الدكتورة أسيرة الزعيم 🔫👩‍⚕️

الحلقة 36

جازو اليامات و ماكس ماخلا حتى بلاصة محوسش فيها  على جوري اما مالقا حتى طرف  خيط و مازالوا يحوس  و هو على اعصابو لي يهدر معاه يطير فيه ...
جوري بقات  على تواصل مع ميار بتخبية ...
ناضت كي العادة طيبت قهوتها و شربتها و راحت لبيتها عاودت طمت قاع حوايجها في الفاليزا دخلت دوشت و خرجت نشفت شعرها و جبداتو ماكيات لبست روب قصيرة بيضة مع  طالون في  النواغ رفدت صاكها و حبطت مدت المفتاح و طلعت لطونوبيلتها عيطت لميار
جوري: واااش الحب
ميار: واش مامي كي راكي !!!
جوري: راني خير منك عمري ديت روبو و شكون  كيفي
ميار: راني حاسدااتك مي متخميش غدوة راح نولي لداري و للورشة تاعي و انت وين راكي
جوري: انا راني رايحة عطلة
ميار: عطلة!!!!مي ماكس راح يعرف
جوري: وي انا بلعاني راني  رايحة دوك و نخلي كلش على المكشوف راح نعيشو على حساب المثل تاع ادا وصلت لوذنك عضها ..علابالي راح يجي و راح يكون قريب ليا مي ميقدرش يجي لعندي
ميار: امممم ينخاف منك  انت
جوري بضحكة: عندك شك ! ايا اومبعد نهدرو وقت الطيارة راح يروح و بلا مانعاود كيما كل مرة منحبش الوداع  باي .و كوباتلها في وجهها
جوري: مدامك حبيت تلعب هيا نلعبو يا سي شباب و راحت ديريكسيون للمطار ....
دخلت للمطار و راحت دارت الإجراءات بعد مدة قصيرة حست بحركة غريية عرفت انو راهي مراقبة من طرف رجال ماكس ضحكت بشر و دخلت للسانيتار .......
كان قاعد في البيرو حتى صونا التليفون تاعو شاف لقاه واحد من رجالو كوبا عليه مي بقا يعاود حتى رفد عليه
ماكس: ماذا هناك!!
الراجل: لقد وجدناها
ماكس وقف يجري : اين ؟ و اين هي الان؟؟تكلم
الراجل: انها في المطار هناك رحلة نحو المانيا و هي مسجلة ضمن قائمة الأشخاص اللذين هم ذاهبون الى برلين.
ماكس: حسنا اخبر الرجال و احيطو المطار لا تدعوها تسافر و أنا آتي .
ناض يجري و على وجهو ضحكة من الطرف للطرف ضحكة تبين قاع سنانو ..
ماكس: لم اكن اعلم انها ستكون مهمة بهذه السهولة يا دكتورتي الصغيرة. و خرج
دخلت للسانيتار و فتحت الكابة الصغيرة لي فيدها جبدت منها سروال كحل و تريكو كحل مع فيستا كوير حمرة و طالون حمر دارت كاسكيطة و خرجت غير بالفاليزا و الصاكودو خلاتو لتم...
خرجت شافت من و من كان راجل يبان من رجالو واقف يستنا فيها تخرج اما بطبيعة الحال تبدلت 180°ماراحش يقدر يعرفها فجازت قدامو باش متلفتش الإنتباه تاعو و راحت كان لحق وقت الطيارة تاعها....
اما الراجل لي بقا يستنى 5/10 دقايق حتى راح فتح الباب شاف الكابة مرمية في الارض و الحوايج داخلها : *****كيف لم انتبه لها ! لقد كانت هي من خرجت قبل قليل لقد خدعتني ***.
و خرج يجري يحوس عليها و امر الرجال الاخرين باش يحوسو مليح و هو راح يجري لقا بلي الطيارة تاعها تغلقت و راح تقلع كان راح يدخل حتى صونا التليفون تاعو
ماكس: اين انت !!
الراجل: سيدي لقد ذهبت قامت بخداعي و ذهبت...
ماكس: كيف ذهبت !!!***الم آُأَمنها عندك ! *** اقسم لك ان لم اجدها سوف تتمنى الموت و لن تجده .كوبا عليه و حبط يجري راح سقسى عليها و قدرو يمدولو المعلومات و شكون ميمدلوش و هو ماكس اكبر رجال الأعمال مدولو و عرف انها راحت للبرلين و الطيارة الثانية لي كاينة في برلين على7ساعات ؛ شرا تأشيرة سفر الى برلين و راح للدار رفد كابتو و رجع للمطار يستنى...
اما هي غير دخلت للطيارة شدت بلاصتها و نحات الكاسكيطة دارت كيتمان في وذنيها و حطت راسها و بقات تخمم حتى داتها عينها ..
بعد 7ساعات واخيرا وصل موعد الطيارة تاعو دخل شد بلاصتو و قعد
وصلت جوري لبرلين كي وصلت كانت الساعة 9 تاع صباح في توقيت المانيا دارت اجراءات الخروج و خرجت رايحة للاوتال لي بعتوها ليه باش غدوة منداك تكمل طريقها يعني دارت l'escale ....
17h Berlin ...
حبست الطيارة و بدات الناس تخرج حتى طل و حبط بكل كاريزما و فخامة و رجولة طاغية حبط الدروج بكل هدوء و راسو مطلعو للسماء وصل التحت نحا نواضرو و شاف في ساعتو نعم انه ماكس..كمل طريقو و خرج رايح للفندق لي تابع للمطار  .
بعدما وصل للفندق رما حوايجو و راح دوش و خرج
ماكس:هل هناك تطور ! هل استطعت معرفة الفندق الذي تقيم فيه !
الراجل: لا سيدي ليس بعد.
جبد pcتاعو وقعد يخدم في خدمتو و عقلو غير فيها..
اما لالة مولاتي دخلت دوشت لبست روب ميني و مونتو طويل مع كافاليار نواغ طالون طلقت شعرها و خرجت دور في شوارع برلين و تشري..
عاودت رجعت بعدما عيات خملت حوايجها تعشات و رقظت و هو تانيك.
صباح جديد ناضت لبست شربت قهوتها و حبطت مدت المفتاح و راحت بتاكسي للمطار تستنى الفول تاعها
طيييط طييط
ناض صباح على صوت التليفون رفد بلا ميشوف
الراجل بانفعال: سيدي انها ذاهبة الى الجزائر و هناك طائرتين الاولى على الساعة 12 و الثانية على الساعة 14 لكن لم استطع معرفة اي منهما التي سوف تركبها
ماكس : حسنا شكرا.
ناض يجري لبس رفد حوايجو و راح للمطار شرا تأشيرة و بطبيعة الحال صحتلو الطيارة تاع14 قعد يستنى
بعد مرور5ساعات رايحة تجري ما بين الناس و تكركر في الفاليزا تاعها و هي تقول: راني روطار راني روطار..
بعد جريان كبيير و خبطات غير معدودة وصلت و دخلت حكمت بلاصتها و هي تلهث
دخل للطيارة هو الاول قعد في بلاصتو حط في وذنو كاسك و قعد يخدم و الغاشي يتعمر....
بعد ساعة و بعدما قلعت الطيارة كره طفا ال pc و نحا الكاسك من وذنو عدل روحو و غمض عينو و هنا صرات حاجة ماكانش دايراها حساب......
              ❤🦋 واش صرالو زعما !! واش تتوقعو تكون الاحداث الجاية ! شاركوني 🙏❤
          Love you 🙊😍