اي سبحت هفف هاي الكلمة يمكن عادية و مالها قيمة عد اغلبكم
بس جانت امنيه من امنياتي المستحيله قبل هذا اليوم (السبح )
ههه صرت مثل البشه 😅
كل اشويه اغط بالمي و انكع روحي
و كلما اريد اطلع
اكول بس هاي الدوشه اخذها و اطلع
المهم جلد التمساح جلدي نكع بالمي و رجع جلد انسان
من كملت صحت خالتووو
رايدة خاولي بلا زحمة
اجتني سحررر بتها
تگلي : هاااا ولج حسبالي متي و ادفع بالباب جنها امسودنه تريد تدخل يمي
كلت الها شكو يمعودة وين تردين
كالت شبيج خلي انشفلج
كتلها شنو اني زعطوطه و تنشفيلي
فتحت الباب و خمشت منها الخاولي و سديت الباب و كمت اضحك
على سحر شكد متحمسه و فرحانه بيه
بدلت طلعت
ههه لكيتها محضرة الي المشط
مثل معلمه امحضرة المسطرة للطالب المامحضر
لكفتني وركض لغرفتها سدت علي الباب و كامت اتمشط بشعري
و بس تمدح بجمالي و توصف بيه
ههه عيشتني جو الاسرة المفتقدته
اي انوب اجت خالتووو صاحت يا بنات تعالن اتغدن
اني استحي اكعد ويه عائله غريبه و ما اعرفهم انوب اكل وياهم
يااااا صخام الصخاااام😳
المهم اني جوعانه
كلت لنفسي حتى لو ويه الذيابه هم اكلي
اممممم دخلت شفت السفرة مخصصه بس النه احنه النسوان
يعني الزلم وحد و النسوان وحد
كلش ارتاحيت لهاي السالفه و ما كنت متوقعتها
المهم
طحت ميته ع الاكل
عود جنت اسمع عن اكلهم حرام و مو شرعي
لانه ما أهل لغير الله
بس بعد ما اصدك بكلشي سامعته عن هاي الناس
و الطبخ و الطعام كلش طيب و من نفس طيبه
المهم غدا درجة اولى و عشا فاخر
اويلي هاي شنو اني بالجنه
انوب النومه
خالتوو خلتني بغرفة سحر
نيمتني ع جربايتها و نيمت سحر بالكاع
و جرت اذنها هههه و كالت الها ولج خلي البنيه ترتاح مو تظلين بس تلغيين 😂😂ودوووخيها😶
سحر كالت اي و غمزتلي 😐
اول ما طلعت خالتووو
اجرررمب سحر يمي
اتنعم بخدي و تكلي اااالله و اخيرا صار عندي اخت حلوووه تحبني و احبها
نمت نومه عميقه
من زمان ما نايمتها
حسيت بامان و دفئ العائلة
ثاني يوم شفت عدهم ولد اعيونه زايغه
اكبر مني و يتحجج حتى يتواجد بالمكان الي اني بيه
و خالتووو وين ما تلچحه تطردة و تعيط بيه
المهم
يومين اكل فاخر درجة اولئ و 3 وجبات
اني كلت هذوله شكد متمكننين
بحيث هيج يبذخون بدون وجع گلب
فسئلت سحر
بابا شيشتغل؟
كالت عنده كييه مال عبريه 😳
هفف كلت اكيد النفرات عدهم خير من الله
كلت الها وشكد النفر
كالت 500 دينار 😳
كلت اكيد الكاز عدهم ابلاش
هاي دولتهم بعد و عندك الاحساب
فسئلتها ابيش لتر الكاز عدكم
كالت و اني شمدريني؟ انتي تعرفين؟
كلت الها ايي ب 450 دينار
كالت خلص احنه نفس الشي قابل ع روسنه ريشه 😳
كلت اخاف ابوهم يشتغل بالمتعه و اهل بيته ما يدرون
طبعا سامعه بهذا المصطلح و ما اعرفه
فظليت صافنه شنو السر ما ادري
بعدين عطشت رحت للثلاجه
هف شفت مسواكهم خطيه مال ناس ع كدهم
اكو جيس مال بيض ب الف
و علاكه طماطه و بصل و اشياء بسيطة
اثاري هذا كرم منهم و لاني ضيفه عدهم
يسوون كل هذا الاكل الزين
فرحت لخالتوو بستها و كلت الها خاااله اني مثل بنتج و شتاكلون اكل
الاكله الزينه اكيد تاكلوها بين يوم ويوم كل خميس او جمعه مثلا
اني بعد ما اقبل تسووين اي شي علمودي
اني حالي من حالكم
كالت بنتي بدام الله رازقنه ع عينج
خلي نصرف و الله كريم لا تشيلين النه هممم
البيت كلهم زينين بس هذا ابنها امضايقني
و لو بيدي بالنعال اشمره
و بنص اليل اجه يتخنس و دك الباب علينه
سحر صاحت منو
هو جاوبها بصوت ناصي اخاف واحد يسمعه
كال اااني
سحر كالت اله
تروح منا لا اصيح لماما عليك شتسوي اهنا يا طايح الحظ
كام يوتو و يعلس بالحجي كاللها ما عندي شي بس بگلت اخاف انتن محتاجات شي
سحر صاااحت يمممممه
كال اهوووو وووليت اسكتي راايح
طبعا اني اسمع هذا الحوار و خانسه
ما مرتاحه بهذا البيت من وره هذا القرد الكل شويه يتنطط النه
سحورة شافتني خايفه منه
نامت يمي و حضنتني و كالت بسيطه
لا تخافين باجر اگل لمي وهيه اتأدبه
اني ما گلت الها لا خطيه او لا تگليلها عوفيه
كلت خلي اجرب ذوله عدهم غيرة و حمية عله شرف الانثى حتى لو كانت غريبه
فعلا ثاني يوم سحورة كالت لمها
و امها لعبت ما لعبت
بابنها و حته ضرب ضربته
صدك الولد بعد ما اتعرضلي ابد و لا اتقرب مني و صار من يشوفني من بعيد يدنك بالكاع
هههه اممممم
تكول مشتكيه عند امي من رجل غريب مو العكس
انوب
كالت الي خالتوو ام سحر
يمه راح ادخلج عله ابو فاضل
اني كلت لنفسي منو ابو فاضل ما اعرفه شنو تدخلتي عليه
كلت الها ليش خالتوو شيسويلي
كالت تردين ترجعين لاهلج و تعرفين خبرهم
كلت ايييي ااااكيد فدوة اروح الج ابوس رجلج خاله ودينه اله
بس اشلون يكدر يحل مشكلتي
كالت يمه بس صفي نيتج و اتوجهي اله من كل كلبج
و ان شاء الله ما يردج خايبه
اني كمت من يمها
باوعتلي باستغراب
هاااا ووووين
كلت الها خلي ابدل حته انروحله
كالت لا باجر انروح العصر
غير اول يجي عمج ابو سحر
و اترخص منه
كلت الها اايي خاله اسفه اعذريني تره اني مو بوعيي
كالت عادي يمه مصار شي
اني شيصبرني و شيجيب باجر
و اروحله و يحل مشكلتي
.. يتبع
أنت تقرأ
السبية بلا سبي
Short Storyقصة واقعية، تتحدث باللهجة العراقية عن محنة فتاة افقدتها الحرب اعز ما تملك بهذه الحياة
