الدكتورة أسيرة الزعيم 🔫👩‍⚕️

الحلقة 31

دارت تشوف فيه لابس كوستيم كحل لي زادو كاريزما ريحتو لي لحقتها قبلو تشوف فيه كانو هو الوحيد لي راهو في الحفلة ..
دخل هو الاخير بقا يشوف فيها كيفاش واقفة كيفاش لابسة الروب جا مخيط عليها بلع ريقو و كمل طريقو جيهتها حبس كي لحق عندها تبسم : عيد ميلاد سعيد و كل عام و انت بالف خير.
جوري ضحكت و قاتلو : ميرسي ....يعني انت لي درت هاد الشي قاع !
ماكس: هذا قدامك حتى حاجة يا اميرة الحفلة.
جوري حشمتو حبطت راسها: خلينا نروحو عندهم خيرهيا ...
راحو و هي بقات باهتة في الإطلالة كان عبارة عن مطعم يطل على البحر مزين بالألوان الاحمر و كاتبين في طول الحيط Happy birthday Jory❤
جابو القاطو  لي كان على شكل قالب من 3طبقات و طفات الشمع و بداو يمدولها فالهداية كل واحد واش مدلها بقى الا هو محبش يمدهالها دوكا كلاو و بقاو يقصرو و جوري تضحك و ماكس يراقب فيها من التحت للتحت حتى كملت الحفلة تفاهمت ميار و جوليانا انهم يخلو جوري و ماكس يروحو مع بعض راحو يجرو ركبو مع سام جوليانا و ميار و جميلة راحت مع الشوفور
جوري: راحو قاع !
ماكس: وي هيا مام احنا نروحو
جوري : اوكي راحت تدور باش تسبقة عفست على الروب تاعها مع لي جات راح طيح كانت بين يديه حط يدو ورا خصرها و يد تحت رجلها و بقا غايس في عينيها و الف حكاية في راسو ؛ اما هي فالادرينالين حساتو طلعلها في الدم تاعها دقات قلبها غير تزيد و ولات تراهن انو راهو يسمع فيهم بقات تشوف فيه و لمعة عينيه اما هو راح نظرو لشفافها لي كل يوم و كل مرة يحب يطفي نارو بيهم بقاو مدة حتى فاقت لروحها و ناضت من عندو : thank you
ماكس: you are welcom
و راحو للطونوبيل بقاو ساكتين حتى هدرت : معلاباليش كيفاش راح نشكرك و نردلك خيرك ميرسي بزاف على اليوم و على السهرة صح حسيت روحي اني فرحت من قلبي يعطيك الصحة.
ماكس: حتى انا نشكرك من قلبي على لي درتيه و على الحفلة قتلك انها ولا شيء قدامك حضرة الدكتورة.
جوري: مي واش درتلك باش تشكر فيا ؟
ماكس شاف فيها و ضحك و دور راسو : شكرا و خلاص و هدر مع روحو : شكرا انك دخلتي لحياتي و رجعتيلي النور شكرا لانك عاودتي بعتي النبض لقلبي الميت شكرا لانك كنت انت يا دكتورتي الصغيرة...شكرا و الف شكر
لحقو للقصر حبطت و حبط هو موراها دخلت للبيت نحات صباطها  و قعدت دور في الغرفة وحدها كي المهبولة حتى سمعت دقات على الباب : وي  تفتح الباب و شافتو هو : نقدر ندخل !
جوري: وي وي بيان سور  راحت وقفت قدامو و شافت في يدو باطة كبيرة كحلة
ماكس: موقبيل مدولك قاع الكادوات تاعهم بقيت غير انا مازال ممديتهولكش فتح الباطة و قاللها كل عام و انت انجح دكتورة ..كل عام و انت اسعد انسانة كل عام وانت اطيب انسان كل عام و انت بخير جبد السنسلة و دنالها شعرها حطو في جهة و دارلها السنسلة و ريحتها تخبط فيه غمض عينو و بقا يشم في شعرها و يحبط حتى لعنقها حتى فاق جبد روحو و دورها ليه: تلبسيها بالصحة و الهنا مي لازم توعديني وعد
جوري: لي هو !
ماكس: انو هاد السنسلة متخرجش من رقبتك مهما صار و مهما يصرا  ..
جوري: حكمتها  بيدها و ضحكت معاه: وعد مني ليك انها راح تقعد هنا معلقة حتى اخر يوم في حياتي .
حل يدو و عنقها و هي بادلاتو الحضن
ماكس: هيا دوك تصبحي على خير علابالي عييتي
جوري: و انت من اهل الخير...
خرج و غلق لباب و راح دوش و رقد و هي سيدة افكارو
و نرجعو لفتاة عيد الميلاد لي ماخلات ما دارت بعد كلامو و حضنو سوطات شطحت ضحكت دارت دارتهم قاع و راحت دوشت و رقدت كي الكوالا بشعرها المشمخ
جازو خمسة أيام جوري رجعت للخدمة بموافقت ماكس طبعا و سام و ماكس راهم يوجدو لصفقة جديدة و مهمة جدا يعني الحالة راهي تمشي روتين .
نهار جديد ناضت جوري لبست روب قصيرة في الغوز كلار مع طالون كحل طلقت شعرها رفدت صاكها و حبطت قابلها ماكس عند الباب  جوري: صباح الخير.
ماكس: واش من خير يجي منك انت !واش هاد اللبسة مع  صباح ربي رايحة لحفلة !
جوري: واشمن حفلة رايحة للخدمة
ماكس: تتزيني للمرضى انت ولا روحي روحي بدلي خير ما نجي ليك روحي ..اشش روحي بدلي راني نستنا فيك لتحت منروحش حتى نشوف واش لبستي هيااا.
خبطت رجلها في الارض كي الدراري صغار ودخلت للبيت نحاتها و بقات تحوس واش تلبس و اخيرااا لقات  و لبست سروال كحل و بوستي ابيض مع شوميز غوز كلار فتحتها و ربطتها و لبست طالون نواغ و طمت شعرها كوتشوفال الفوق و خرجت صابتو التحت يستنا فيها
ماكس: هاه شفتي كي تحبي تلبسي مليح كيفاش تولي شابة هيا ربي معاكو خرج
خرجت هي موراه بعدما شربت قهوتها و راحت بدات تخدم في خدمتها

في الشركة:
قاعد في البيرو حاط مجموعة من الاوراق و معلق بعض الصور و الصور مرسوم فيهم علامات ايكس بالأحمر و دوائر بالاخضر يعني كانو يحوس على هدف ما حاط راسو مع الورق حتى يدخل عليه سام ني سالام ني كالام : عرفت وقت التسليم و البلاصة .
ماكس بحماس: ايواااه و وقتاش و وين !
سام : ******على الساعة 5 تاع صباح قبل طلوع الشمس بنص ساعة .
ماكس: امممم مبيح يعني لازملنا خطة تكون مليحة و هادي نهدرو عليها في القصر ماشي هنا .
سام: اوكي ايا مالا انا راني خارج
ماكس: وين !
سام: نخرج العمر تفطر برا
ماكس: روح روح انت كنت مليح و زدت توخدت العشية تكون في القصر يا ويلك و متجيش يا سام يبقى حسابك عندي
سام : انا ماليش في هبلك و المافيا بتاعتك يا راجل .و هرب قبل ما تجي القرعة فيه
ماكس: ربي يصبرني برك اااه  منك ..
راح سام و ميار خرجو فطرو برا و رجعو للقصر سام و ماكس في المكتب يوجدو للصفقة الجديدة..
اما جوري رجعت من الخدمة عيانة رقدت شوية و عيطتلها يماها و بقاو يقصرو
لامية : واقيل ماكيش ناوية تحبطي !
جوري: اه مشكيتش يحبو يعطوني يامات في الخدمة
لامية: حياتد قاع تخدمي يعطوك يعطوك هيا و الله يا بنتي غير توحشتك
جوري: مام انا و الله اوكي ان شاء الله نهدر معاهم.
كملت مع يماها و كوبات لبست في رجليها و راحت لبيتو تحوس عليه طبطيت مرة زوج ماكاش رد فتحتها مالقاتوش عرفت انو في المكتب حبطت عندو راحت طبطب حتى تسمع حاجة خلاتها تيبس في بلاصتها..........
          في ميزكم واش سمعت !
كومومتاتكم هي لي تمدني بالطاقة هيا خلطو الحالة و الباقي نااار🔥🔥🔥❤