اني راسي يفتر من الوكعه و هذا نايم فوكاي
يا ويلي الكنت خايفة منه صار
اني نايمة عله وجهي و هذا نايم فوكاي
انوب اني اتاذيت بالوكعه
و بعد ما بيه اقاوم
فحاولت اخلص روحي منه
جسمي ما ساعدني لاني كلش تعبانه موت
هو ظل يتحرك جسمه ع جسمي بس امبين اباله غير شي
غير جسدي
اي اثاري دا يحاول يسيطر عليه و يطلع بمسدس بحزامه
من كمش المسدس خلاه براسي
كالي بعد و لا حركة
بس ترفسين افرغ الشاجور براسج و اعوفج للجلاب و امشي
اني سلمت امري لله
و سكنت
هو من شافني هدأت
كال : استغفر الله
و كام عني
كال شنو من بلاء هذا جمالك و جسمك
يراد للانسان صبر يوسف حتى يتجاوز هاي المحنه
اني حسيت بكلامه اكو نيه طيبه
كتله اني مثل اخيتك و اني يتيمه و ما عندي اخ
كالي ادعي من الله يصبرني ع مصيبتج
كتله ليش ما خليتني ويه عمي ابو مزاحم
كالي ابو مزاحم عمج عمج لو انتي تصيحيله عمو
كتله لا عمي من صدك
جان يصلخني راشدي
كالي ما احب الچذب لا تجذبين بعد
كتله اوكه
اني اول ما صلخني بالراشدي عيوني غرغرت دمع و شنفت شفايفي
عود اني قويه و ما ابجي و ما خايفه منه
و كتله ابو مزاحم رجال خير من ديرتنا و اني اصيحله عمو
يعني هوه مو عمي من صدك
بس انته شمدريك
و ليش ما خليتني اروح وياه
كالي عرفت هوه مو عمج لان باعت للشيخ
كتله شنوووو صدك تحجي
اني شصار بي من سمعت عمو ابو مزاحم باعني
بعد ما اكدر احبس الدمع و اكابر
فبجيت بحرگه
كالي اي راوسج بمكان مرته
كتله ما اصدك مستحيل
كالي براحتج لتصدكين
كتله زين ميخالف ليش ما خليتني اروح وياه
كالي بعد ماكو ملاذ امن بكل العراق
كتله مو احنه انريد انروح لبغداد
كالي دولة الاسلام
انتصرت
و بغداد باقي ايام تدخلها الجيوش باذن الله
كتله حتى بغداد؟!
كالي يا بغداد العراق كله راح انحرره
كتله مو جيش و دولة و طيارات
كال بس نوصل اطراف بغداد راح تنفتح الحدود و تجي الجيوش من المملكة و من الشام
و نتلاكه ببغداد و مناك نزحف للغزوة الكبرى
يا مملكة ما عرفت
بس حسيت من كلامه واثق كلش
كتله ليش جبتني لهنا
كالي هذا المكان محد يندله
مهجور و محد يمر من يمه
راح اعوفج بيه منا ليوم يومين
لحد ما اشوفلج فد صرفه اطلعج منا بامان
كتله شلون تعوفني هنا وحدي بين الوحوش و الطناطل و الحشرات
كالي بس نرجع سوه للقرية
اثنينه ننكتل
الصبح راح يطش خبر هروبك
و منو يآويك ينهدر دمه
ابقي هنا و اتحملي
كتله اخذني اني اريد اموت
كالي زين راح ابقى ويااك لحد ما يطر الفجر باقيله شويه النهار يطلع
كتله اوك
بس طب كدامي للخرابه
اخاف بيها جن حيوان حيه عكرب..
كالي كافي افتهمنه
صدك كمش مسدسه و شعل موبايله و طب و اني مكمشه بهدومه من وره و ارجف
لا اكدر ابقى بره وحدي
و لا اكدر اتحمل اشوف الراح يطلعنه جوه
المهم كلما يشيل رجل يريد يدخلها
كلما اجر بملابسه اكثر
كان يعت ايدي كالي مو خنكتيني شبيك انطيني مجال
صدك دخلنه جوه
مكو شي بس اكو ريحت بول مال حيوانات
ريحه كلش قذره
كالي شفتي ماكو شي
كتله الله يستر ع عرضك مثل ما سترت ع عرضي
كالي ادعي الله يخلصنه من هاي الشدة
كلت يا اااالله
اي راح للسيارة رفع البنيد
و نام جوه السيارة كام يفتح بيها من جوه
بعدين سمعت صوت مي
و وره اشويه اجاني
كالي هذا مي من الراديتر مال السيارة
لا تستعمليه الا من تتضايقين كلش
لان احتمال يصير بيج اسهال
لو شي مرض
كتله رحمله والديك
اكو بالبدي نص كونيه بصل
شال البصل كله وانطانياه
و كالي اقتصدي بيه و لا تبذريه
كتله اني اخيتك مو تنطيني ظهرك
تره اني نخيت الله سبحانه و تعالى
و الله جل و عز سخرك الي
كالي الله يسترنه اثنينه
هسه الفجر طلع
ادخلي جوه
خلي اسد عليج الباب من بره
دخلت
من سد الباب
حسيت نفسي بقبر و دا يهيلون التراب ع وجهي
و اني اباوع بعيوني لهذا الغريب
مثل الغركان و مكمش بقمصلة نجاة مخرومه
من كمل
اكو فتحه زغيره
طلعت منها اصبعي اله
كتله اني امانه بركبتك مو تعوفني
دنگ ع اصبعي وباسه
كالي بشاربي يا بنت الاجواد
... يتبع
أنت تقرأ
السبية بلا سبي
Short Storyقصة واقعية، تتحدث باللهجة العراقية عن محنة فتاة افقدتها الحرب اعز ما تملك بهذه الحياة
