السبية بلا سبي

الاخير

عمو راح يم بابا بالمستشفى
و اتصل عله خالتو ام سحر
و كاللها انطيني دنيا
ابوها يريد يحجي وياها

عموو كالي هذا بابا
اني مصدكت
معقوووله اليموت ترجعله روحه من جديد
اني جنت ميته معقولة ارجع و التم ويه اهلي؟!!
اي بابا كالي حبيبتي دنيا اابنيتي شلونج؟!
و خطيه كام يبجي
حسيت من نبرة صوته الضعف و التعب و الارهاق
كتله اي بابا اني دنيا اني زينة بس
انته ما تعرف الدنيا اشسووت بيه
اني مهضومه و خايفه يا بابا
بابا كالي حبيتي اهدأي خلي افهم منك
امج وين انتي وين هسه؟
كتله امي نزلوها المسلحين من السيارة الصعدتنه بيها
و بعد ما اعرف عنها شي
و اني لا تخاف عليه بايدي امينه
كالي بابا اشلون متعرفين شي عن امك هاي مصيبه يا بوويه
كتله كمشت بيها و ضربوني ع راسي بالاخمس
كالي حبيبتي شدة و تزول ان شاء االله
كتله بابا و انته شلونك
كالي اني بخير اذا انتي بخير
كتله بابا صوتك مال واحد كلش مريض و تعبان
كالي اطمأني اني بخير
و اني اخذ رقم هذا الرجال الطيب و انطاني عنوانك بكربلاء
و اني اول ما اصير زين اجي اخذك
صدك
بعد فترة عرفت انو

بابا طلعت مبتوره رجله اليمنئ بالانفجار و عنده تلف بالامعاء
اكو شضايا داخله ببطنه
و شفائة يطول و يرادله وكت و بعد ما ترجع اله صحته و عافيتة الاولية

اهل سحر بكربلاء من بابا امني يمهم
بقوني يمهم و كالوا اهلا و سهلا بيج منا لمن تملين منه
و اخو سحر هذا المشاكس
لح ع اهله حتى يخطبوني اله
سحر لمحت الي
و اني رفضته بحجة ما امفكرة بالزواج
الكارثة
و بصراحة وليد شغل كلبي و خطفه مني
رغم اني مفجوعه و ما مفكرة لا بزواج و لا اي شاب
بس من ترجع ذاكرتي اله
احنه اله و اشتاقله
و اتمناه يمي و الي يصير

اه امي سودة عليه
ما لگينها لحد الان
حت من بابا صار زين و اخذني
ظلينه اندور بكل مكان عنها و ما عرفنه عنها شي

 ما ندري انسبت لو اتأسرت لو انقتلت

ما لكينها لحد الان ابوي ما بطل يدور عليها يسئل عليها ويه السبايا بكل مكان حتى خارج العراق
و كلما يسمع اكو مقبرة جماعيه مكتشفيها يروح الها
بس من غير جدوى
اي بيتنا متفلش و منهوب و محروك
و السيارات نفس الشي
بس بدام بابا عايش كولشي يرجع
اني عشت فترة حلوة ويه اهلنا بكربلاء
عرفت اطباعهم
و عاداتهم و تقاليدهم و عرفت هم شكد مظلومين و مسالمين
الله يجزيهم بالخير ما قصروا ويانه
و الي تهجروا يشهدون الهم بهاي
المهم
رجعنه لديرتنا و رجعنه لحياتنه شويه شويه
و لهسه ما انقطعت علاقتي ويه سحورة و اهلها
انوب اني الشوق لوليد
سل روحي و ضعفت
و كمت اسرح و ما اشتهي الاكل
ما اعرف اخباره ما ادري بي بعده عايش مات
كلبي احسه ينزف ليل نهار
بين مصيبة امي المفقودة و بين شوقي لوليد
انوب سريت وحدة من بنات عمي
و الحقيرة طشت سالفتي
و وصل الخبر لابوي
ابوي زلمة معدل و يدري ببنته مربايه و ما تزل
فسئلني عن وليد منو ؟!
فكتله كلشي عن وليد
فكالي من باجر انروح اله و انشوفه بديرته
طبعا اني طرت من الفرح و ما كدرت اضم فرحي عن ابوي
ابوي متزوج امي عن حب و عايش هذا الشعور
و كالي طك بطك
ما احصل احسن من هذا الشاب الشهم
ااامن عنده بنتي
اني اعتلگ كلوب احمر بخدودي
و سويت روحي ما اريده و لا امفكره بالزواج
عود ع اساس بس اريد اعرف اخباره
المهم
وصلنه لديرته
لكيناه متصوب
بالغارة
بس بعده شاب
الحمد لله متعافي بس عند اصبعه الخنصر مبتور
المهم هو من شافني هم فرح
و كانت نظراته الي نظرات شوق و وله
عرف عنوانه من ابوي
و كال لازم نجي انزوركم و نتعرف اكثر عليكم
و يباوع عليه ابن الاوادم
صدك وره فترة اجه هوه و اهله و خطبني
و اني بعده ابوي ما سائلني
اول ما اجه عليه
كتله اي اي موافقه
انوب انتبهت لنفسي و ضحكت
كتله اسفه بابا اقصد افكره
ههه
ابوي عرف الجواب
و صارت الموافقه
و تم الزواج
و بالخطوبه كتله وليد اذا صار عندي ولد نذرت اسميه ابو الفضل خو ما عندك مانع
كالي لا
و اني هم مثلج
حبيته و اتمني اذا اتزوجنه انروح سوه و انزوره
صدك الله رزقني ولد منه و سميت ابو الفضل
و بين فترة و فترة انروح لكربلاء
هم انزور و هم نروح لاهل سحورة
و وليد ظل شهم و زلمه معدل و عيشني اميرة و ملكة
حبوب و طيب و كلبه رقيق و يحبني

بقه بس شي
اني ندمانه عليه
من قصدت ابو الفضل عليه السلام
و نخيت الله سبحانه وتعالى بجاهه
لو طالبه امي و ابوي مو بس بابا
و كل ما قصدته مرة ثانيه
و احاولت اوصل لنفس الخشعه الاولى و اطلب من الله امي
ابد ما وصلت الها
معرف شبيه كلبي هسه
المهم هذا حالي اشلون انسبيت بلايا سبي
فكيف حال الي انسبن صدكككك؟!!!

كان الله بعونك يا بلدي

وداعا

دنيا

النهاية.