نص ألي و نص لعيالك

بارت 4

غفران انطت 10 للطفل و شرطت عليه كون هسه يعزل
انوب راحت للصيدلية اشترت الگطره
و من رجعت لگت الطفل بعده بالترفيك
بس گاعد تحت فيي شجره و يمها اكو كارتونه مسويها مثل البيت
راحتله
من اتقربت عليه شافت اكو يمه طفله ازغيره
فگالت اله خااله مو گتلك تعزل و ترجع للبيت و بعدين منو هاي الطفلة الوياك ؟
الطفل اي خاله صح
غفران ليش لعد مرحت
الطفل خاله مو كل يوم ابو مناف ابو الستوته جوارينه اليبيع مي ارو R.O
يمر علينا بالوحده الظهر من يعزل و ياخذنه وياه
غفران يااااا عزززه شلون تصعدون ويه ابو المي ارو ؟! لان حتى بدي مابيها الستوته اذا يبيع مي ارو
الولد عادي خاله متعودين احنه
غفران زين منو هاي الزغنونه و ليش جايبها وياك لهنا !!!
الولد خاله هاي اختي فطومه و اجيبها وياي لان ابوي اعمى و ميشوف 😭 و اذا اخليها يمه انخاف عليها
بعدهي طفله و انخاف تاذي نفسها💔 و محد يدري بيها
غفران تعال اگعد و فهمني كلمة كلمة
يمممه راح تموع روحي
ماماتي شنو ابوك ليش ميشوف و امك ووووين باقي البلبيت وووينهم؟!
الطفل تذكرين خاله مطرت العام القوية
غفران ااايي
الطفل من مطرت هاي المطره القوية سگف الغرفة النايمين بيها وگع علينا كليتنه
و خشبه ضربت راس ابوي و انعمه بعد ميشووف و امي و اختي الچبيره ماتن من وگع علينا السگف
و اني و فطومة طلعنه ما بينه شي
غفران شبگت الطفلين و ضمتهم لحضنها
و كامت تبجي عليهم و حالهم
و كالت يااااا ربي دخيلك يا ررربي شنو هالكارثة
معقولة اكو بهاي الحياة هيج ناس متعذبه و ماره بيها كل هاي الظرررروف ؟!

غفران  من سمعت مصيبة هاي العائله المنكوبة
داخت من هول ما سمعت و راد يغمى عليها
انتظرت الاطفال لحد ما اجه ابو الستوته و اخذهم
انوب رجعت للبيت و على طول الدرب تحمد الله و تشكره على النعيم العايشه بيه كانت حسبالها هي اتعس انسانه بهاي الحياة طلعت اكو مصايب بالدنيا ميصدگها عقل
وصلت للبيت لگت الدنيا مگلوبه هناك
گالت لمها شكو
گالتلها مصطفى من زمخ على هاجر هاجر خنست و راحت لغرفتها
بس مصطفى من برد مشه يتوسل و يترجى بيها
عود شلون صييح عليها
و هاي من شافته يتوسل و يترجى بيها
رجعت لطنگورتها و چلبت شلون  تزمخ عليها و تعلي صوتك بوجههي
فلعبت لعب من صياح و عياط و گامت تمشي و تكسر كلشي يصير بالبيت گدامها
و من عصبيتها ضاربه الجامه بيدها و كاسرتها
و صاير عدها جرح و نزيف و مصطفى ماخذها للمستشفى يعالجها
غفران اسودت الدنيا بعيونها
كانت متوقعه هاجر مراح تسكت لكون مصطفى زمخ بيها گدامهن بس مكانت متوقعه ان الامور تتازم لهذا الحد !!
انوب
اتلگتها امها تلطمع على وجهها و تعيط يمه ليش هيج سويتي بيه يمه ليش سودتي وجههي اليوم اخوج يكتلچ خلاص
غفران بينها و بين نفسها حرامات كان هذا اليوم ببدايته اجمل يوم عشته بحياتي و هسه شويه شويه دا يصير امبين اظلم يوم بحياتي
بس الله كريم و الحمد لله على كولشي
بهل الاثناء اجه مصطفى و وياه مرته مضمد ايدها و هيه تسوي روحها تتماوع
هوه حاضنها عود اخاف توكع و ع اساس ما تكدر تمشي
فصعدها لغرفتها
و اجه و بيده حزام بنطلونه نازعه و قميصه نص طالع من بنطلونه و نص بعده جوه
و اجه بلگوه يمشي و صاير وجهه اصفر مثل الكركم و الشر يچدح من عيونه يريد ينتقم لمرته
لكون غفران كانت السبب لكل هذا الي صار بالبيت
اي اجه لغفران و لزمها كتل كتل لحد ما طفر الدمها على هدومها وگعت مغمى عليها
ياله عافها و فات حالها
ثاني يوم البيت هدوء كلمن ساد غرفته و محد يحجي ويه الثاني حتى احمد ذابها على الصنته
و اخوها مصطفى گاعد گدام باب غرفته و مرته ساده الغرفه من جوه و هو بس يحرمص و يتوسل بيها بلكي تسامحه و تغفرله
ظلينا على هذا الحال كم يوم و امي صعد ضغطها و السكر مفوول بعد شويه و يوگف كلشي بجسمها
بعد اذلال مينوصف هاجر قبلت اعتذار مصطفى و گامت من يسلم عليها و يكلمها و مره ترد عليه من وره خشمها و مره تطنش
و احنه نمشي مدنگيني اني و امي من نمر من يمها اخاف تگول خزرنني لو باوعلي صفح انخاف تهيج علينا و تحرض مصطفى مره لخ علينا
بعد مرور فترة قصيرة ، قرر مصطفى تلطيف الاجواء مع زوجته و استغلال مناسبة عيد الحب لتجديد الحب و الود مع زوجته هاجر ، فحجز رحلة الى شمال العراق لمدة 3 ايام للترفيه و الاحتفال بعيدا عن اجواء البيت التي باتت جافه و باهته رغم انه كان يشكي على الدوام من غلاء المعيشه و قصر يده في سد احتياجات البيت و العائله الا ان الامر حينما تعلق بارضاء هاجر زوجته فقد ذللت كل الصعاب و باتت الاموال ليست مهمه و يمكن تدبير اي مبلغ كان
و هنا سنحت الفرصة الذهبية لغفران
من جانب سيبتعد غريم النجاح ( هاجر)
و كذالك فان عيد الحب الفلنتايم مناسبة مهمه لتقديم الهدايا المميزه
غفران : دزت حمودي ل سجى گالت الها بكره بالثامنه انودع اخي و زوجته انتي بالثامنه و النصف يمي
و فعلا سافر مصطفى و زوجته هاجر حسب الموعد
و اجت سجى دون تاخير
غفران تسئل سجى شنو الهدايا الي الناس تتبادلها بهاي المناسبة
سجى دباديب لونهن احمر و كلما يكبر الدب يكون احله
غفران و بعد
سجى يعني وردة حمراء اي شي حلو و مميز
غفران صفنته شويه
و گالت الگيتها اسوي كيك اسفنجي مميز على شكل گلوب حلووه و مفرحه
سجى اي و ااالله خوش فكرة لج انتي عبقريه
سجى بس اكو مشكله
غفران خيررر
سجى لج الكيك لازم ينحفظ بتبريد و يرادله حافظات خاصه و لا عندي و لا عندج هيچ امكانية !!
و العيد بعد تلت ايام
يعني وين انضمهن و وين انجمعهن
غفران بسيطه
بس هسه انتي خابري اخوج خلي يجيب هاي المواد و ادخلي عالنت طلعليلي شلون يسوون الكيك بطريقه حلوه و جميله
سجى تقصدين عاليوتيوب
غفران ما ادري انتي تعرفين بهاي السوالف
و فعلا بدت غفران بصناعة الكيك و سوته على شكل گلوب بطريقه حلوه و مبتكرة شي مينشاف بس بالافلام و الصور
هنا سجى سئل بيش السعر اكتبه
صفنة شويه غفران و حسبت تكاليف الكيكة الوحده

و گالت اكتبي السعر 15 الف دينار و 5 توصيل يصير السعر 20
سجى انصدمت من السعر مثل المره السابقة بس هالمره ما اعترضت لان بدت تثق و تتعلم شويه شويه من غفران
و فعلا صورت سجى الكيك و اخذت الصور من جوانب جميله و كان طريقة عرض و تقديم الكيكه كله فيكات و فن و روعه
و رادت تنشر النشر
بس غفران گالت التوقيت مال النشر اله دور بتفاعل الناس يعني اذا ننشر من الصبح كلش او وقت الظهر محد راح ينتبه للنشر و يروح تعبنه
گاااالت سجى باهتمام و اعجاااب اااااي و اااالله كلامج صح
زين و بالنسبة لحفظ الكيكة شلون !!
هاي الناس متعوده تحجز و من تصير المناسبة تريد منتجاتها
گالتلها بسيطه اسوي عشرين كيكه فقط و انشر صورهن و نكتب هاي الكمية و الوحيدة الي عدنا و القطعه تكون من نصيب اول شخص يطلبها و يستلمها منا
سجى انذهلت و انبهرت بحذاقة و ذكاء غفران
و عالسريع نشرت  النشر
و اذا كم هائل من الاعجابات و التعليقات و المنشور بفتره وجيزه صار بيه مئات التعليقات
و بعد نفاذ الكمية .. بدى بعض المتمكنين يزودون بالسعر مقابل ان يحصلون على احد تلك القطع
و اكو واحد بالذات كان يلح بالطلب و يريد يحصل على اي قطعه منهن و باي ثمن
بس غفران التزمت بكلامها و وعودها لكل من حجز يمها و ما فضلت الي زود بالسعر على الي حجز بالبداية
المهم جميع القطع انباعت وصار هسه بين ادين غفران مبلغ 300 الف دينار بغضون كم ساعه
حسبت التكاليف غفران بعد ما انطت لسجى مبلغ 20 الف دينار و رفضت تسميه حصه او شركه من انطتهن لسجى گالت هاي بمكان تعبج وياي صار مجموع التكاليف 120 الف دينار
و الربح كان 180 الف دينار
عاد قسمة المبلغ و گالت 90 الي ولماما و 90 لعيال الله ( الفقراء تقصد و المحتاجين )
و اول ما فكرت بالولد الي بالترفيك هو واخته و ابوه المعاق
راحت لامها گالت يمه شرايده شمشتهيه من السوگ
گالت الام يمه بس سلامتچ
گالت غفران اقسم عليج بروح بابه تگليلي شنو المعتازته كلش و محد يدري بيه
گالت الام يمه ممحتاجه شي
گالت غفران حجيه مو حلفتچ بالغالي
چان تنفجر الحجيه بالبچي و گالت يمه اني بهذا العمر الي امبهذلني بس الوجع البجسمي
گالت يمه اول مره ادري بيچ  تشكين من الم لو وجع
گالت يمه اخوچ ما ليحگ على هاي الدنيه و اني ما اريد اصير فوگ الحمل تعلاوه
غفران غرغرت عيونها بالدمع و گالت يمه احجي تره راح ابجي و الله
الام گالت يمه رايده انسولين مال سكر و رايده شريط مال ضغط
گالت غفران عزه كل هاي الامراض البيچ و انتي متحمله و ساكته هسه اروح للصيدلية
و فرحت غفران بروحتها للصيدلية حتى تمر بالترفيك و تشوف الطفل هو واخته و تسد احتياجهم و تساعدهم
لانهم احوج ناس للمساعده و هم بالفعل عيال الله

.... يتبع