نص ألي و نص لعيالك

بارت 5

راحت غفران للصيدلية و بدربها مرت ع الترفك حتى تشووف الولد ابو العلوجه و اخته
وصلت غفران للتريفك لگت الولد هو واخته ماكو
باوعت مره لخ يمنه يسره ماكو
اتمشت لشرطي المرور گالتله عموو اكو فد طفلين كانو هنا الولد يبع علوچه واخته الزغيره مسويلها مثل البيت جوه ذيك الشجرة
گال الشرطي و الله ما ادري بس اول امس صار هنا حادث كلش قوي و حتى عالفيس نشروا الصور و وحده من السيارت قلعت الشجره الي اشرتي عليها
غفران تركت مشوارها و رجعت للبيت و لا راحت للصيدلية و لا اشترت شي ،، كانت خايفه على الاطفال اخاف صار بيهم شي
من وصلت دزت على سجى
سجى ها غفرونه
غفران افتحي الفيس و طلعيلي صور مال الحادث بالترفيك
گالت سجى اي و الله شلون حادث مرعب
طلعت الصور
غفران تگلب الصور صوره صوره بحذر و تدقق كلش بكل اجزاء اي صوره
سجى تباوع و متدري شنو السالفه
لحد ما غفران علا صوتها بالصلوات و التهليل 😍😍
سجى استغربت ولج شبيج هاي شدا تشوفين صور حادث لو فرح !!!
غفران كمشت ادين سجى و گامت تفتر بيها بالغرفه من الفرح و تصيح ولج فطومه و اخوها شفتهم مبيهم شي طالعين سلامات من الحادث
ثاني يوم غفران راحت للصيدلية و مرت بالترفيك ، هم ما لگت الطفلين
ظلت تمشي و تفكر وين تصرف فلوس عيال الله
وصلت للصيدلية شافت حجي گاعد بباب الصيدلية و حاط ايده على خده ،، عبرته و دخلت للصيدليه راوت شريط حب الضغط مال الحجيه للصيدلاني گام يضحك گال هذا الحب منقرض اثري مين محصلته
گالتله شلون مفهمت
گال الصيدلي عيني هذا النوع مختفي من المذاخر من سنوات طويله !!
گالت هاااا زين على معرفتك اريد دوه زين و مقارب لهذا الدوه
عاد انطاها العلاج
من طلعت شافت الحجي متكدر و واصل لاقصى درجات الياس و الاحباط
گالتله عموو مو تطفل بس اني مثل بنتك خيرك محتاج شي
گال الحجي يبويه سلامتج بس محتاج دعاءك
گالت عموو المن ادعي
گال وليدي الله يبعد عنج سيوفي عمره 12 سنه بيه الخبيث الله يبعد عنج و عن امة محمد (ص)
گالت يااااا ااالله يشافيه بحق محمد و ال محمد
و انوب گالت اني مو كل يوم اگدر اجي خلي اخذ كميه اكبر من هذا الدوه
فرجعت للصيدلي و گالت انطيني بعد كم شريط من هذا الحب
الصيدلي تفضلي
غفران تسئل الولد الصيدلاني هذاك الحجي شبيه و ليش گاعد هالگعده
الصيدلي هذا عنده علاج لابنه كيمياوي و العلاج كلش غالي
و موجود بذيك الصيدلية فقط
و الحجي معنده و ابو الصيدلية ما عنده رحمه و لا رأفه
غفران زين ماكو مركز لهاي الحالات من الدولة
الصيدلي اي اكو مركز للاورام السرطانيه بس الادوية الظرورية مفقوده و عزيزه و بس العنده واسطه لو فلوس يحصلها من هناك
غفران لا حول و لا قوة الا بالله
هذا حالي المعاجبني احسن بهواي من الكثير من الناس
غفران شكد فلوس العلاج
الصيدلي تقريباا 200
غفران حسبت فلوسها بعد شراء العلاج طلعن كل الفلوس الي عدها ويه فلوس عيال الله 140 الف دينار
غفران راحت للحجي عموو اول شي اني مثل بنتك ثاني شي عرفت من الصيدلي مشكلتك فماحاجه تظم عليه و الناس لبعضها
غفران عمو شكد عندك فلوس !!
الحجي عموو بس 50 بالگوه دبرتهن الله شاهد عليه
گالت عمو و اني مني 140 يصير عدنه 190
كان يصيح الصيدلي و اني مني ال 10 و الله شاهد لوما اني عامل هنا بالصيدلية لكان انطيت اكثر
غفران رغم انها صرفت مره ثانيه كل الفلوس الي كسبتهن رجعت سعيده و تريد تطير من الفرح
ثاني يوم
اجتها سجى على الموعد .. و لگت غفران كلشي ممسويه
گالتلها ها ولج اشو كولشي ممسويه بس لا غرتچ الفلوس و ابطرتي على نعمت ربچ
گالت غفران لا
بس اريد استغل هاي الفرصه اوسع استغلال
و دايخه شلون اسوي كيكه ام الطوابق
سجى خرب عقلچ لج انتي داهيه بالذكاء شلون خطرت ع بالچ هاي الفكرة الجهنمية
كالت غفران ببرود اي انطيني فد حل مو بس سوالف
گالت سجى بسيطه انروح لابو عماد النجار جارنا و هو يسگم النه كم واحد
ردت عليها غفران باستهزاء ولج قالب كيك من مناسبات من خشب !!!
گالت سجى بعزيمه و اصرار ولج احنه هم نرتبهن بعد و نخليهن حلوات
و لا تنسين القوالب الغالية يطلبون عليها تأمينات و لازم يرجعوهن بس الي راح نسويها ياخذوهن الهم
غفران عجبتها الفكرة و شافت كم مقطع عاليوتيوب
و سوت شغل خرافي و بنفس الطريقة نشرت النشر
گالت الكمية محدودة هاي المره 20 قطعه فقط و الاسبقية لمن يستلم القطعه اولا
و السعر هاي المره 40 الف دينار و 5 توصيل
و بغضون دقائق بدت تتهافت عليها الطلبات و الحجوزات
و بنفس الطريقة عن طريق اخو سجى تم تسليم القطع و استلام اثمانهن

للعصر گعدت غفران شافت ابين اديها صار 800 الف دينار
و هذا مبلغ كبير جدا على اي بنيه بدت حياة عمليه و جديه و بالاعتماد على نفسها و مواهبها و حبها للحياة
حسبت الربح طلع تقريبا 500 الف دينار انطت منهن 50 لسجى كتقدير لجهدها وياها
بقن عدها 450 الف دينار
و كالعادة گسمتهن بالنص نص قررت تشتري بيه اشياء للبيت و الها و لامها و لاخوها و لحمودي ابن اخوها و حتى لزوجة الخوها هاجر
فكرت هي تشتري فستان حلو مال طلعه حتى من تصير مناسبه بعد ما تطلب من البنات ثياب حتى تلبسهن و فكرت تشتري لامها عباية جديدة لان عبايت امها صايره حمره و مشرشبه من جوه و فكرت تشتري قاط مال طلعه لاخوها مصطفى و بايسكل لحمودي ابن اخوها و جبه مال طلعه لمرت اخوها و للبيت فكرت تشتري قنينة غاز لان بالبيت دبه غاز وحده و كلما تخلص يظلن حايرات بالطبخ
ههه حلمت زايد لان المبلغ العدها ما يوفي كل هاي الاماني

... يتبع