التموا اهل الديره و اتسلحوا
و انتظروا يشوفون هاي السيارت شنو
اني خفت باوعت يسره يمنه محد الي احتمي بيه
رحمت لابو مزاحم
كتله عمو اني وديعت امي و ابوي عندك
بشاربك اني
كالي عمو ركبتي تنكص ياله ايد تنمد ليج
اي
اتقربت السيارات
طلعت سيارات للجيش و الشرطة الاتحادية
شباب القرية مستولين عليهن من الجيش و ماخذيهن
و جايبيهن غنائم
اي من وصلوا طلعوا وياهم ملتحيين نفس ترتيب الدواعش بس همه من اهل القريه مو غربه
اي
من اجو الحمد لله معزبنه راح لزعيم ذولة المسلحين المستولين ع السيارات
ايصيحوله ابو جهاد
و وصاه عليه
كاله هاي بنت اخوي و اخوي ويه تنظيم الدولة دا يجاهد لتحرير الموصل من الصفويين
هذا الرجل كبير السن ابو جهاد
كالي انتي بحماي
اني امنت
و دنكت ع ايد ابو جهاد و بستها
بالليل ع اساس نطلع اشو ما طلعنه
و محد يعرف السبب شنو
احنه كلحنه النسوان جامعينه بمكان
مثل المسجونات
اي بعد العشا اخذونه للمضافه
كاعدين المسلحين و عرضونه عليهم
منعرف شيردون منه
اول ما دخلت واحد معلك شريط مال عتاد ع صدرة
اشره عليه و كال هاي الي
اني خفت و عيوني غرغرن دمع
و باوعت للشيخ الكال بحماي
باوع عليّ
و كال لا هاي بحماي
ظلوا يتخيرون
المشكله الشيخ ابو جهاد هم كام يختار وياهم
و البلوة لمن اختار مرت ابو مزاحم
هيه مره كبيره و حتى مو حلوه معرف ليش اختارها بس اشوية مربوعة و طويله
بعدين طلعونه شفت ام مزاحم راحت لابو مزاحم و خذته ع صفحه
و شفتها تبسبس و تباوعلي
معرف شكالتله
اي بعد ما كملت راح ابو مزاحم لشيخ المسلحيين
بقى اكثر من ساعه وياه
انوب اجاني ابو مزاحم
بوسني و كالي بنتي سامحيني ع اي شي يصير
كتله انته هسه بمثابت ابوي و اني بنتك و خدامتك و وديعتك
كالي شعندج افلوس انطينياهن
كتله ليش عمو
كالي اريد افول بانزين
و انتي بعد ما تحتاجيهن
كتله شكد تريد حتى انطيك
كالي لا انطيني كل الي عندج
يمي اامن الج
شلتهن و انطيتهن اله كل الفلوس العندي
و اخذني لبيت
دخلت بالبيت لكيته بيه
3 بنات اعرفهن
ابو مزاحم وصلني للبيت و اخذ زوجته
و ودعني 😢
معرف شنو المنتظرني هنا
... يتبع
أنت تقرأ
السبية بلا سبي
القصة القصيرةقصة واقعية، تتحدث باللهجة العراقية عن محنة فتاة افقدتها الحرب اعز ما تملك بهذه الحياة
