⛺غربة عشاق⛺

😉الحلقة 42...😉

الدقات علات وامي مشات تشوف شكون وانا باقي مسهمة...شبيني ما فقتش؟؟؟كيفاش نجم يمثل ويعديها علي؟؟؟ مخي يهز ويجيب وامي تعيط:
-اشرقت اخرج فمة شكون حاجتو بيك...
لبست شلاكتي وخرجت نسايس في روحي...نلقى قدامي راجل واقف سيفيل:
-تفضل اش حاجتك؟؟
-مدام اشرقت حرم عماد الدين سالم؟؟؟
-شكون حرم شكون؟؟؟يا ولدي ما نعرفوش...
-من فضلك مدام مش وقت فدلكة وماناش نلعبوا...
غدوة العشرة متاع الصباح تجيك كرهبة تهزك بش تتسلم....
قلبي عزق في وسط ضلوعي وكبشت في امي والباب
-اش نتسلم؟؟؟
-البركة فيك مدام...تتسلم جثمان حضرة الرائد....
ما نعرفش اش جرالي بعدها ولا نحب نفيق ولا نسمع ولا نشوف...ولا نحب نسترجع وعيي اصلا....نحب نفقد ذاكرتي و ننسى ...نحب نحلهم نلقى روحي في منامة كذابة....امي تبكي بحذاي على سعد بنتها الراقد
وانا فايقة ومانيش فايقة....نسترجع في الذكريات اللي عشتها معاه...ضحكاتنا دكو بلادتي....بوساتو ولمساتو وهمساتو...ضعت و مت بالحياة....شي ما ينجم يقول احساسي دمعي تحجر وقلبي يتنفض من داخل ودعت الضحكة وفارقت الحياة في الدنيا... كينو ما كاتبلي كان ايامات حلوة عشتها مع عبدو تنهي حياتي بنهايتها...حبو تخزن مع كم الحزن و لساني يتلجلج ولا يقدر يعبر بكلمة...يا ريتو حي ونعاركو ونلومو أما يبوسني ويرضيني...يا ليتو حي نفش فيه غيظي ونضربو على صدرو وبعد نترمى عندو ويعنقني...يا ريتو بجنبي نقلو اللي انا كرهتو اما نحبو....غدرني مرة بحياتو وغدرني بمماتو...كلام كلو يدور عندي ولا نجمت نخرج حرف ولا تنهيدة ولا دمعة...بت في ليلة ما يعلم بيها كان اللي خلقني كينك رميتني في وسط نار بايتة قايدة ونتحرق فيها...
لا كلينا لا غمضنا ولا حتى شربة ماء....ضوات الدنيا وانا قلبي ظلمة لا نجمت نلبس ولا حتى ناقف رمات امي جلباب علي وفولارة وشلاكتي وخرجنا لكرهبة لبرا...ركبنا وساق بينا في سكات...وقفت قدام ادارة كبيرة وعلم تونس يرفرف...دخلنا لبيرو فيه راجل كبير وقف وسلم علينا وانا كالصمبة كل ىشي في عاطل ومتبلد واحاسيسي تكلست...مد جواب لامي وخرج يمشي قدامنا لساحة صغيرة...عايلة قدامي مرا كبيرة مذخمة تبكي ومعاها زوز بناتها....شوية ووصلت كرهبة كبيرة فيها زوز صنادق... تمد لاول عليه علم تونس وتحط في وسط الساحة ولاخر عرفت من بعد صندوق بابا...
جرات المرا وبناتها وترمات عالصندوق وانا ساقي يبست و ما نجمتش نتحرك...شدني هاك الراجل الكبير اللي على تأثرو هزني للصندوق وقت وصل وقف وتكلم:
-البركة فيكم مدام...نعرف مصابكم كبير أما تشددوا...
مات بطل وشهيد الوطن...فخر ليكم ولينا...تونس عزيزة باولادها ورجالها...واليوم ولدكم و غدوة ولدي...
خلالكم مرتو وعلى اسمو....مدام اشرقت حرم المرحوم عماد الدين سالم...
هزوا عيونهم بهاتين...العيون المملية دمع و ووجيعة وقهر...ماناش في وضع متاع سلام ولا كلام أما واجهني الرفض في عينيهم والتكذيب...امو تكلمت:
-ولدي مات عازب...لا خطبتلو لا عرستلو...
تكلم الراجل:
-احنا خطبنالو وخذينالو...كل شي تم بموافقتنا وعلمنا هي مرتو على سنة الله ورسولو لذا بش تواكب مراسم الدفن من اولها لاخرها من غير حتى اعتراض...
طبست تبكي على الصندوق...أما باينة من اولها نفور...
قعدت انقل رغي نظري بينها وبين الصندوق...هزونا وهزوه دارهم تملا وتفرغ بالناس....تصاورو بالزي مالية الدار وحيوطها...دخلوه وخرجوه للجبانة مشيت مع الدفانة ودفنتو معاهم...نغزر لهم يهبطوا فيه وانا باقي لا كلام لا سلام...وقت ذروا التراب يرجعوا فيه عليه وقتها صحت صيحة تهز جبال وطحت ساكتة...
اشرقت وعبدو حكاية وفات قبل ما تبدا...وتكتب موتي بموتو...ودعت الدنيا وظلمت جنباتي ووفات حياتي...
عديت مدة فاقدة الوجود...جهامة على وجه الارض نمشي نزور قبرو نبكي نبكي ونروح...هذيكا عيشتي...
حتى نهار قررت نمشيلهم نحب ناخذ تصويرتو نبرد قلبي بشوفتها...لبست ومشيت في تاكسي وصلت للعنوان المطلوب نوقزت واستنيت شوية حتى حلت الباب اختو سلمت علي بالبوس ودخلتني...نلقى امو ممدودة وتغطية باينة مريضة في حالة غزرتلي بحقرة و غش:
-شنوة للا جيت تحب تورث؟؟؟
صدمتني أما فيسع تمالكت روحي:
-لا..نحب تصويرة لعبدو تي لعماد الله يرحمو...كهو ما حاجتي بشي....
-برا تفرج فيه في تصاور عرسك...ولا قول هربت بيه هروب انت اش من تصاور...ما عنديش تصاور...ولدي لي وحدي وولدي مات عازب لا عرس لا عندو مرا...
هنا الضعف اللي عندي تمحى و تقويت على روحي:
-انا مرتو وباسمو حبيت ولا كرهت....
-تتقبح وترد وتطول في لسانك...اخرج علي من داري مرا لا خطبتها لا نقبلها...وجهك ما عادش نحب نراه...
خرجت ساقي ترعش ومخبلة في بعضها وانا من عند ربي تاعبة ومريضة....والوجيعة اللي عندي ما خرجتهاش قعدت مخزنة في داخلي...تخلط كل شي وكنت نغزر ولى كل شي فلو وعهدي بروحي لعبت علي الدوخة وطحت واختو لقفتني وتعيط:
-وه امي اجريلي...#

✴✴✴✴