بره الدنيا

بارت 1

""أنا الآن في أسوأ حالاتي فلا تخدعك ابتسامتي .. إنها مزيفة ،، ولا يخدعك اتزاني .. فإن كُل شيء بي يميل ..🖤""

_سبيل .. سبيل .. يا سبيييييل
سبيل : ايه يابنتي في ايه؟
_ اسراء: سرحانة في ايه ؟
سبيل: مش سرحانه عادي
_اسراء: لا يا شيخه؟ عايزه تقنعيني انك لسه مش بتفكري في دكتور خضر بتاعك دا
سبيل : صعبان عليا .. بيقولوا الحادثة اللي عملها صعبه .. بقاله اسبوع ولسه في الغيبوبة ..
وكملت بتردد : نفسي اروح اشوفه
اسراء بصراخ : يا الله يا ولي الصابرين .. هو ربنا يشفيه ويرجعه لمراته وعياله وكل حاجه بس انا عايزاكي تلاحظي بس مجرد ملاحظة بسيطة أنه ميعرفش انك عايشه على الكوكب اصلا .. دكتورك في الجامعه اللي عنده حوالي 40 سنه وميعرفش حد من الدفعه اصلا ف فوقي كده يا حبيبتي وبعدين ماهو دكتور محمد دكتورك برضه وكان معاه في نفس الحادثه وفي نفس الغيبوبة برضه .. ماسألتيش عليه ليه ؟
_ سبيل بتلعثم: ما انا زعلانه عليه من جوايا برضه علي فكرة وعلي فكره بقي خضر معندوش 40 سنه وشكله اصغر من كده عشان تبقي عارفه بس ..
_ اسراء بتشد شعرها بضيق وبعدين بتهدي لما تشوف علامات الحزن علي وش سبيل وتسألها : لسه برضه عندك مشاكل في البيت؟
سبيل بتنهيدة :وهي المشاكل بتخلص؟

قطع كلامهم وصول القطر اللي هيركبوه ف وقفوا يستعدوا عشان يركبوا بسرعه في الزحمة دي ..

***************
سبيل بضيق : انا مكنتش عايزه اركب القطر .. مفيش مكان نقعد فيه من الزحمة اهو وانا مبحبش اقف ..
اسراء: تغيير يا بائسة انتي والقطر بيبقي فيه بهجة كده
_سبيل : انا مش عايزه بهجة انا عايزه ارتااااح
اسراء: اخرسي بقي الناس بتبص علينا بسبب...

*فجأة بيحسوا بحاجة خبطت القطر وهزته جامد .. القطر فضل يتحرك يمين وشمال وسط صراخ الناس جواه .. لحد ما اتقلب ووقع بالناس جامد وو ....

**********************

سبيل بتفتح عينيها بألم وهي بتحط ايديها علي دماغها .. حاسه بصداع .. بتفتكر القطر اللي وقع فبتقوم مخضوضة بس بتتخض اكتر لما بتلاقيها نفسها في صحراء ..!! كانت واقفه لوحدها في نص الصحراء ..!!
وقفت مخضوضة بتتلفت حواليها  لحد ما حست انها دايخة وقعدت علي الارض .. سندت رأسها علي ايديها وغمضت عينيها بتعيد الأحداث .. القطر اللي وقع .. الناس اللي وقعت فوق بعض .. الصراخ وذعر .. وآخر حاجه لما رأسها اتخبطت في جزء حديدي وهي بتقع وبعدها بتفقد الوعي وبتفوق هنا ..

حست فجأة بخطوات قريبة .. وقفت بسرعه واتفاجئت براجل راكب حصان وجاي ناحيتها ..!!

اتخضت الاول وبعدين وقفت مستنياه ..

الرجل : من انتي ؟
سبيل : هااا
الرجل : من انتي ؟
سبيل : ان .. ان .. انا سبيل
الرجل : من اين انتي يا فتاه ؟ أأنتي غربية؟
سبيل : اه نعم غريبة
الرجل : من اين قدمتِ إلينا؟
سبيل : انا من سوهاج بس مش عارفه جيت هنا ازاي .. هو احنا فين ؟
الرجل : ماذا تقولين ؟
سبيل : هو انت بتتكلم كده ليه؟

الرجل بيبصلها بإستغراب ف بتبدأ هي تتكلم بالفصحى لحد ما تفهم في ايه

سبيل : لا اعلم كيف أتيت الي هنا لكني من محافظة اسمها سوهاج
الرجل بإستغراب : سوهاج ؟ ما هذا الاسم ؟!
سبيل بتبصله بإستغراب وتسأل : اين نحن ؟
الرجل : نحن في ارض النجاة
سبيل : ما هذا .. لا افهم
الرجل : تعالي معي أولاً لآخذك الي بيت الضيافة لأن لدي بعض الأعمال الهامة لإنجازها وهناك ستجدين من يشرح لكِ ماتريدين

سبيل بتبصله بتردد وبتفكر .. معندهاش اختيار هي مش عايزه تفضل هنا لوحدها .. وبعدين بتركب وراه الحصان ..

******************

عدت حوالي ساعه تقريباً قبل ما يدخلوا مدينة .. كان شكلها غريب شويه .. أو بمعنى أصح مش لايقه علي بعضها .. تحس انهم جمعوا كل مجموعة ناس من مكان معين وحطوهم في البلد دي يعيشوا مع بعض ..

قطع تأمل سبيل صوت الرجل وهو بيقولها تنزل تقف لحد ما ينادي علي واحده هتوصلها بيت الضيوف ..

وقفت سبيل تتفرج على الناس لحد ما شافت ..

* يُتبع ..... *

#بره_الدنيا
#لريم ايمن
#Reem_Ayman