"إختر مَن يتباهى بك أمام العالم بأكمله وكأنك أعظم انتصاراته، إختر مَن تكُن مصدرًا لقوته في عزّ لحظات ضعفه وصراعاته، إختر مَن يراك ملجئًا للسكينة والطمأنينة في ضجيجه واختياراته، إختر مَن يؤمن أنك الضلع الثابت الذي تستقيم به الحياة❤️"
وصلت المكان اللي اتفقنا عليه، كل حاجه فيا كانت متلخبطه أو مبسوطه مش عارفه، يارب ما يكون وصل قبلي عشان انا متوتره لوحدي ومحتاجه ريست صغنن كدا
بصيت يمين وشمال ملقتهوش
انا مش شايفه حد قلبي مغيم، المكان مزدحم جدااا بس انا مش ملاحظة حد متاكده إنه لو موجود كان قلبي التفته قبل عنيا
هيييح قعدت على اقرب ترابيزه، هيجي يعلق قعدت ليه هنا صح، طب هغيرها، يووووه إثبتي ي وهج خلاص بقا، طب ارن عليه لالا خلينا هادين كدا
الويتر: تشربي اي ي افندم!!
- ايـ... ايـ... هو ينفع شويه كدا اطلب عشان مستنية حد بس
ابتسم خفيف كدا قالي اه عادي.. حسيت اني اتشتمت في سره، بس مش مهم هنعدي اليوم.
اتفتح باب الكافيه فجأة ومعرفش ليه بصيت فجأة ناحيته وكأن حاجه شديتني غصب عني طلع هو، احييييه ياريتني ما بصيت ياربي همشي همشي... اي الجمال داااااااا هو ماشي بثقة كدا ازاي وكل حاجه فيه جميلة اوي ياربي بقا
شد الكرسي وقعد وانا نظراتي عليه غريييبة بمعني الكلمة حب، شغف، لهفة، استغراب، لا عايزه امشي لاااا
_ وحشتيني
- ايــه ايــه ي عم انت حد يخض حد كدا
_دبش وربنا بحب دبش
- مش قصدي بس الناس بتقول ازيك.. السلام عليكم لكن محدش يبدأ كدا ابدا
_ الحق عليا بقول اللي في قلبي على طول
- لا يـ اخويا متقولش
_مالـك
- مالى ما انا تمام اهو
_ مش على بعضك ليه
- مين قال كدا
_حسيت
- من امتى!!
_نعــم
- احم وحشتني
_ميـن
- مين ايـه
_ مين اللي بيتكلم
- امـك
_ بتسلم عليكِ وكان نفسها تقابلك وتشوف عروسه ابنها اقسم بالله
- أحلف، ومجبتهاش ليــه!!
_ اجيبها ليـه
- نعـم
_ فـي ايـه ي وهج هنقضيها نعم كدا كتيــر
- ما انت بتقول كلام مش مفهوم ي محمد
_ احلى محمد سمعتها في حياتي
- والله!!
_ مالك ها مالك مش على بعضك ليه
- هنتكلم بصراحه
_ نتكلم بصراحه بس من غير خطب كدا اتكلمي على طول ها
- انا كنت متوترة وخايفه وفي لغبطة جوايا رهيبة بس أول ما شوفتك
_ كنتي هتمشي!!
- اي دا مين قالك
_ ي بنتي معاكي ملك الاحساس اصلا
- ماشي ي عم تامر وبعدين انـا
_ هسألك سؤال بس قبل ما تكملي، عينيكي دي بتقلب في الشمس صح!!
- نعـــم
_ ي وهوجة قلبي مش كل حاجه نعم أنا بستفسر عادي
- ما انا مفهمتش وبستفسر بردو
_ ماشي ي لمضة خلاص كملي كلام انا عرفت انهم بيقلبوا أخضر في الشمس خلاص
- عارف انا كنت هموت من التوتر دلوقتي هموت لو مخبطكش ب اي حاجه، انا اي اللي جابني بس ياربي
_ صح اي اللي جابك
- قلبي
_ ماله
- بيحبك
_ نعـم، تصدقي نعم دي طلعت حلوه وتلقائي والله هههههههه
- والله انت مشكلة
- اطلبلي حاجه بقا عشان زهقت
_ وماله أجبلك أكل ونفرش فرشة حلوه كدا
- يالهوووي هيموتني هات شاي
_ ههههه خليهم اتنين شاي
- لا ي محمد انا عايزه قهوة
_ اممم خليهم اتنين قهوة
- لا ي محمد هات انت شاي وانا قهوة
" جز على سنانه واتكلم بهدوء كدا ما الويتر كان موجود، وحياة........ هخلي دم دا يبقي زي الشاي كدا "
- هات بس شاي وقهوة عشان هحكيلك حكاية حلوة
" بعد شويه من الوقت مش كتير القهوة والشاي وصلوا"
- أنت تعرف ي حبيبي الفرق بين الشاي والقهوة ايــه!!
_ اشجيني ي ماما بس إنجزي
- بغض النظر عن اسلوبك بس هفيدك معلومة لوجـه الله اكسب فيك ثواب
" كنت حاسه اني هتخبط ب حاجه كدا فقررت اخلص واحكي
- الشاى والقهوة شبه الراجل والست بالضبط
القهوة حاجه رقيقة وهاديه جداااااا وتبقي معاك بمزاجها وبس من اول ما بتعملها لو استعجلت ولا اتعصبت هتفور في وشك وتبوظ لازم تتعامل بكمية حنان رهيبة عشان تظبطلك مزاجك غير كدا لا
الشاي بقا دا راجل يسد في أي حاجه واي وقت وفي كل مكان حتي لو بتعمله وانت متنكد هيظبطك، راجل ابن بلد اوي على فكرة
_ يعنـي أنا شاي!!
- قوم روح ي محمد، انا غلطانه اني بضيع وقتي مع واحد زيك
_ خلاص ي خسارة الهدية هتروح لحد تاني بقا
- ...................
_ سكتي ليه
- لااااا ما انا مش كل مرة اقولك هدية اي وبعدين انا شايفاك جاي فاضي حتي ما في وردة
_ غمضي عينك
- ايــه
_ غمضي بس
- اهو.....
_ فتحي
" فتحت عنيا على اسمي ما بين ايديه مصنوع بكل الحب اللي في العالم وتحت منه حرف صغنن كدا لـ أسمه هو، عنيا بقيت متأرجحة بينها وبينه كل حاجه حلوه جنبي بقيت أحلى، ما حسيتش بنفسي غير وانا بين ايديه متبته فيه وكأني كنت طفلة تائهه ولسه راجعه بيتها"
- أنا بحبك لا بعشقك الفكرة مش في الهدية الفكرة في وجودي جنبك حبك ليا اللي واصلني بطريقة مهما اتكلمت متعرفش تعبر عنه، إنت ازاي كدا كل حاجه فيك جميلـة، عمري ما كنت اتخيل أن عوض ربنا حلو اوي كدا
_ مكنتش اعرف إن اللسان الدبش بيطلع كلام حلو كدا
- بهزر معاك بداري حبي وشوقي بتكسف اعبر عنه وبضطر أنكشك وبس
_ أنا بحبك بكل دبشك وبكل حاجه فيكي يـا من توهجت بكِ أيامي.
"نحن نُزهر رغم كلِّ التَّعب، رغم كلّ شيءٍ يدعو للذبول، نُقاوم خريف الأيام فقط بوجود من نحب بجوارنا لذلك فأنا أحتاجكِ معي مثل ظلّي ، مثل شيء لا يفارقني ، أحتاج أن أشعر بوجودك دائمًا ، أن أطمئن لفكرة أننا قريبين و أني معكِ أكثر من أي شيء آخر "
#اسكريبت2
#شيماء مكي
