭﺍﻥ : ﺍﻫﺎ .. ﺑﻜﺮﺍ ﻣﺎﺷﻴﻪ ..
ﻛﻤﺎﻝ ﺍﺑﺘﺴﻢ ﺑﻔﺮﺡ : ﻛﻮﻳﺲ ... ﺍﻣﻢ ﺑﺎﻫﻲ ﺗﻮﺍ ﻧﺨﻠﻴﻚ ﺗﺮﻗﺪﻱ ﺗﺼﺒﺤﻲ ﻉ ﺧﻴﺮ ..
ﻧﻮﺭﺍﻥ ﺑﺈﺑﺘﺴﺎﻣﻪ : ﻗﺪﺍﻣﻚ ﻛﻞ ﺧﻴﺮ ... ﺧﺸﺖ ﻭﺳﻜﺮﺕ ﺍﻟﺮﻭﺷﻦ ﻭﻫﻲ ﺗﺸﻮﻓﻠﻪ ﻭﻫﻮ ﻧﻔﺲ ﺍﻟﺸﻲ ..
ﺗﻠﻔﺖ ﻟﻠﺴﺮﻳﺮ ﻓﻜﺮ ﻳﻘﺮﺍ ﺍﻟﻤﺬﻛﺮﺍﺕ ﺑﺲ ﻓﺎﺕ ﺍﻟﻤﻮﺿﻮﻉ .. ﺧﺎﻑ ﻟﻮ ﻳﻘﺮﺍ ﺷﻲ ﻳﻠﺨﺒﻂ ﻋﻠﻴﻪ ﺟﻮﻩ ﻭﻳﺨﻔﻒ ﻣﻦ ﺣﻤﺎﺳﻪ ﻟﻠﺸﻲ ﺍﻟﻠﻲ ﻣﺨﻄﻄﻠﻪ ..
***
ﺗﺎﻧﻲ ﻳﻮﻡ ..
ﺍﻟﺴﺎﻋﻪ 10 ﺍﻟﺼﺒﺢ ..
ﻛﺎﻥ ﻓﻲ ﺻﺎﻟﺔ ﺍﻟﺮﻳﺎﺿﻪ .. ﻛﺎﻟﻌﺎﺩﻩ ﻳﻔﺶ ﻏﻠﻪ ﻓﻴﻬﺎ .. ﺧﻴﺮ ﻣﺎﻳﻔﺸﻪ ﻓﻲ ﻋﺒﺎﺩ ﺍﻟﻠﻪ ...😂
ﻓﻲ ﺍﻟﻜﻮﺟﻴﻨﻪ ..
ﻧﺒﻮﻳﻪ : ﺩﻧﺘﻲ ﻗﻮﻟﺘﻲ ﺣﻄﻮﻟﻲ ﺍﻟﻘﻌﺪﻩ ﻋﻨﺪﻫﻢ ..
ﺳﺎﺭﺓ : ﻭﺍﻧﺘﻲ ﻣﺎﻟﻚ ﻳﺎﻭﻟﻴﻪ .. ﻣﺶ ﻓﺮﺣﺎﻧﻪ ﺍﻧﻲ ﺟﻴﺖ ..
ﻧﺒﻮﻳﻪ ﺑﻀﺤﻜﻪ : ﺟﺎﺗﻚ ﺍﻹﻳﻪ ... ﺍﻧﺎ ﺍﺳﺘﻐﺮﺑﺖ ﺑﺲ ..
ﺳﺎﺭﺓ : ﺍﻣﻢ ﻣﺎﻓﻲ ﺣﺪ ﻫﻨﺎ ...
ﻧﺒﻮﻳﻪ : ﺍﻟﺒﻴﻪ ﻭﺍﻟﺴﺖ ﻫﺎﻧﻢ ﻟﺴﺎ ﻧﺎﻳﻤﻴﻦ .. ﻭﺍﻟﺴﺖ ﻧﻮﺭﺍﻥ ﻭﺷﻬﺎﺏ ﺑﻴﻪ ﺧﺮﺟﻮﺍ ﺑﺪﻱ ..
ﺳﺎﺭﺓ : ﺍﻫﺎ ﺍﻟﻴﻮﻡ ﺍﻟﺠﻮ ﺍﺣﺴﻦ ﺣﺘﻰ ﺍﻟﺴﺤﺎﺏ ﺗﺒﺪﺩ .. ﺍﻟﻤﻴﻪ ﺷﻔﻄﺘﻬﺎ ﺍﻟﺒﻠﺪﻳﻪ ... ﺍﻣﻤﻢ ﺑﺎﻩ ﺍﻛﺮﻡ ﻭﻳﻦ ..
ﻧﺒﻮﺑﻪ ﺷﺒﺤﺘﻠﻪ ﻉ ﺟﻨﺐ ﺑﻀﺤﻜﻪ : ﺑﻴﺘﻤﺮﻥ ﻳﺎﺧﺘﻲ ﻓﻲ ﺻﺎﻟﻪ ﺍﻟﺮﻳﺎﺿﻪ ..
ﺳﺎﺭﺓ :. ﺍﻫﺎ ﻋﺪﺍ ﻟﻠﺼﺎﻟﻪ ... ﻣﺎﻛﻨﺘﺶ ﻧﻌﺮﻑ ﺍﻧﻪ ﻣﺴﺠﻞ ﻓﻲ ﺻﺎﻟﺔ ..
ﻧﺒﻮﻳﻪ : ﻣﺴﺠﻞ ﺍﻳﻪ !! ؟ﻫﻮ ﻓﻲ ﺍﻟﺼﺎﻟﻪ ﺍﻟﻠﻲ ﻓﻲ ﺍﻟﻔﻴﻼ ..
ﺳﺎﺭﺓ ﻣﺘﻔﺎﺟﺌﻪ : ﻫﺎﻟﻔﻴﻼ ﻛﺒﻴﺮﻩ ﻭﺍﺟﺪ ﺍﻟﻮﺍﺣﺪ ﻳﺮﻳﺢ ﻓﻴﻬﺎ ... ﻭﻳﻨﻬﺎ ﺍﻟﺼﺎﻟﻪ ﻫﺬﻱ ..
ﻧﺒﻮﻳﻪ ﺑﻀﺤﻜﻪ : ﺍﻃﻠﻌﻲ ﻣﻦ ﻫﻨﺎ ﺧﻮﺩﻱ ﻗﺪﺍﻣﻚ ﻭﺑﻌﺪﻫﺎ ﻟﻔﻲ ﺷﻤﺎﻝ ﻛﻤﻠﻲ ﻣﺎﺷﻴﻪ .. ﻟﺤﺪ ﻣﺎﻳﻘﺎﺑﻠﻚ ﺳﻠﻢ ﻣﻦ ﺗﻼﺕ ﺍﺩﺭﺍﺝ ﺍﺭﻛﺒﻲ ﻭﺣﺘﺒﺎﻥ ﻋﻠﻴﻚ .. ﺍﺻﻞ ﺣﻴﻄﺎﻧﻬﺎ ﻛﻠﻬﺎ ﻗﺰﺍﺯ ﻣﺪﻋﻢ ﻭﺿﺪ ﺭﺻﺎﺹ ﻛﻤﺎﻥ
ﺳﺎﺭﻩ : ﺷﻮﻗﺘﻴﻨﻲ ﻧﺤﻘﻬﺎ ... ﻃﻠﻌﺖ ﻣﻦ ﺣﺪﺍﻫﺎ ﺟﺮﻱ .. ﻭﻧﺒﻮﻳﻪ ﺗﻀﺤﻚ
ﻣﺸﺖ ﺯﻱ ﻣﺎﻗﺎﻟﺘﻠﻬﺎ ﺑﺎﻟﺰﺑﻂ .. ﻭﺻﻠﺖ ﻓﻲ ﺍﻟﺪﺭﺟﺎﺕ ﺭﻛﺒﺘﻬﻢ ﺷﺎﻓﺎﺗﻪ ﻟﻘﺎﺗﻪ ﻳﺪﻳﺮ ﻓﺘﻤﺎﺭﻳﻦ ﺍﻟﻔﺘﻨﺲ ... ﻣﺘﺎﻉ ﺍﻟﺘﺮﺍﻱ ﻭﺍﻟﺒﺎﻱ .. ﻫﻚ ﻧﺴﻤﻊ ﻓﻴﻬﻢ ﻳﻘﻮﻟﻮﺍ ﻣﺶ ﻋﺎﺭﻓﻪ ﺻﺢ ﻭﻻ ﻏﻠﻂ 😂
ﺍﻟﻤﻬﻢ ﻗﺪﻣﺖ ﻭﻫﻲ ﻣﺒﻬﻮﺭﻩ .. ﺍﻭﻝ ﻣﺮﻩ ﺗﺸﻮﻑ ﻋﻀﻼﺗﻪ .. ﻭﺑﻨﻴﺔ ﺟﺴﻤﻪ .. ﺭﻏﻢ ﺍﻥ ﻛﺎﻥ ﻭﺍﺿﺢ ﻣﻦ ﻟﺒﺴﻪ ﺍﻟﻠﻲ ﻳﻠﺒﺲ ﻓﻴﻪ ﻛﻴﻒ ﻳﻄﻠﻊ ﻋﻠﻴﻪ ﺑﺲ ﻫﺎﻟﻤﺮﺓ ﺑﺎﻥ ﺍﻛﺘﺮ .. ﻛﺎﻥ ﻻﺑﺲ ﻛﺎﻧﺘﻴﺮﺍ ﻻﻥ ﺣﻴﺴﺨﻦ ﻣﻊ ﺍﻟﺘﻤﺮﻳﻦ .. ﻭﺳﺮﻭﺍﻝ ﺍﺳﻮﺩ .. ﻛﺎﻥ ﻓﻀﻴﻊ ...😍 ﺗﺸﺒﺤﻠﻪ ﻭﺧﻼﺹ ...
ﻫﻮ ﻭﻗﻒ ﻭﻗﻌﺪ ﻳﺸﺮﺏ ﻓﻲ ﻣﻴﻪ ... ﺑﻌﺪﻳﻦ ﺟﻲ ﺑﻴﺎﺧﺪ ﺍﻟﻔﻮﻃﻪ ﻣﻦ ﻉ ﻛﺘﻔﻪ ﻃﺎﺣﺖ ﻣﻦ ﺍﻟﺨﻠﻒ ﺗﻠﻔﺖ ﻭﻃﺒﺲ ﺑﻴﺠﻴﺒﻬﺎ ﺭﻓﻌﻬﺎ ﻭﺭﻓﻊ ﺭﺍﺳﻪ ﺗﺒﺖ ﻉ ﻟﻘﻄﻪ ...
ﺑﻌﺪﻳﻦ ﻭﻗﻒ ﻉ ﺣﻴﻠﻪ .. ﻗﻌﺪ ﻳﻤﺴﺢ ﻓﻲ ﺭﻗﺒﺘﻪ ﻭﻳﺸﻮﻓﻠﻬﺎ ﺑﺤﺪﻩ ..
ﻫﻲ ﺗﻤﺎﺳﻜﺖ ﻭﺧﺸﺘﻠﻪ .. ﻗﻌﺪﺕ ﺗﻤﺸﻲ ﻭﺗﻮﺯﻉ ﻓﻲ ﻧﻈﺮﻫﺎ ﻉ ﺍﻟﻤﻜﺎﻥ ﻭﺗﺘﻔﺤﺺ ﻓﻴﻪ .. ﻟﻌﻨﺪ ﻭﺻﻠﺖ ﻓﻴﻪ ..
ﺍﻛﺮﻡ : ﻛﻨﺘﻲ ﺗﺴﻬﻮﻛﻲ؟ !!
ﺳﺎﺭﻩ ﺑﺤﺪﻩ : ﻣﺶ ﻫﻀﺎ ﺍﻟﻠﻲ ﺟﺎﻳﻪ ﻧﺤﻜﻲ ﻓﻴﻪ ﺑﻨﺤﻜﻲ ﻓﻲ ﺷﻲ ﺍﻫﻢ ..
ﺍﻛﺮﻡ : ﺍﻣﻤﻤﻢ ... ﺣﻂ ﺍﻟﻔﻮﻃﻪ ﻉ ﺍﻟﻄﺎﻭﻟﻪ ﻭﻗﺪﻣﻠﻬﺎ ﻛﻴﻒ ﺟﺎﻱ ﺑﻴﺤﻂ ﻳﺪﻩ ﻉ ﺫﺭﺍﻋﻬﺎ .. ﺑﺤﺮﻛﻪ ﺳﺮﻳﻌﻪ ﺟﺒﺪﺗﻬﺎ ﻭﻟﻮﺗﻬﺎ ﻭﺭﺍ ﻇﻬﺮﻩ ..
ﺳﺎﺭﻩ : ﻣﻦ ﻫﻮ ﻫﺎﻣﺎﻥ ..
ﺍﻛﺮﻡ : ﺫﺭﺍﻉ ﺭﺿﻮﺍﻥ ﺍﻟﻴﻤﻴﻦ ..
ﺳﺎﺭﻩ : ﻋﺎﺭﻓﻪ .. ﻏﻴﺮﻩ ..
ﺍﻛﺮﻡ : ﻣﺎﻋﻨﺪﻳﺶ ﻏﻴﺮﻩ .
ﺷﺪﺕ ﻋﻠﻴﻪ ﺑﻘﻮﺓ : ﻣﻦ ﻫﻮ ﻫﺎﻣﺎﻥ ..
ﺍﻛﺮﻡ ﺳﻜﺖ ... ﻓﻠﺤﻈﻪ ﻧﻔﺾ ﻳﺪﻫﺎ ﻭﺷﺪﻫﺎ ﻣﻨﻪ ﻭﻗﺮﺑﻬﺎ ﻟﻴﻪ ﺑﺤﻴﺚ ﻳﻜﻮﻥ ﻇﻬﺮﻫﺎ ﻻﺻﻖ ﻓﺼﺪﺭﻩ .. ﻭﺷﺪ ﻳﺪﻫﺎ ﺍﻟﺘﺎﻧﻴﻪ ﻭﻟﻔﻬﺎ ﻉ ﺍﻷﻭﻟﻰ ﻭﻗﻌﺪ ﺷﺎﺩﻫﻢ ﺍﻟﺰﻭﺯ ..
ﺍﻛﺮﻡ : ﻫﻮ ﺍﻫﻢ ﺭﺟﺎﻟﻪ ﻭﺍﻗﺮﺑﻬﻢ ﻭﻳﻌﺮﻓﻪ ﻣﻦ ﺳﻨﻴﻦ ﻃﻮﻳﻠﻪ ﻭﺍﺟﺪ ﻣﻦ ﺣﻴﺎﺓ ﺑﺎﺕ ﺭﺿﻮﺍﻥ ...
ﺳﺎﺭﻩ : ﺍﻣﻤﻤﻢ ... ﻭﺭﺍﻩ ﺣﺎﺟﺎﺕ ﻭﺍﺟﺪﻩ ...
ﺍﻛﺮﻡ : ﺯﻱ ..
ﺳﺎﺭﻩ : ﻛﺎﻥ ﻧﻌﻠﻢ ﻣﺎﻛﻨﺘﺶ ﻣﺼﺒﻴﻪ ﺣﺪﺍﻙ ..
ﺍﻛﺮﻡ ﺷﺪ ﻋﻠﻴﻬﺎ ﺑﻘﻮﺓ .. ﻫﻲ ﻗﻠﺒﻬﺎ ﻗﻌﺪ ﻳﺪﻕ ﺑﻘﻮﺓ ﺷﺪﻳﺪﻩ .. ﺍﻣﺎ ﻫﻮ ﻟﻠﺤﻈﺎﺕ ﻧﺴﻲ ﻧﻔﺴﻪ .. ﻗﺮﺏ ﻣﻦ ﻭﺩﻧﻬﺎ : ﺷﻦ ﺻﺎﺭ ﻓﻮﻟﺪ ﺳﻴﺪﻙ ..
ﺳﺎﺭﺓ ﻭﻫﻲ ﻣﻠﺨﺒﻄﻪ ﻉ ﺍﻷﺧﺮ : ﺥ .. ﻻﺹ ..
ﺍﻛﺮﻡ : ﺧﻼﺹ ﺷﻦ ..
ﺳﺎﺭﻩ : ﺧﻼﺹ .. ﻳﻌﻨﻲ ... ﻣﺎﻓﺶ ﺟﻮﺍﺯ ..
ﺍﻛﺮﻡ ﺷﺪ ﻉ ﺍﻳﺪﻳﻬﺎ ﺑﻌﻨﻒ : ﻟﻴﺶ ﻛﺬﺑﺘﻲ ..
ﺳﺎﺭﻩ " ﻛﻨﻲ ﺍﻧﺎ ﻫﻚ ﻣﺴﺘﺴﻠﻤﻪ ... ﺣﻴﻪ ﻉ ﻋﻤﻪ ﻫﻀﺎ ﻛﻴﻒ ﻣﺎﺳﻜﻨﻲ ﻫﻚ ..." ﺣﻮﻟﺘﻠﻪ ﺍﻳﺪﻳﻪ ﺑﻜﻞ ﻗﻮﺗﻬﺎ ﺑﻌﺪ ﻭﻫﻲ ﻣﺸﺖ ﺑﺴﺮﻋﻪ ﻭﻃﻠﻌﺖ ﺗﺠﺮﻱ ..
ﺍﻣﺎ ﻫﻮ ﺧﺪﻱ ﻧﻔﺲ ﻋﻤﻴﻖ ﺍﺑﺘﺴﻢ ﻉ ﺟﻨﺐ .. ﺣﻂ ﻳﺪﻩ ﻉ ﺻﺪﺭﻩ ﻭﻗﻌﺪ ﻳﻤﺸﻲ ﻋﻠﻴﻪ .. ﻭﻳﻀﺤﻚ .. ﺑﻌﺪﻳﻦ ﻗﻌﺪ ﻳﺤﺮﻙ ﻓﻲ ﺫﺭﺍﻋﺘﻪ ﻭﻫﻮ ﻳﺪﻭﺭ ﻓﻲ ﺍﻟﻤﻜﺎﻥ ... ﻭﺍﺑﺘﺴﺎﻣﺘﻪ ﺍﻟﻤﻤﻴﺰﺓ ﻣﺎﻓﺎﺭﻗﺘﺶ ﻭﺟﻬﻪ ..
***
ﻓﻲ ﺍﻟﻤﺴﺘﺸﻔﻰ ..
ﻣﺠﺘﻤﻌﻪ ﺑﺄﻫﻢ ﺍﻟﺪﻛﺎﺗﺮﺓ ﻓﻲ ﺍﻟﻤﺴﺘﺸﻔﻰ ..
ﻧﻮﺭﺍﻥ : ﺍﻟﺤﻤﺪ ﻟﻠﻪ ﺍﻟﻠﻲ ﻣﻦ ﻋﻠﻴﺎ ﺑﻌﻤﻞ ﺍﻟﺨﻴﺮ ﻫﻀﺎ ﺍﻟﻠﻲ ﻧﻔﻌﺖ ﻓﻴﻪ ﺑﻔﻀﻞ ﺍﻟﻠﻪ ﻧﺎﺱ ﻭﺍﺟﺪﻩ .. ﻣﻬﻢ ﻋﻨﺪﻱ ﻫﺎﻟﻤﺴﺘﺸﻔﻰ ﻳﻜﻮﻥ ﻣﺎﺷﻲ ﺑﻨﻈﺎﻡ ﻭﺍﻧﻀﺒﺎﻁ ﻭﻳﻜﻮﻥ ﺗﺤﺖ ﺍﺩﺍﺭﻩ ﺣﺪ ﺍﻣﻴﻦ ﻭﻋﻨﺪﻩ ﺿﻤﻴﺮ ﻭﻋﺎﺭﻑ ﺷﻦ ﻳﺪﻳﺮ ... ﻭﺩ . ﻋﻴﺴﻰ ﺗﺴﻬﻞ ﻳﺸﻮﻑ ﻧﻔﺴﻪ ﻓﻤﻜﺎﻥ ﻏﻴﺮ ﻫﻀﺎ .. ﺣﻘﻪ .. ﺍﻟﻤﻬﻢ .. ﺍﻧﺎ ﺍﻟﻴﻮﻡ ﺑﻨﻌﻴﻦ ﺣﺪ ﺟﺪﻳﺪ ﻣﻜﺎﻧﻪ ﻭﺍﺧﺘﻴﺎﺭﻱ ﻟﻪ ﻧﺎﺑﻊ ﻣﻦ ﻣﻌﺮﻓﺘﻲ ﺑﻴﻪ ﻭﺑﺄﺧﻼﻗﻪ ﻭﺑﻤﻜﺎﻧﺘﻪ ﻋﻨﺪ ﻛﻞ ﺣﺪ ﻓﻲ ﻫﺎﻟﻤﺴﺘﺸﻔﻰ ﻣﺮﺿﻰ .. ﺍﻭ ﺍﻃﺒﺎﺀ ﻭﻃﺎﻗﻢ ﺗﻤﺮﻳﺾ .. ﻭﺣﺘﻰ ﺍﻟﻌﺎﻣﻠﻴﻦ ..
ﻛﻤﺎﻝ ﻛﺎﻥ ﻣﺶ ﻣﺮﻛﺰ ﻓﻜﻼﻣﻬﺎ ﻗﺪ ﻣﺎﻛﺎﻥ ﻳﺘﺄﻣﻞ ﻃﺮﻳﻘﻪ ﺗﻘﻌﻤﻴﺰﺗﻬﺎ ﻭﻛﻼﻣﻬﺎ ... ﻭﺍﺳﻠﻮﺑﻬﺎ ﻭﺷﺨﺼﻴﺘﻬﺎ .. ﺍﻹﺑﺘﺴﺎﻣﻪ ﻣﺎﻓﺎﺭﻗﺘﺶ ﻭﺟﻬﻬﺎ ﻭﺑﺮﻏﻢ ﺻﻐﺮ ﺳﻨﻬﺎ ﺇﻻ ﺍﻧﻬﺎ ﺭﺍﻛﺰﺓ ﻭﻋﺎﺭﻓﻪ ﺷﻦ ﺗﻘﻮﻝ
ﻧﻮﺭﺍﻥ : ﺍﻟﻤﺪﻳﺮ ﺍﻟﺠﺪﻳﺪ ﻟﻠﻤﺴﺘﺸﻔﻰ ﺍﻟﺪﻛﺘﻮﺭ ﻛﻤﺎﻝ ..
ﻫﻮ ﻣﺎﺳﻤﻌﺶ ﺷﻦ ﻗﺎﻟﺖ .. ﺷﺒﺤﻮﻟﻪ ﺍﻟﺪﻛﺎﺗﺮﻩ " ﺭﺟﺎﻝ ﻭﻧﺴﺎﺀ .."
ﺷﺮﻑ : ﺩﻛﺘﻮﺭ ﻣﺒﺮﻭﻙ ..
ﻛﻤﺎﻝ ﺍﺳﺘﺎﻗﺾ :. ﺍﻣﻢ ..
ﺩﻛﺘﻮﺭ ﺭﺍﻣﻲ ﺑﻀﺤﻜﻪ : ﻣﺼﺪﻭﻡ ﺷﻜﻠﻪ ..
ﻛﻤﺎﻝ : ﻋﻼﺵ ..
ﻧﻮﺭﺍﻥ ﺑﺈﺳﺘﻐﺮﺍﺏ : ﻣﺎﺳﻤﻌﺘﻨﻴﺶ ﺷﻦ ﻗﻠﺖ ..
ﺩﻛﺘﻮﺭﻩ ﺯﺑﻴﺪﻩ ﺑﻤﺰﺡ : ﻻ ﺩﻛﺘﻮﺭ ﻋﺎﺑﻴﻴﻦ ﻋﻠﻴﻚ ﻧﺤﻨﺎ ﻣﻦ ﺍﻭﻟﻬﺎ ﻫﻚ ..
ﺿﺤﻜﻮﺍ ﻛﻠﻬﻢ ..
ﻟﻤﺎ : ﺩﻛﺘﻮﺭ ﻛﻤﺎﻝ .. ﺍﻷﺳﺘﺎﺫﻩ ﻧﻮﺭﺍﻥ ﻋﻴﻨﺎﺗﻚ ﻣﺪﻳﺮ ﻟﻠﻤﺴﺘﺸﻔﻰ ..
ﻛﻤﺎﻝ ﺷﺒﺢ ﻟﻨﻮﺭﺍﻥ ﺑﺼﺪﻣﻪ : ﻛﻴﻒ؟ !!!
ﻧﻮﺭﺍﻥ ﺑﻀﺤﻜﻪ : ﺍﻫﺎ .. ﻭﻗﺮﺍﺭ ﻏﻴﺮ ﻗﺎﺑﻞ ﻟﻠﻨﻘﺎﺵ ...
ﻛﻤﺎﻝ ﻗﻌﺪ ﻳﺸﺒﺢ ﻟﺰﻣﻼﺋﻪ : ﺭﺍﺿﻴﻴﻦ ..
ﺍﺑﺘﺴﻤﻮﺍ ..
ﺯﺑﻴﺪﻩ : ﺗﺒﻴﻬﺎ ﺑﺎﻟﺘﺼﻮﻳﺖ .. ﻣﻦ ﻳﻘﺒﻞ ﺍﻟﺪﻛﺘﻮﺭ ﻛﻤﺎﻝ ﻣﺪﻳﺮ ﻟﻠﻤﺴﺘﺸﻔﻰ ..
ﻛﻠﻬﻢ ﺭﻓﻌﻮﺍ ﺍﻳﺪﻳﻬﻢ ..
ﻛﻤﺎﻝ ﺿﺤﻚ ﻭﺣﺮﻙ ﺭﺍﺳﻪ ﺍﻳﻤﻴﻦ ﻭﺍﻳﺴﺎﺭ : ﻣﺎﻓﻴﺶ ﺧﻴﺎﺭ ﺗﺎﻧﻲ
ﺧﻼﺹ ... ﺇﻥ ﺷﺎﺀ ﺍﻟﻠﻪ ﻧﻜﻮﻥ ﻗﺪ ﺍﻟﺜﻘﻪ ..
ﻧﻮﺭﺍﻥ ﺑﺈﺑﺘﺴﺎﻣﻪ : ﺇﻥ ﺷﺎﺀ ﺍﻟﻠﻪ ..
ﺷﻮﻳﻪ ﻭﻧﺎﺿﻮﺍ ﺍﻟﺪﻛﺎﺗﺮﻩ ﻣﺸﻮﻟﻬﺎ ﻳﻜﻠﻤﻮﺍ ﻓﻴﻬﺎ ﻭﻫﻮ .. ﻳﺸﻮﻓﻠﻬﺎ ﻛﻴﻒ ﺗﻜﻠﻢ ﻓﻴﻬﻢ .. ﺍﺑﺘﺴﻢ .. ﻗﺎﻣﺖ ﻋﻴﻮﻧﻬﺎ ﺑﻴﺠﻮﺍ ﻓﻌﻴﻮﻧﻪ ﻏﻴﺮ ﻋﻴﻮﻧﻪ ..
🌹 ﺍﺭﺩ ﺍﻟﻴﻪ ﻧﻈﺮﺗﻲ ﻭﻫﻮ ﻏﺎﻓﻞ ... ﻟﺘﺴﺮﻕ ﻣﻨﻪ ﻋﻴﻨﻲ ﻣﺎﻟﻴﺲ ﺩﺍﺭﻳﺎ
ﺷﻮﻳﻪ ﻭﺟﺎﻫﺎ : ﻧﺴﺘﺄﺫﻥ ﻣﻨﻚ ﺳﺎﻋﺘﻴﻦ .. ﻣﻦ ﺯﻣﺎﻥ ﻋﻨﺪﻱ ﻣﺸﻮﺍﺭ ﺿﺮﻭﺭﻱ ..
ﻧﻮﺭﺍﻥ : ok ﻧﺮﺟﻰ ﻓﻴﻚ ..
ﻃﻠﻊ ﺑﺴﺮﻋﻪ ...
ﺗﻨﻬﺪﺕ ﺑﺈﺑﺘﺴﺎﻣﻪ .. ﺷﺒﺤﺖ ﻭﻳﻦ ﻣﺎﻛﺎﻥ ﻣﻘﻌﻤﺰ ﻟﻘﺖ ﻧﻈﺎﺭﺍﺗﻪ ﺧﺪﺗﻬﻢ ﻭﻃﻠﻌﺖ ﻭﺭﺍﻩ ... ﻣﺎﺷﻴﻪ ﺑﺴﺮﻋﻪ ﺍﺩﻭﺭ ﻓﻴﻪ ... ﻭﻗﻔﺖ ﻓﻤﻜﺎﻧﻬﺎ ﻟﻤﺎ ﻟﻘﺎﺗﻪ ﻣﺎﺷﻲ ﻫﻮ ﻭﻟﻤﺎ ﻭﻃﺎﻟﻌﻴﻦ ﻣﻊ ﺑﻌﺾ ..
ﺣﺴﺖ ﺭﻭﺣﻬﺎ ﻗﺮﻳﺐ ﻃﻠﻌﺖ .. ﻟﻔﺖ ﻭﻣﺸﺖ ﺑﺴﺮﻋﻪ ﻟﻤﻜﺘﺐ ﺍﻹﺩﺍﺭﻩ ﺧﺸﺖ ﺳﻜﺮﺕ ﺍﻟﺒﺎﺏ .. ﻭﺩﻣﻮﻋﻬﺎ ﻧﺰﻟﻮﺍ ﺳﻴﻞ ﻉ ﺧﺪﻭﺩﻫﺎ .. ﻭﻓﻤﻬﺎ ﻣﻘﻮﺱ .. ﻭﺣﺎﺳﻪ ﺑﺎﻟﺠﻤﺮﺓ ﺍﻟﻠﻲ ﻉ ﻳﺴﺎﺭ ﺻﺪﺭﻫﺎ ﻳﻠﻬﺐ ...🔥💔
***
ﺑﻌﺪ ﺳﺎﻋﺘﻴﻦ ..
ﻫﻴﺎ ﺍﺗﺼﻠﻲ ﺗﻮﺍ ..
ﺻﻔﺎﺀ ﺑﺮﺑﻜﻪ : ﺑﺎﻫﻲ .. ﺍﺗﺼﻠﺖ ﺑﻨﻮﺭﺍﻥ ..
ﻧﻮﺭﺍﻥ ﺭﺩﺕ : ﺍﻟﻮ ..
ﺻﻔﺎﺀ : ﻧﻮﺭﺍﻥ ﺗﻌﺎﻟﻲ ﻟﻠﻤﺸﻐﻞ ..
ﻧﻮﺭﺍﻥ : ﻟﻴﺶ ..
ﺻﻔﺎﺀ : ﻓﻲ ﺯﺑﺎﻳﻦ ﻭﻗﺎﻟﻮﺍ ﺷﻐﻠﻨﺎ ﻧﺒﻮﻩ ﻓﻤﻮﻋﺪﻩ ﻭﻗﻌﺪﻭﺍ ﻳﻌﻴﻄﻮﺍ ﻭﻳﻬﺰﺑﻮﺍ ..
ﻧﻮﺭﺍﻥ : ﺍﺳﺘﻐﻔﺮ ﺍﻟﻠﻪ ... ﺑﺎﻩ .. ﺷﻮﻳﻪ ﻭﺟﺎﻳﻪ ..
ﺻﻔﺎﺀ : ﻣﺎﺗﺒﻄﻴﺶ ...
ﻧﻮﺭﺍﻥ : ﺑﺎﻩ .. ﺻﻜﺮﺕ .. ﻧﺎﺿﺖ ﻭﺷﺎﻓﺖ ﺍﻟﺴﺎﻋﻪ ﺗﺄﻛﺪﺕ ﺍﻧﻪ ﺣﻴﻌﻄﻞ ﺃﻛﺜﺮ ... ﺗﻨﻬﺪﺕ ﺑﺄﻟﻢ .. ﻭﻃﻠﻌﺖ ﻣﻦ ﻏﺮﻓﺔ ﺍﻹﺩﺍﺭﻩ ﻭﻃﻠﻌﺖ ﻣﻦ ﺍﻟﻤﺴﺘﺸﻔﻰ ﻛﻠﻬﺎ ..
ﻃﻮﻝ ﺍﻟﻄﺮﻳﻖ ﻭﻫﻲ ﻣﺤﺮﻭﻗﻪ ﻭﻣﻨﻈﺮﻫﻢ ﻣﺎﺑﺎﺵ ﻳﺮﻳﺢ ﻣﻦ ﺑﻴﻦ ﻋﻴﻮﻧﻬﺎ .. ﻛﺎﻧﺖ ﺗﺸﺮﺏ ﻓﻲ ﺍﻣﻴﻪ ﺑﺈﺳﺘﻤﺮﺍﺭ .. ﻭﺷﺎﺩﻩ ﺩﻣﻌﺘﻬﺎ ...
ﻭﺻﻠﺖ ﻟﻠﻤﺸﻐﻞ ﻟﻤﺎ ﺧﺸﺖ ﻣﺎﻟﻘﺖ ﺣﺪ ..
ﻧﻮﺭﺍﻥ : ﺻﻔﺎﺍﺍﺍﺀ ... ﻳﺎﺑﻨﺎﺍﺍﺍﺍﺕ ... ﻭﻳﻨﻜﻦ ..
ﺷﻮﻳﻪ ﻭﻃﻠﻌﺖ ﺻﻔﺎﺀ ﻭﻫﻲ ﺗﻜﺮ ﻓﻲ ﻃﺎﻭﻟﻪ ﺑﻌﺠﻼﺕ .. ﻓﻮﻗﻬﺎ ﻃﻮﺭﻃﻪ ﻋﻠﻴﻬﺎ ﺍﻟﺮﻗﻢ ...22
ﺍﻧﺼﺪﻣﺖ ... ﻭﺷﻮﻳﻪ ﻭﺑﺪﻭﺍ ﺍﻟﺒﻨﺎﺕ ﻳﻄﺮﺑﻘﻮﺍ ﻓﻲ ﻫﺬﺍﻛﺎ ﺍﻟﻠﻲ ﻳﻄﻠﻌﻮﺍ ﻣﻦ ﻣﻨﻪ ﺷﻨﺎﺷﻴﺐ ﻳﻠﻤﻌﻮﺍ ﺍﻛﻴﺪ ﺗﻌﺮﻓﻮﻩ "🤣
ﻗﻌﺪﺕ ﺗﻀﺤﻚ ﺑﺼﺪﻣﻪ ... ﺟﻮﻫﺎ ..
ﺩﺍﻟﻴﺎ ﺣﻀﻨﺘﻬﺎ : ﻋﻘﺒﺎﻝ ﺍﻟﻤﻴﻪ ..
ﺑﻌﺪﻫﺎ ﺭﻗﻴﻪ : ﺑﻄﻮﻝ ﻋﻤﺮﻙ ...
ﺷﻮﻳﻪ ﻭﺟﺘﻬﺎ ﺻﻔﺎﺀ ﺗﺠﺮﻱ ﻭﺣﻀﻨﺘﻬﺎ : ﺑﻄﻮﻝ ﻋﻤﺮﻙ ﻳﺎﻗﻠﺒﻲ ..
ﺷﻮﻳﻪ ﻭﺳﻤﻌﻮﺍ ﺻﻮﺕ ﺍﻃﺮﺑﻴﻖ ﺗﺎﻧﻲ ..
ﻧﻮﺭﺍﻥ : ﺩﻭﻭﻭﻭﻭﺳﻪ ..
ﻣﺸﺘﻠﻬﺎ ﺗﺠﺮﻱ ﻭﺣﻀﻨﺘﻬﺎ ﺑﻘﻮﺓ : ﻳﺎﻛﻠﺒﻪ ﻣﺎﻗﺘﻴﺶ ﺑﺘﺮﺩﻱ ..
ﺳﻨﺪﺱ ﺑﻀﺤﻜﻪ : ﺣﺒﻴﺖ ﻧﺪﻳﺮﻟﻚ ﺳﻮﺭﺑﺮﺍﻳﺰ ﻳﺎﺳﻤﺢ ﺍﻧﺖ ...
ﺑﻌﺪﺕ ﻧﻮﺭﺍﻥ : ﻳﺎﺍﺍﻩ .. ﻳﺎﺭﺑﻲ ... ﻓﺮﺣﺘﻦ ﻗﻠﺒﻲ ﻛﻠﻜﻦ ﺍﻟﻠﻪ ﻳﻔﺮﺡ ﻗﻠﻮﺑﻜﻦ . ﻳﺎﺭﺏ .. ﺗﺼﺪﻗﻮﺍ ﻧﺴﻴﺘﻪ ﺑﻜﻞ ﺍﻟﻴﻮﻡ ﻭﺍﻟﺘﺎﺭﻳﺦ ﻭﻛﻞ ﺷﻲ ...
ﻛﻴﻒ ﺍﺫﻛﺮﺗﻦ ..
ﺷﺒﺤﻮﺍ ﻟﺒﻌﻀﻬﻢ ﻭﺳﻜﺘﻮﺍ ﻧﻮﺭﺍﻥ ﺗﺸﺒﺤﻠﻬﻢ ﺑﺎﺳﺘﻐﺮﺍﺏ : ﻛﻨﻜﻦ ﺳﻜﺘﻦ ..
ﺳﻨﺪﺱ : ﺑﺤﺘﻲ ﻓﻲ ﺍﻟﺘﻮﺭﺗﻪ ..
ﻧﻮﺭﺍﻥ ﺷﺒﺤﺘﻠﻬﺎ ﻭﻓﺘﺤﺖ ﻋﻴﻮﻧﻬﺎ ﻉ ﻭﺳﻌﻬﻢ ﺑﺼﺪﻣﻪ ﺑﻌﺪﻳﻦ ﺷﺒﺤﺘﻠﻬﻢ ..
ﻛﺎﻥ ﻣﻜﺘﻮﺏ ﻋﻠﻴﻬﺎ ﻣﻦ ﻓﻮﻕ ..
‏( ﺻﺒﺢ ‏) ...
ﺗﺸﺒﺤﻠﻬﻢ ﻭﺳﺎﻛﺘﻪ .. ﻭﻫﻤﺎ ﻣﺒﺘﺴﻤﺎﺕ ..
ﺳﻨﺪﺱ : ﺍﻇﻬﺮ ﻭﺑﺎﻥ ﻋﻠﻴﻚ ﺍﻷﻣﺎﻥ ...
ﻃﻠﻊ ... ﻭﻓﻴﺪﻩ ﺑﺎﻗﺔ ﻭﺭﺩﻩ ﺣﻠﻠﻠﻠﻮﻭﻭﺓ ﻭﻣﻤﻴﺰﺓ ﻭﺻﻨﺪﻭﻕ ﺻﻐﻴﺮﻩ ﻓﻴﻪ ﻫﺪﻳﻪ ...
ﻧﻮﺭﺍﻥ ﺗﺸﺒﺤﻠﻪ ﻭﺧﻼﺹ ﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ﻣﺶ ﻣﺼﺪﻗﻪ ﺑﻜﻞ ..
💙 ﻧﻮﺭﺍﻥ ..
ﻣﺶ ﻋﺎﺭﻓﻪ ﻛﻴﻒ ﻧﻮﺻﻔﻪ ﺷﻌﻮﺭﻱ .. ﺑﺲ ﻧﺒﻴﻜﻦ ﺗﺤﻄﻦ ﺭﻭﺍﺣﻜﻦ ﻣﻜﺎﻧﻲ ﺍﻟﻠﻲ ﺗﺤﺴﻦ ﺑﻴﻪ ﻓﻬﺎﻟﻠﺤﻈﻪ ﻫﻮ ﻧﻔﺴﻪ ﺍﻟﻠﻲ ﺣﺴﻴﺖ ﺑﻴﻪ ..
ﺳﻨﺪﺱ : ﻛﻠﻤﻨﻲ ﺍﻟﺒﺎﺭﺡ ﻓﻲ ﺍﻟﻠﻴﻞ ﻭﻋﻠﻢ ﺑﻴﺎ ﻣﺮﻭﺣﻪ ﻣﻦ ﻭﻳﻦ ﻣﺶ ﻋﺎﺭﻓﻪ .. ﺍﻟﻤﻬﻢ ﻭﺍﺗﻔﻖ ﻣﻌﺎﻳﺎ ﻉ ﻛﻞ ﺷﻲ ..
ﺻﻔﺎﺀ : ﻭﻭﺻﺎﻫﺎ ﺗﺨﺒﺮﻧﺎ .. ﻟﻪ ﺳﺎﻋﺘﻴﻦ ﻫﻨﺎ ﻳﻮﺗﻲ ﻣﻌﺎﻧﺎ ﻓﻲ ﺍﻟﻤﻔﺎﺟﺎﻩ ﺍﻟﻠﻲ ﻳﻜﻮﻥ ﺻﺎﺣﺐ ﻓﻜﺮﺗﻬﺎ ..
ﻛﻤﺎﻝ ﺑﻀﺤﻜﻪ : ﻋﻄﻮﻧﻲ ﺍﻟﻤﺎﻳﻚ ..
ﺿﺤﻜﻮﺍ ..
ﻛﻤﻞ ﻭﻗﺎﻝ : ﻋﺎﺭﻓﻪ ﺑﺴﻴﻂ .. ﻭﻣﺎﻓﻲ ﺣﺪ ﻳﺤﺘﻔﻞ ﺑﻌﻴﺪ ﻣﻴﻼﺩﻩ ﺍﻟﺴﺎﻋﻪ 2 ﺍﻟﻈﻬﺮ .. ﺑﺲ ﺯﻱ ﻣﺎﺗﻌﺮﻓﻲ ﺍﻟﻴﻮﻡ ﺑﺎﻟﺬﺍﺕ ﻣﺴﺆﻭﻟﻴﺎﺗﻲ ﺯﺍﺩﺕ ... ﻭﺯﻳﺎﺩﻩ ﻋﻨﺪﻱ ﻋﻤﻠﻴﻪ ﺑﻌﺪ ﺍﻟﻤﻐﺮﺏ .. ﺣﺒﻴﺖ ﻧﺪﻳﺮ ﺍﻟﻠﻲ ﻧﻘﺪﺭ ﻋﻠﻴﻪ .. ﺇﻥ ﺷﺎﺀ ﺍﻟﻠﻪ ﺗﻜﻮﻥ ﺣﻠﻮﺓ ﺍﻟﻤﻔﺎﺟﺄﺓ ..
ﻧﻮﺭﺍﻥ ﺍﺑﺘﺴﻤﺖ ﻭﺩﻣﻌﺘﻬﺎ ﻧﺰﻟﺖ : ﺣﻠﻮﺓ .. ﻭﺍﺟﺪ .. ﻭﺍﺍﺍﺟﺪ .. ﻭﻗﻌﺪﺕ ﺗﺒﻜﻲ ...
ﺣﻂ ﺍﻟﻠﻲ ﻓﻴﺪﻩ ﻭﺟﺎﻫﺎ .
ﻛﻤﺎﻝ : ﺻﺒﺢ ... ﺍﻧﻲ ﻧﺒﻲ ﻭﺟﻬﻚ ﻳﻀﺤﻚ ... ﺻﺒﺢ ﺍﺷﺒﺤﻴﻠﻲ ..
ﺍﻟﺒﻨﺎﺕ ﻳﺸﻮﻓﻠﻬﻢ ﻭﻗﺮﻳﺐ ﻳﻬﺒﻠﻮﺍ ﻋﻠﻴﻬﻢ 😍😍😍😍..
ﻧﻮﺭﺍﻥ ﺷﺒﺤﺘﻠﻪ ..
ﻛﻤﺎﻝ ﻋﻄﺎﻫﺎ ﻛﻠﻴﻨﻜﺲ .. ﺧﺪﺍﺗﻪ ﻗﺎﻟﻠﻬﺎ : ﻣﺎﻧﺒﻴﺶ ﺗﺸﻮﻓﻬﻢ ..
ﻗﻌﺪﺕ ﺗﻤﺴﺢ ﻑ ﺩﻣﻮﻋﻬﺎ ..
ﻛﻤﺎﻝ ﺍﺑﺘﺴﻢ : ﺍﻳﻮﻩ ﺧﻠﻲ ﺍﻟﺼﺒﺢ ﻭﺟﻬﻪ ﺻﺒﻮﺡ ﺯﻱ ﻣﺎﻧﻌﺮﻓﻪ ..
ﺻﻔﺎﺀ ﺑﻬﻤﺲ : ﻳﺎﺑﻨﺎﺕ ﺭﺑﻲ ﻳﻜﻮﻥ ﻓﻲ ﻋﻮﻧﻬﺎ ..
ﺩﺍﻟﻴﺎ : ﺍﻫﺎ ﺍﻧﺎ ﺣﺎﺳﻪ ﺭﻭﺣﻲ ﺑﻨﺪﻭﺥ ﻣﻨﻪ ﻭﻣﻦ ﻛﻼﻣﻪ ..
ﺭﻗﻴﻪ : ﺍﺭﻓﻖ ﺑﻘﻠﺒﻬﺎ ﻳﺎﺃﺑﻦ ﺍﻹﻳﻪ ﻳﺎﺳﺮ ..
ﺳﻨﺪﺱ ﺗﺴﻤﻊ ﻭﺗﻀﺤﻚ ﻋﻠﻴﻬﻢ ...
ﻧﻮﺭﺍﻥ ﺍﺑﺘﺴﻤﺖ : ﺍﻣﻤﻢ .. ﻛﻴﻒ ﻋﺮﻓﺖ ..
ﻛﻤﺎﻝ : ﺍﻧﺘﻲ ﻗﻠﺘﻴﻠﻲ ﻉ ﺗﺎﺭﻳﺦ ﻣﻴﻼﺩﻙ ﻗﺒﻞ ﻧﺴﻴﺘﻲ ..
ﻧﻮﺭﺍﻥ : ﻭﻗﺎﻋﺪ ﺑﺒﺎﻟﻚ ﻣﻦ ﻭﻗﺘﻬﺎ ..
ﻛﻤﺎﻝ ﺍﺑﺘﺴﻢ : ﻓﻲ ﺣﺎﺟﺎﺕ ﻣﺎﺗﻨﺘﺴﺎﺵ ..
ﺷﺒﺤﺘﻠﻪ ﻭﻫﻮ ﻳﺸﺒﺤﻠﻬﺎ ..
ﺩﺍﻟﻴﺎ : ﻫﻴﺎ ﺑﻮﺳﻮ ﺑﻌﻀﻜﻢ ..
ﺻﻔﺎﺀ : ﻳﺎﻋﻦ ﺷﻜﻠﻚ ﻳﺎﺳﺨﻴﻔﻪ .. ﺗﺤﺴﺎﺑﻲ ﺭﻭﺣﻚ ﺗﻔﺮﺟﻲ ﻉ ﻣﺴﻠﺴﻞ ﺗﺮﻛﻲ ..
ﺭﻗﻴﻪ ﻭﺳﻨﺪﺱ ﻳﻀﺤﻜﻮﺍ ..
ﺻﻔﺎﺀ : ﻫﻴﺎ ﻳﺎﺟﻤﺎﻋﻪ ﺍﻟﺸﻤﻊ ﺫﺍﺏ ﻉ ﺍﻟﺘﻮﺭﺗﻪ ..
ﺍﻟﺘﻔﺘﻮﺍ ﺍﻟﺰﻭﺯ ﻭﺿﺤﻜﻮﺍ ..
ﻣﺸﺖ ﻧﻮﺭﺍﻥ ﻭﻗﻔﺖ ﻭﻭﻗﻒ ﻗﺒﺎﻟﺘﻬﺎ ﻭﺧﻼ ﺻﺎﺣﺒﺎﺗﻬﺎ ﻳﻮﻗﻔﻮﺍ ﺣﺪﺍﻫﺎ .. ﻏﻨﻮﻟﻬﺎ .. ﻭﺑﻌﺪﻳﻦ ﻃﻔﺖ ﺍﻟﺸﻤﻊ ..
ﺑﺼﺮﻭﺍ ﻋﻠﻴﻬﺎ ﻭﻫﻲ ﺗﻀﺤﻚ ﻭﻣﺎﻓﻴﺶ ﺍﺳﻌﺪ ﻣﻨﻬﺎ ﻓﻬﺪﻳﻜﺎ ﺍﻟﻠﺤﻈﺎﺕ ..
ﻭﻫﻮﻛﺎﻥ ﻳﺘﺄﻣﻞ ﻓﻴﻬﺎ ﻭﻗﻠﺒﻪ ﻓﺮﺣﺎﻥ ﻟﻔﺮﺣﺘﻬﺎ 💖..
ﺑﻌﺪ ﺷﻮﻳﻪ ..
ﻛﻤﺎﻝ : ﺗﻔﻀﻠﻲ ﺣﺎﺟﻪ ﺑﺴﻴﻄﻪ .. ﻣﺶ ﻣﻦ ﻗﻴﻤﺘﻚ ..
ﻧﻮﺭﺍﻥ : ﺍﺍﻟﻠﻲ ﺩﺭﺗﻪ ﺍﻟﻴﻮﻡ ﺍﺣﻠﻰ ﻫﺪﻳﻪ ..
ﺍﺑﺘﺴﻢ : ﻫﻴﺎ ﻻﺯﻡ ﻧﻤﺸﻲ .. ﺧﻠﻴﻚ ﻣﻊ ﺻﺤﺒﺎﺗﻚ .. ﻧﻌﺮﻑ ﻧﺘﺼﺮﻑ ..
ﻧﻮﺭﺍﻥ : ﻭﻟﻬﺎﻟﺴﺒﺐ ﺍﺧﺘﺮﺗﻚ ..❤
ﺍﺑﺘﺴﻢ : ﺑﻄﻮﻝ ﻋﻤﺮﻙ ﻉ ﺍﻟﻄﺎﻋﻪ ..
ﻧﻮﺭﺍﻥ : ﺁﻣﻴﻦ .. ﺗﺴﻠﻢ ..
ﻛﻤﺎﻝ : ﺳﻼﻡ ... ﺭﻓﻊ ﻳﺪﻩ ﺳﻼﻡ ﺻﺒﺎﻳﺎ ..🖐
ﻫﻤﺎ ﺭﺩﻭﺍ : ﺳﻼﻡ 🖐🐽񴆐🖐😍😍😍😍
ﻃﻠﻊ .. ﻭﻫﻲ ﺗﻨﻬﺪﺕ ﻣﻦ ﻗﻠﺒﻬﺎ ﻭﺍﻟﺘﻔﺘﺖ ﻭﻗﺎﻟﺖ :
" ﻧﺤﺒﻪ .."💓
ﺿﺤﻜﻮﺍ ﻭﻫﻤﺎ ﻳﺸﺒﺤﻠﻮﺍ ﻟﻌﻴﻮﻧﻬﺎ ﺍﻟﺪﺑﻼﻧﻪ ﻣﻦ ﺍﻟﻬﻴﺎﻡ 💓💓💓
ﻳﻮﻣﻬﺎ ﺭﻭﺣﺖ ﻣﻦ ﺍﻟﻤﺸﻐﻞ ﺑﻌﺪ ﺍﻟﻤﻐﺮﺏ ..
ﻭﺃﻭﻝ ﻣﺎ ﺧﺸﺖ ﻟﻠﻔﻴﻼ ﺩﺍﺧﻞ ﺍﻧﺼﺪﻣﺖ ﺑﻤﻔﺎﺟﺄﺓ ﺗﺎﻧﻴﻪ ﻛﺎﻧﻮﺍ ﻣﺠﻬﺰﻳﻨﻬﺎ ﺭﻳﻬﺎﻡ ﻭﻋﻤﻬﺎ ﻭﺗﺸﺎﺭﻙ ﻣﻌﺎﻫﻢ ﻓﻴﻬﺎ ﺍﻟﻨﺎﺱ ﺍﻟﻠﻲ ﺗﺤﺒﻬﻢ ﺷﻬﺎﺏ ﻭﺳﺎﺭﺓ ﻭﺣﺘﻰ ﻧﺒﻮﻳﻪ ..
ﻫﺬﺍﻛﺎ ﺍﻟﻴﻮﻡ ﻛﺎﻥ ﺍﺳﻌﺪ ﺍﻳﺎﻡ ﺣﻴﺎﺗﻬﺎ ﺑﻜﻞ ﻣﻌﻨﻰ ﺍﻟﻜﻠﻤﻪ ... ﻛﺎﻧﺖ ﺍﺳﻌﺪ ﻣﻦ ﺧﻠﻖ ﺭﺑﻲ ﺍﻟﺴﻌﺎﺩﻩ ﻓﻲ ﺍﻗﺼﻰ ﺣﺪ ﻟﻴﻬﺎ ﻋﺎﺷﺘﻬﺎ 💖...
🍁🍁🍁
ﺍﻟﺴﺎﻋﻪ 12 ﻟﻴﻼ
ﻃﻠﻌﺖ ﻗﺪﺍﻡ ﺍﻟﺒﺎﺏ .. ﻟﻘﺖ ﺍﻛﺮﻡ ﺧﺎﺵ ...
ﻟﻤﺎ ﺷﺎﻓﻬﺎ ﺍﺑﺘﺴﻢ ﻭﺟﺎﻫﺎ ..
ﻧﻮﺭﺍﻥ : ﻭﻳﻨﻚ ﻓﻘﺪﺗﻚ ..
ﺍﻛﺮﻡ : ﺍﻧﺸﻐﻠﺖ ﺷﻮﻳﻪ ..
ﻃﻠﻊ ﻣﻦ ﺟﻴﺒﻪ ﺑﺎﻛﻮﺍ ﺻﻐﻴﺮ ...
ﺍﻛﺮﻡ : ﺣﺎﺟﻪ ﺑﺴﻴﻄﻪ ..
ﻧﻮﺭﺍﻥ ﺍﺑﺘﺴﻤﺖ : ﺍﻧﻚ ﺍﺫﻛﺮﺗﻨﻲ ﺑﺎﻟﻬﺪﻳﻪ ﻫﺎﺩﻱ ﺑﺮﻭﺣﻬﺎ ﺣﺎﺟﻪ ﻛﺒﻴﺮﺓ ﻭﺍﺟﺪ ﻋﻨﺪﻱ ..
ﺍﺑﺘﺴﻢ : ﺗﺴﻠﻤﻲ .. ﺑﻄﻮﻝ ﻋﻤﺮﻙ ..
ﻧﻮﺭﺍﻥ : ﺗﺴﻠﻢ ..
ﺍﻛﺮﻡ : ﺧﺸﻲ ﺟﻮﺍ ﺻﻘﻊ ..
ﻧﻮﺭﺍﻥ ﺑﺈﺑﺘﺴﺎﻣﻪ : ﺣﺎﺿﺮ .. ﺗﺼﺒﺢ ﻉ ﺧﻴﺮ ..
ﺍﻛﺮﻡ : ﻗﺪﺍﻣﻚ ﻛﻞ ﺧﻴﺮ ...
ﻟﻔﺖ ﻭﺧﺸﺖ ﻭﺭﻛﺘﺐ ﺍﻟﺪﺭﻭﺝ ﻭﻫﻲ ﻓﻲ ﻏﺎﻳﻪ ﺍﻟﺴﻌﺎﺩﻩ .. ﺧﺸﺖ ﻟﺪﺍﺭﻩ ﻭﻣﺸﺖ ﻗﻌﻤﺰﺕ ﻉ ﺳﺮﻳﺮﻫﺎ ... ﺗﺸﺒﺢ ﻟﻬﺪﻳﻪ ﻛﻤﺎﻝ ﻭﺃﻛﺮﻡ ..
ﻓﺘﺤﺖ ﻫﺪﻳﻪ ﺍﻛﺮﻡ .. ﻟﻘﺘﻬﺎ ﺑﺮﻭﺵ ﻓﻀﻪ ﺣﻠﻮﻫﻠﺒﻪ .. ﻉ ﻫﻴﺌﻪ ﻭﺭﺩﺓ ... ﻋﺠﺒﻬﺎ ﻟﻴﻦ ﺧﻼﺹ ..
ﺭﺩﺍﺗﻪ .. ﻭﻓﺘﺤﺖ ﻫﺪﻳﻪ ﻛﻤﺎﻝ ... ﺗﻔﺎﺟﺌﺖ .. ﻭﺷﺎﺡ ﺣﺮﺍﻳﺮﻱ ﺣﻠﻮ ﺍﺳﻮﺩ ﻭﻓﻴﻪ ﻭﺭﺩ ﺍﺣﻤﺮ .. ﻋﺠﺒﻬﺎ ﻟﻴﻦ ﺧﻼﺹ ..
ﺣﻀﻨﺖ ﺍﻟﻮﺷﺎﺡ ﻭﻫﻲ ﻣﻐﻤﻀﻪ ﻋﻴﻮﻧﻬﺎ .. ﻭﺗﻐﻨﻲ ..
🎶 ﻋﻘﺒﺎﻟﻚ ﻋﻴﺪ ﻣﻴﻼﺩﻙ ﻟﻤﺎ ﺗﻨﻮﻝ ﺍﻟﻠﻲ ﺷﻐﻞ ﺑﺎﻟﻚ ..
ﻳﺎﻗﻠﺒﻲ ﻳﺎﻗﻠﺒﻲ ﻋﻘﺒﺎﻟﻚ ﻳﺎﻗﻠﺒﻲ ..
.... ﻳﺘﺒﻊ ....