اني فرحت من سمعت اكو احد يكدر يحل مشكلتي
العصريات خالتووو كالت اسبحي و اتوضي حتى انروح اندخل ع ابو فاضل
رحنه وصلنه لمنطقه بيها اضرحه
كلت لخالتوو شنو هاي الكبب؟
اشرت ع وحده و كالت ذاك ضريح ابو فاضل
كلت لا خاله استغفر الله هذا شرك بالله
اعوذ بالله
خالتوو ضحكت و كالت ليش
كلت الها اشلون تطلبون العون من انسان ميت حتى لو كان صالح دون الله
كالت زين هسه اني اعرفج لو ما اخوي جايبك النه؟
كلت لا
كالت زين احنه منعرفج و دخلناك لبيتنه و ضفناكم لخاطر منو؟
كلت الها لخاطر عمووو
كالت اهااا عفيه عليج
هذا نفس الشي
هذا امام عنده جاه و منزله عند الله و احنه ندعو الله و نطلب بجاه هذا الوجيهه عند الله ان يقضي حوائجنا
كلت الها خووو اطلبوا مباشرة من الله و بعدين هذا رجل صالح و هو الان ميت
كالت الشهداء عند ربهم يرزقون صح لو لا؟
كلت اي صح
كالت يعني ميصح انكول عنه ميت و انخالف كتاب الله
و بعدين نرجع الك
انتي لو مباشرة داكه بابنا بدون اخوي
انسووي مثل ما سووينه وياك هسه
كلت لا
كالت و ازيدك حتى امه عدنه باب من ابواب قضاء الحوائج
كلت الها منو امه
كالت ام البنين
اني من سمعت اسمها جسمي كزبر
كلت الها ابو فاضل يعني ابن البدوية؟
كالت اي ام البنين امه
اني سامعه قبل من اجدودي و عمامي كرامة العباس ابن البدوية
بس ما ادري عنده ضريح و مزار و مقام
احنه هيج انعرفه ابن البدوية
فكلت ميخلف بس اشلون اطب و اني سنيه
خالتووو هههه ضحكت كالت هسه تطشيين الكل يباوعلك بتقدير و اهتمام و الجريئه تطلب تاخذ وياك صورة اذا صليتي ع طريقتكم
كلت يعني محد يذبحني او يضربني او يعتدي عليه
كالت ابد
فدخلنه اتفاجئت النساء وحدهن معزولات عن الرجال
و الضريح بيه قفص من ذهب و منظر رهيب يدل ع الخشوع و الرهبه
و اذا هاي الفسحة الزغيرة من الارض كانها بحبوبه من الجنه
فخشع حته كلبي
و اتوجهت اله بكل حواسي و كلت يا ابن البدويه اني ما اعرفك بس ادري عندك جاه و مقام عند الله
فاتوسل لله بجاهدك عنده
ان ترجعلي ابوي و ارجع اله
من نطقت هاي الكلمات كزبر جسمي
و بجيت بجبت من كل كلبي
و كمشت بالشباج
انوب كمت ابجي و اتوسل بي بصوت عالي
بحيث خليت حتى كل النسوان تبجي ع بجيي و نحيبي
اعيط و اصرخ اني غريبه اني اسيره اني شريده اني سبيه اني بشاربك يا ابو الغيرة و الحميه
بوووويه اررريد ابوووي
يا بوووويه سودة عليه وين انته
ظليت ابجي لمن تعبت فرد نوب و كل النسوان داير ما دايري التهفيلي و التدعي وياي و التواسيني
صدك رجعنه للبيت
لليل خابر عمووو
كال لخالتووو انطيني دنيا
اني هااا عمووو
كالي بابا لكيت الحل انطيني عنوان ديرتك و اني اوصل الها و اجيبلك خبر ابوك
كتله عمووو منطقتنه كلش خطره و كل الي بيها نزحوا
كالي اني ادبرها
انطيته كل معلومه اعرفها
صدك بعد 3 ايام
اهئ اهئ اهئ عمووو خابرني كالي اندليت مكان ابوك
التليفون وكع من ايدي و كمت ارجف و ابجي
انوب ماعت روحي
كعدوني سحورة و امها و كامن يهلهلن
يااااربي معقوله هالشي
بيني و بين نفسي كلت نذر علي اذا رجع ابوي الي اذا صار عندي ولد اسميه ابو الفضل
عمووو المعلومات العرفها
انو بابا راقد بمستشفى بالحويجة
و بلغني بهل الشي
انوب راح اله
بعد يومين اتصل بيه عموو
و كالي
هذا بابا يريد يحجي وياج
... يتبع
أنت تقرأ
السبية بلا سبي
Cerita Pendekقصة واقعية، تتحدث باللهجة العراقية عن محنة فتاة افقدتها الحرب اعز ما تملك بهذه الحياة
