الحلقة الثانية
#أنا_حرة
#بوسي_مصطفى
_______________
الحلقة الثانية.
بعد كام يوم من الأحداث.
في البلد و في منزل الحاج غيث.
ثنيه : مصر تاني يا حنين و بعدين يا حبيبتي ما انتي شغاله هنا و زي الفل و لا عايزة بابا يزودلك المرتب ههههههههه
غيث : من عنيه المرتب اللي هي عايزاه تاخده و فوقيه بوسه كمان.
و يقُبل غيث خد ابنته.
حنين ببتسامة : بس هناك الشغل هحس فيه إني بشتغل بمجهودي مش علشان أنا بنت الحاج غيث صاحب الشغل لازم الناس تخاف مني.
غيث : الناس هنا بتخاف منك!
بالعكس دي بتحترمك علشان انتي بنتي مش خوف و لا حاجه أنا مش ماسك عصايا للناس يا بنتي.
حنين : مقصدش يا بابا بس هنا الناس فعلا تحس إنها خايفه تزعلك علشان أنت صاحب الشغل و أنا بنت صاحب الشغل فمبحسش بالتقييم الحقيقي.
ثنيه : يطلع ايه التقييم دا يا بنتي؟
بقولك ايه انتي هتقعدي معايا هنا و هجوزك كمان جنبي ايه رأيك بقى؟
حنين : اتجوز!
نظر غيث لثنيه علشان تغير الموضوع.
ثنيه : لا يا حاج مش هسكت انتي لازم تتجوزي يا حنين
و تعيشي حياتك و تنسي الواد ده.
حنين و هي مدمعه : علشان خاطري يا ماما مش عايزة افتكره.
غيث : اوعي يكون بيكلمك.
حنين : حاول كتير بس أنا مردتش عليه بلاش نتكلم عنه علشان اعصابي مش مستحمله.
ثنيه : طيب يا حبيبتي بيتقدملك كتير و كلهم ناس محترمة و من عيله كويسه بابا يعرفهم يعني لا هنسأل و لا ندور على اصلهم بترفض ليه بقى؟!
حنين : هو كمان و عيلته بابا كان يعرفه.
نظر غيث لحنين و لمح الدموع اللي في عينها.
غيث : معلش يا بنتي حقك عليا.
حنين لسه هتقوم تطلع فوق.
يدخل مسعد الجنايني.
مسعد بيخبط بـ ايده : يا حاج غيث يا حاج.
حنين تلبس الحجاب بسرعة.
غيث : ايوه يا مسعد تعالى عاوز حاجه؟
مسعد : في استاذ جه بره بيقول إنه ابن اخت سعادتك.
غيث و نظر لثنيه : ابن أختي!
ثنيه : تلاقي حد من ولاد اختك صدفه.
غيث : خليه يدخل يا ابني أنت موقفه بره؟!
و يخرج غيث يتفاجئ بـ رشدي واقف بره.
غيث : رشدي ابن اختي يا تلتوميت مرحبا يا أهل و سهلا ازيك يا رشدي يا ابني و ازاي أمك و الاستاذ راضي عامل ايه؟
رشدي : كلنا كويسين يا خالي حضرتك اخبارك ايه و صحتك عامله ايه؟
غيث : تمام يا ابني اخواتك كويسين حسين و لمياء بخير؟
رشدي : كلهم بيسلموا على حضرتك.
غيث : طيب تعالى ادخل
خد الشنطه من البشمهندس يا مسعد و دخلها جوه.
مسعد : حاضر يا حاج.
غيث : اتفضل يا ابني مكسوف و لا ايه دا بيتك.
يدخل رشدي جوه توقف حنين و ثنيه.
و تسلم ثنيه على رشدي و ترحب بيه.
رشدي : ازيك يا أستاذة حنين اخبارك ايه؟
حنين : أنا كويسه.. ألف مبروك.
رشدي ببتسامة : ايه دا هو انتي عرفتي دا أنا جاي اعزمكم و قولت بقى اعملها مفاجأة.
ثنيه : نورت البلد كلها يا رشدي يا ابني ماما واخواتك عاملين ايه؟
رشدي : تمام كلهم بيسلموا على حضرتك و بعتين السلام لحنين كمان.
حنين : سلملي عليهم.
غيث ينادي على عديله.
ثنيه : أنا هدخلها.
رشدي : متتعبيش نفسك يا مرات خالي أنا أكلت في الطريق و حبست بشاي كمان.
ثنيه : دا واجب علينا نضايفك يا ابني دا أنت مدخلتش بيتنا من و أنت قد كده.
رشدي : هههههههههههه
غيث : رشدي صاحب بيت يا أم جلال مش ضيف.
رشدي : متشكر قوي يا خالي.
غيث : قولي بقى عامل ايه؟
رشدي : تمام اهو الحال ماشي في الشغل و حاولت الملم نفسي كده علشان اتجوز.
غيث : خلصت حاجتك يعني؟
رشدي : اه كله خلص مبقاش غير الفرح بس.
غيث : على خير يا ابني عروستك كويسه؟
حنين استأذنت و طلعت فوق.
رشدي : هي كويسه متعرفش إني جاي هنا أصل أنا امبارح بعد ما رجعت من الشغل لاقيت إن العزومة في التليفون متنفعش أنت خالي و في مقام بابا لازم اجيلك بنفسي.
غيث : و أنت كمان في غلاوة جلال ابني.
رشدي : هو جلال فين صحيح؟
غيث : جلال سافر امبارح مصر.
رشدي : هو شغال هناك؟
غيث : اه
فاتح شركة صغيرة كده بيديرها
يعني مكتب استيراد و تصدير على قده كده.
رشدي : كويس يا خالي كبداية بكره الشركة تكبر.
غيث : ادعيله أصله مغلبني يا ابني.
ثنيه جايه بصنية الشاي و الكيك : جلال لسه صغير و بكره يكبر و ياخد باله من نفسه
أصل يا ابني خالك دايما يتخانق معاه اكمنه قلبه مش على الشغل زيه يعني اتفضل يا ابني.
رشدي ياخد الشاي من مرات خاله : تسلم ايدك يا مرات خالي.
ثنيه : على ايه بس احنا عملنا حاجه أنا قولت اجيب الشاي عقبال ما الغدا يخلص.
رشدي ' لا مش هقدر أنا جاي بس في السريع كده اشوفكم و كمان اعزمكم على فرحي.
ثنيه : ألف مبروك يا ابني عقبال لمياء.
رشدي : متشكر يا مرات خالي.
غيث : يعني ايه جاي في السريع دي لازم تريح ساعتين و لا حاجه دي المسافه طويلة و زمانك تعبت.
رشدي : معلش يا خالي علشان بس ألحق ارجع في النور.
غيث : مش هتلحق احنا بقينا العصر و عقبال ما تاخد واجبك يكون الليل جه.
رشدي : لا ما أنا ساعة كده و قايم ماشي.
غيث : ساعة ايه هو أنت بتيجي عندنا كل يوم بكره الجُمعة أكيد معندكش شغل قضيه معانا و ابقى روح اخر النهار مش هقولك تقعد يومين تلاته علشان عارف ظروفك.
رشدي : لا بكره ايه أنا لازم ارجع البيت النهاردة.
ثنيه : بقى كده عايز تزعل خالك منك و بعدين مش عقبال ما نوجب معاك و نبعت زيارة حلوة كده .
رشدي : كفاية إنكم تنورونا يا مرات خالي.
ثنيه : تعيش يا ابني ما احنا هنروح نحضر الفرح برضو.
غيث : قولت ايه يا بشمهندس؟
___________
أنت تقرأ
أنا حرة
ChickLitفتاة متمرده باعت الغالي بالرخيص و اخرى لم تختر زوجها حتى يوقعها في مشاكل كثيرة مايسه و حنين هنشوف مين اللي هتربح في النهاية. ........ الأم : و لا تزعلي نفسك بكره يجيلك احسن منه. مايسه : بس ابني صعبان عليا قوي يا ماما متعلق بيه. الأم : ليه عجبه قوي...
