LAKI
Aku benung jenak lebuh tubuh aku asaika ditegu ari belakang.
"Dani nuan wai. Berapi. Lapar amat aku."
Aku tuchum ninga sada nyawa laki aku. Belubah aku mulir mata lalu angkat nuju dapur. Kasihka tudah nyau lapar laban laun pulai gawa. Tilik aku jam ba dekuan, pukul 3.00 dinihari dalam. Pandukka aku lauk enggau asi. Riruhka aku ai kupi. Pengudah tembu aku lalu nyendiaka diri deka nganjung pemakai nya ngagai bilik peninduk kami duai.
Lebuh ti bejalai mansa bilik besai, aku tepedaka gambar laki aku ti didudukka aku ba atas kabinet, berimbai enggau dian ti ditungkun aku dua batang ba atas nya. Tekala nya aku pan lalu ingat.
"Ryan udah nadai. Enda patut iya ulih pulai idup baru!"
Ati aku lalu naka penakut-nakut. Sada nyawa iya ngangau ari bilik peninduk ngasuh aku majak takut. Baru deka ngebuka diri nuju pintu penama laban deka pansut ngelarika diri, sepi aku jari aku dipegai orang. Chelap. Asai ais.
"Ka kini nuan wai?"
"Anang! Anang ngachau aku! Nuan udah mati!"
Aku nipas pegai jari Ryan ba jari aku.
"Enda patut nuan enda ingatka diri rerangai nyabakka aku ninting malam wai… minta ambi dibai aku pulai ke sebayan. Madahka serebana diri ditinggalka aku. Diatu aku datai ngamatka peminta nuan."
Ryan merap tubuh aku. Dibai kelalu takut enda berasai aku pan lalu tejula luput.
.
.
.
.
.
Lebuh aku nyau ngeleda, aku tekenyit nemu diri udah dalam sentubung Ryan, sambil jari Ryan ti udah mupuk luluh sereta bau but… makap tubuh aku.
Bendar aku mandam pintu sentubung, seput majak pedis disintak laban ti kurang oksigen dalam sentubung nya. Pia aku sendat seput, pia ga bau but tubuh Ryan majak nempuh senempuh disirutka idung.
Ai mata aku bekeberai. Mati mih aku, sigi nadai jalai idup. Nadai siku nemu sereta ninga. Aku mejamka mata. Seput majak pandak, majak lubah.
***
...Tiga minggu sebedau nya…
Ryan merap aku ari belakang lebuh aku benung manduk lauk di dapur.
"Bau rengut amai lauk panduk nuan wai.. tak semuti datai aku di rumah tu ngenatika diri enda sabar deka makai lauk dipanduk nuan."
Aku tuchum ninga jaku iya. Ryan nulung aku berenah. Kami duai seretai makai tengahari nya. Tembu makai Ryan nulung aku bebasu pinggai. Mentas amai iya enggau aku.
Tang sayau, pengerindu aku nadai ke iya. Ati aku ba lelaki bukai.
Ryan nyuaka sekepin kad bank ngagai aku. Kad platinum. Nadai limit mansutka duit. Makin besai tuchum aku.
"Nuan madah empailama tetenguk deka meli gelang emas COCO nya. Beli aja nama utai dikedeka nuan. Lagi aku ngasuh Radit nganjung nuan."
"Nuan empu enda ulih, sulu?"
Ryan tuchum seraya nyium kening aku.
"Nitihka ati aku ka mih tang lemai tu lagi bisi klien ari Singapura datai deka berandauka projek baru kami ila. RM26 juta, kumang. Sayau enti kaul bisnes kami enda mujur. Aku ti bendar ngulihka duit tu ketegal nuan, Tiana. Aku deka meda nuan idup senang."
"Hmmm.. enda ngawa mih. Minta ampun laban enda meretika pengiruh nuan ba opis din. Sorry, hubby."
Aku merap tubuh Ryan rat. Enda lama udah nya Ryan mupuk pulai baru ngagai opis mai kerita kediri. Aku mega udah tama dalam kerita ti dibai Radit, deriba kami duai Ryan.
"Ka kini nuan sehari tu, Madam?"
Aku malik ngagai mua Radit ti bejaku nya.
"Madam pia? Ukai Honey agi?"
