لم يكن ذنبي

البارت الثاني

محمد: رجعت العصر من بيت ابو مهدي فرحان بنتي راح تصير بيت ابو مهدي الي الكل يتمنى يناسبهم صحت مديحه مديحه وينج مديحه
ام فلاح : ها عيني ها شبيك جاي مثل الإعصار
محمد: دكعدي خل افهمج اليوم حجيت ويه ابو مهدي الشيخ
ام فلاح : اي خير ان شاء الله شكالك طبعا جزيتي ام امي مثل طبع جدي يردون بس يخلصون من البنات ويتمَون يتزوجن وبعد ميرجعن لو يموتها كتل زوجها عدهم عادي لازم تبقى بيتها
محمد : سهاد شكد صار عمرها
ام فلاح: توها ١٢ بس ان شاء الله بين ميتم الموضوع هي تغسل وتصير مره بس هي شلون تحب المدرسة شلون تقنعها
محمد: انعل ابو المدرسة يابه يامدرسة خل يتزوجن خل يخف الحمل عني مو مليت خرب هيج عيشه
ام فلاح : اهدا يا عيني معليك خليها عليه اني أقنعها
سهاد : اني البنت الجبيره لأمي وابويه اهلي ناس فقره ع كد حالهم والدي موظف بوزارة النفط بس راتبه ميكفينا اخوي الجبير فلاح يدرس يريد يصير ضابط والبقيه كلها تدرس والمعيل الوحيد والدي اني بيضه وشعري اشكر للخصر رشيقه واتمايل من امشي مواليد ١٩٦٧ اروح للمدرسة وارجع يوميه طبعا امي مره اميه ايدها والضرب دائما تعضني وتبسطني حتى المعلمات يسألوني ع الآثار التبقى بأيدي او وجهي وكل سنة تحبل وتجيب طفل واني لازم اربي واعتني بي تركت سنتين بسبب ولادات امي الي كل سنة طفل اني سافره ما البس حجاب واختي نغم ويايه تداوم نروح ونرجع سوه بس نغم شغلتها بس تتفرج معليها بلاطفال وشغل البيت هذا كله عليه اشوف امي هل ايام زينه ويايه ومتضرب ومتصيح فرحت حيل كلت هم زين تغيرت وكفت مني اني من دون الطالبات تركت وبقيت صف خامس ابتدائي واني عمري دخلت بل ١٢ سنة فديوم واني راجعه للبيت شفت امي واكفه بلباب تضحك وتاشرلي كيفت بكلبي كلت يارب اليوم امي تضحك الحمدلله ماكو صياح ولا ضرب وصلت للبيت ولو هو مينكال عليه بيت غرفتين وحوش مفتوح للسماء ماكو سقف والكاع طين اذا مطرت الدنيا معناها تصير شوربه تواليت بسيطه وبلا سقف وعليها برده رايح لونها من الشمس ومطبخ او احنا مثل منسمي مطبخ لان هنه حدايد رتبناهن اني وامي وسويناهن مطبخ طباخ ماعدنه عدنه صوبه زغيره يسموها اهل قبل (جوله) امي تطبخ عليها المقسوم هو يا مركة عدس او تمن ماش ودبس ذني الاكلات باستمرار نسويهن بحكم حالتنا المادية الضعيفه
ام فلاح : ها سهوده حبيبتي الله يساعدج صايره حمره من الشمس
سهاد :هلا يمه اي والله حار خل اروح اذب على نفسي مي يوم جوعانه اكو اكل لو ننتظر ابويه مثل كل يوم لحد منتخربط من الجوع
ام فلاح : طاح حظج شنو هل لسان والله لو ما أبوج وصاني جان هسه كمتلج بلصونده بنيه ملسونه طبعا ننتظر أبوج غير خطيه الرجال يكد ويجي تعبان نفرحه بلمتنا
سهاد: اي اي كافي اروح اسبح وأقرأ احسلي
دخلت سبحت بلحمام الي بلصيف تحس الشمس تسبح وياك والمي يَوكع جلدك من الحرارة وبلشتا يكتلك البرد بين منكمل سبح نطلع جامدين كملت سبح طلعت لزمت كتابي وكعدت اقرا جتي امي يمي يبو بس لا طلعلي شغله واني عندي امتحان باجر
ام فلاح: اكلج يوم تعرفين ابو مهدي الشيخ صديق ابوج
سهاد : اي يوم اعرفه اموت عليه شكد حباب كل ميشوفني ينطيني فلوس ويسلم شكد حلو اسلوبه
ام فلاح : ها الحمدلله مدام ترتاحيلهم بس انتي متعرفين مرته زهيره وحده متستحي ولا جن زوجها شيخ عشيرة وناس تحلف براسه مو صاحبة ملكه وعينها ضيكه ومتحب الخطار
سهاد : يمه شعلينا بيهم واني شعليه بيها عساني لا عرفتها اريد اقرا عندي امتحان
ام فلاح : ولج اسمعي مو يمكن ابو مهدي يخطبج لواحد من ولده محاجي أبوج طبعا امي كلبت السالفه لان هو ابوي الحاجه ابو مهدي ومستعد يتوسل بي حتى ياخذني لواحد من ولده
سهاد : يوم شنو يعني اني طبعا بنيه مثل ميكول ن من اهل الله ماعندي اختلاط بلبنات ابد بس اختي نغم نمشي سوه وماعرف شنو خطوبه وشنو زواج كل هذي الأمور ماعرفها وبنظري بس الكبار يعيشون سوه وهاهيه وحتى أمور نسائيه الباقيه ماعرفها وامي اي ثقافه ماعدها متعلم البنيه اي شي مجرد تعرف تطبخ وتحبل وتجيب وتطلع يم الجوارين تكص بلعالم
ام فلاح: بعدين افهمج على كل شي بس خل أبوج يردوله خبر كامت امي واني اتذكر مره عزمونه بيت ابو مهدي بيتهم احسن من بيتنا والمنطقة اسمها النواب مرتبه وجيران هادئين وشفت ولده شباب مرتبين بس احلى واحد بيهم مهدي مرتب وانيق ووجهه ابيض من مستقبلي والبقيه حلوين لونهم حنطاوي هو الوحيد بيهم اشكر وشفت بنات ابو مهدي زينات حبابات احسن من امهن لان امهن تنطيها بلوجه ابد متجامل كملت قرايه وكنت انظف الي مسمى بيت لان هو كوخ هوايه عليه

عبد الله : صافن بكلام ابو فلاح محمد خوش رجال وصاحب نخوه وشهم وعرض عليه بنته لواحد من ولدي واني احتاريت المن أخذها مهدي قافل ع زواج يكول مو هسه او عينه ع بنت ام داود جيرانه اني حاس بي بس اريده هو يبادر خوش ناس اوادم ومستورين وعبد الرحمن الي دائما عصبي وميتفاهم ودائما اني ويا على خلاف بسببه خسرت وجوه طيبة من اصدقائي بلعمارة لان أنطوني هدية بنيه شابه اسمها تحرير وهو وافق يتزوجها بس كام على أقل شي يكتلها حبلت وسقطت من الضرب ماله وأخواته هم مسالمات على نفسهن منه اذا صاح مره مرتين ومسمعن كبل يضرب مليت من عنده لا نصح يفيد ويا ولا عقوبة تفيد ويا ترك دراسته والتهى بشغل ونسوان عنده لاندكروز يشتغل بيها وياهي تصعد ويا يصادقها وهي النسوان هم لاحكته لان صراف وصاحب طول وعضلات جنه شقاوه وعيونه بيهن لون عسلي فاتح زين اني بنت ابو فلاح شايفها هي أكبر بناته شكره والهوا يجرح خدها خاف اجيبها اله وخاف يورطني انوب ويه صديق عمري واعز أصدقائي واني عبد الرحمن ابد معاجبني حتى احس أصدقائي الشيوخ يستحون يكلولي ابنك سرسري وشقاوه عركاته كايمه دوم وحتى علم إخوته فزيت من صفنتي كلت اعوفها على الله هو يحلها ومن يرجع عبيد الرحمن من طربكته اسأله واشرط عليه شروط لان هاي بالذات بت صديق عمري اذبحه لعبد الرحمن اذا فشلني هلمره

عبد الرحمن : اني عبد الرحمن ابن شيخ عبد الله آل خنياب ابوي اله صيته بين الناس ومعروف على مستوى المحافظات اني ابنه الازغر من الجبير جنت اكرهه الحياة العايشها اخوي مهدي الي كله دراسة ومستقيم احسها ممله ومابيها اي مغامره ابوي جان دوم يعاقبني مره المرات حفر ودفني وبقى طالع بس راسي اني ماعندي حظ اي واحد اسويله زين يكلب عليه حتى ابوي نفسه شكد اخدمه وبالاخير يمدح اخوي مهدي واني يذمني قسوة ابوي وتعامله ويانه الجاف الي مثل نظام العساكر خله كلبي خشن وقاسي وماعرف الرحمة مستعد اذبح انسان وميرفلي جفن سوه بيه حالة نفسيه اسمها التعذيب ولقسوة عباله بهاي الطريقة يخليني اطيع وامشي بالطريق الصحيح وطبعا اكثر قسوة ابوي عليه سببها امي لان اني حقاني عندي كلمة الحق فوك كلشي بلرغم عندي مكسرات بس كلها تعرفني انصر المظلوم ومااحب الدغش واخواتي جنت الاشوفها تمشي اعوج اعدلها بطريقتي الخاصه امي تسوي الحبه الكبه بس يدخل والدي من بره تضل تشتكي وتطلعني فدنوب مو زين ف ابوي بسبب هذا الشي زاد قسوته عليه اني بالذات وحتى اخذ حقي منهم قررت افشله بداخلي تحلفت من زغير انظلم حتى إذا مات واحد بشارع كبل كالو عبد الرحمن صرت شماعه لكل واحد يسوي مصيبه يكربسها براسي مره اجه ابوي من العمارة جان معزوم هناك وجانت عد الشيوخ شغلة واحد ينطي لثاني هدية يسمونها تقاليد تعبانه ف ابوي هدوله وحده وابوي رجال روحه طالعه من الطلايب يكفي عليه طلايب امي والنك مالتها راد واحد من عدنه ياخذها قررت اني اقبل بيها وافشله بين جماعته وافقت وأخذت تحرير العين خضره والبياض وشعرها مثل المي جانت خايفه بيوم العرس اكيد أهلها مفهميها شنو العرس وبحكم اني شرحت شخصيتي قاسي ومااهتم لأي شخص اخذتها وماهتميت لا البجيها ولا المشاعرها وعفتها وطلعت اسبح دخلت امي يمها بعد ماادري شصار كبل طلعت يم جماعتي نطربك لنص ليل يله ارجع

يتبع..