وقفوا مقابلين بعضهم والعينين جمرة تقدح نار..غل وحقد دفين ولدو الابتزاز والكره الأعمى وقت يتحط صغيرك في الوسط و تتشد من اليد اللي توجعك ...
تكلم بو اشرقت قبل:
-ويني بنتي؟؟نشوفها قبل و تتسلم...
تبسم لاخر بسخرية:
.-بنتك في الحفظ والصون تسلم تتسلم...
حط ايديه في مكاتبو بتبوريب:
-مانيش صغير ولا نرضع في صبعي...في اتفاقيات سلم واتسلم الرهينة تتوجد...ويني بنتي؟؟؟ تكلم قبل لا نهدها عليك...
شاور براسو لراجل من رجالو هز التليفون ووراه سيكونس فيها اشرقت قاعدة في البيت وتغزر بطريقة مخدومة ما تشككش...
-تسلمنا سلعتنا بنتك تجيك توة...
شاور لطفي لرجالو مدلو واحد منهم شكارة متوسطة شدها وقلو قبل ما يرميهالو:
-قبل ما تاخذها اقتل الكلب اللي وراك...عميل يا بهيم غر بيك وباعك وبايعنا...
تلفتلي و عينيه تقدح شر وصوب سلاحو في وجهي...
تبسمت ببلادة وانا شام ريحة الموت عمال وتقرب مني...
-زكيم...قتل بنتك...اللي هي مرتي...
مع حلة عينيه وتلفيتة دجو لي وكلامي تشبر السلاح و تنزل عالزناد و انطلقت المجزرة...فيها ريحة الدم و لعبت سكاكن الحقد و الثار و نار الغيرة عالبلاد ... مجزرة بينهم ورجالنا من وراهم دايرين بيهم... سلاحي في يدي نضرب وعيني تمسح في المكان والمضروبين
ونصيح باعلى صوتي:
-لطفي لا...حاجتنا بيه حي...
كنت نصيح ونذكر...و غدرني هو اللي نوصي عليه بكرطوشة...لولى....حليت عيني مش مصدق...عاود بالثانية قبل لا يضربوه رجالنا...طحت على ركايبي
ونغزرلو...غمضت عيني على منظرو كرطوشة في راسو بالضبط...غمضت عيني مرتاح ومتهني.... تبسمت وانا نتذكر في مجنونتي...ما صابني مت بين ايديها لاني احلى موتة وقت تسكر عينيك على ملامح اللي تحبو....تلوحت واخر كلامي اشرقت...
اشرقت:
عهدي بروحي نعافر في عبدو...واخر حاجة ابرة ترشقت في قلبي بالضبط...فقدت الاحساس...ابرة اخرى...دوخة ودنيا مضببة...حس باطو وامواج بحر...
حليت عيني في بيت كلها ابيض...دوا معلق و ماكينة تخطيط قلب قاعدة ترسم في خطوط بانتظام مع حس دقات منتظمة...تاعبة ولا قادرة نحرك في روحي عظم...بدني بكلو مدقدق ووجيعة قلبي كملت علي...
وقت تذكرتو دمعي نفر و قلبي تضغط ضغطة متاع موت وليت نلهج ونجبد في النفس بالسيف...البيت ضياقت علي و قلبي عمال و يتعصر والماكينة تزمر بالقوي...طبة يجروا في الكلوار....و عهدي بروحي كنت نغزر...
راسي ثقيل وجفوني رزان...يد شادتني من يدي...يد نعرف ملمسها معروقة خشينة كلاها التعب ومرمدتها الخدمة وحنينة حن مالقلب للقلب....وشكون ما يعرفش امو حتى لو عينيه مغمضة؟؟؟ نجنوج بجنبي شادتلي يدي وتبكي من غير صوت...حليت عيني على شوفتها وتبسمت بتعب:
-نجوتة ما تبكيش...دمعك غالي....
شرقت بالغصة تبكي وما نجمتش تتكلم...مشوار وانا نهدي فيها...
-يزي عيش امي...لباس...ما تبكيش...
-يا بنت الحروف عملت اللي في راسك...سمعت كلام راسك...اللي ما يسمع كلام كبيرو الهم تدبيرو...
-باقي تخرنن ....امي صفي قلبك عاد...
-استني تشدي روحك تو نقلك....مقلاة اليويو تستنى فيك...
ضحكت بالسيف وامي تبوس في وتعاود...
-حمد الله عليك بنيتي...حمد لله على سلامتك...
-أمي كيفاش جيت وشكون جابني؟؟؟و عبدو كيفاش عرفك واش قلك؟؟؟
-ميمة اسكت توة وارتاح راك منعت ببركة ربي...شد روحك وبعد تو تعرف كل شي...
عديت نهيرات و كتبلي الطبيب على خروج...روحت انا وامي وانا كل ما نسالها تتهرب مني حتى مكني الفضول علخر ونستنى وقتاش نروحوا بش تفهمني...
وصلنا لدارنا تمديت وغطاتني امي وقتلي:
-نمشي نطيبلك حويجة سخونة تدفيك...
شديتها من يدها حاسمة الأمر:
-امي يزي ما هربت...انا لباس توة وقلبي لباس...اقعد واحكيلي ما فماش مهرب...خليني نفهم...راني بش نهبل...الراجل اللي حبيتو وخذيتو وفي بالي ظهري وسندي نتحامى فيه غدرني وهزني للمافيا بايدو وزرقلي بايدو....راهو قتلني بالحياة...امي-و شدتني البكية ودموعي تتسابق وما نجمتش نشدها نتكلم والعبرة خانقتني...-امي بالله تكلم...راني وفيت قبل ما نبدا....
ولات تبكي معاي وشدتلي ايدي وقعدت تحكي في الحقيقة اللي كانت صدمة عمري:
- بنيتي جاني تليفون...هزيت صوت راجل قلي راني الرائد عماد ...راني عرفت بنتك وراهي بش تتورط في صفقات غبرة مع المافيا وراهو بوها هو زميمهم....قلي نحب نحمي اشرقت وطالب نعرس بيها قبل لا تتورط....بنيتي دخلت في غولة....قلي أو يجيك شكون يفهمك ويفسرلك...نطلبك العشية وهي معاي تسمعني ردك...قعدت داخلة بعضي ندادي... توضيت وصليت وقعدت ما حاملتني ارض ولا طايقتني سما...حتى دق بابي راجل جابلي تصاور ليك و ليه فهمني...قتلو على الظالين امين... هذا اللي صار
بقيت حالة فمي يعني انا كنت دغفة وهو كان مالحاكم وفي مهمة وانا دخلت عالخط....يعني خذيت عبودة طلع عمدة!!!!...يعني كنت بهالية في النازلة😵😵..هبلت سايي ودخلت في حيط....مازلت نخمم والباب دق....#منو
✴✴✴✴
أنت تقرأ
⛺غربة عشاق⛺
Romanceبيب بيب وسعو?😎💀👿👹رجعتلكم بكرونيك ناار 🔥🔥🔥كرونيك صاروخ 🚀♨قصة عسل🔞🔞😗😘👀 موضوع مشوق 💋👄أحداث جريئة غير متوقعة 👫💏 أفكار غير مألوفة 😥😆😉 الكاتبة متاعها تميزت بأسلوبها الفريد 😘😗 عندها قلم مبدع 😍😋ديما تبحث على المواضيع الجديدة 👍👍❌تب...
