ليه بعاند تانى نفسي
وارجع اكتب م البدايه
نفسي القى نفسي كاتب
حاجه مختلفه بحكايه
نفسي اكتب فرح عمرى
واوصف الليله الجميله
ولا اكتب عن صحابي
ليلة الحفله الشهيره
او الاقى نفسي بكتب
وصف للعالم وناسه
كل احلام الطبيعه
اللى ضاعت فى احتباسه
نفسي ارسم من حروفى
كلمه تحفرها المعانى
نفسي ابقى حرف تانى
نفسي ابعد عن حروفى
حرف شارد ..حرف غايب ..حرف عاند
حرف حالف عالشجن
مايحل عنه بابتسامه
عاوز اكتب الوان كتيره
لون لوطنى لونه لونها
والحالات اللى فى بلادى
شبه نيلها لون سمارك أرض طينها
وانتظارى للمعانى اللى فى حضورها
شخص تانى هيغازلها
فجأه تصبح
ضايعه منى
ليه حروف الفرحه بعدت تانى عنى
هو انتظار النشر عامل لى انتكاسه
ولا غياب الراحه محتاج انتظار
مش هبطل تانى احاول الاختيار
راح اعيد الحرف تانى والحوار
وأبدأ اللحظه اللى فيها الكل قال
أحسنت الكتابه... أحسنت اختيار
لسه واقف فى انتظار
لسه حرف حاسس بالمرار
شيء بعيد الوصف لكن فين حصار
حرف ماضي وهم حاضر
حنين وشوق وكسر خاطر
حرف يبعد عن حياته للخيال
ووصف تاني يحكي كلمات انتقال
حرف شارد
دمع ماضي
ولنفسي بوصف فى الكلام
نفسي يسكن جوا مني
معني تاني للحروف
نفسي يهرب مني خوف
#كرم_محمد_حربي
أنت تقرأ
أحاديث المساء(قصص،خواطر،مقالات، قصائد)
Diversosحرفٌ يكتبما تحدثه به الظنون، وحرفٌ يكتب من خيالات الشجون، وحرفٌ يرسمُ الحركات قصصا وحكايات، وحرف ثار على ما لايُريد فمات. هنا بيت القصيد، وبستان يفوح من عطر حروفه، هنا المعاني والسحر والدلال، هنا الشجن ودموع الحنين.
