عند اي حاجه وحشه بشوفها في حياتي حتى لو مشهد في فيلم بس فكرني بحاجات كنت فاكره اني نسيتها
اول حاجه كنت بلجألها إنت
أو بالمعني الأصح الشات اللي ما بينا اللي بالنسبالى هو أماني ومأمنى من الدنيا كلها
هو أول حاجه بلجألها لم الدنيا تديق في وشي
فتحت وبدأت اكتب..
" مسيرك في يوم هترجعلى، مش معقول هتفضل بعيد كدا مهما عدى الزمن اكيد في يوم هتفتكرني..
بس ساعتها أنا اللي مش هكون فاكره
هتكون كل لحظة فى بعدنا غيرتني
هعيد حساباتي وهفتكر اد إيه أذيتني ..
أذيتني لما قسيت عليا وانا مليش غيرك
أذيتني لما خليتني احطلك كذا عذر على وجعك ليا
في كل خطوة بينا كنت مصمم تزرع شوكه وانا مصممة أن الوردة هتطرح بعدها
لا انت بطلت تزرع ولا أنا بطلت اتخيل شكل الوردة هيكون ازاي..
مكنتش أتخيل أن ممكن يجي عليا يوم وكمية وجعي منك تنسيني اي ذكرى حلوة بينا
حاسه نفسي اني كنت ماشيه طول الطريق ومطمنة بونسي وفجأة لقيت نفسي لوحدي في طريق أنا معرفهوش ..
كلنا فترات وعارفه أن فترتي خلصت وسيبت كل حاجه كانت من حقي لحد تاني يكملها بمنتهي السهولة أو جايز كنت بتخيل أنها من حقي...
أنت حتي معملتش حساب للعشرة اللي بينا ولا انا فرقت معاك.. ووقفت اتفرج عليك وانت بتبيعها برخص التمن..
بيقولوا عليا اتعميت في حبي ليك بس الحقيقة اني انا استعميت واتغاضيت عن كل حاجه في سبيل بس انك تبقي بخير
اتمني دلوقتي بس تكون بقيت بخير
#شمس
