梦想 (Dreams) [One Shot]

Unicode

ညနေခင်း မှောင်ရိပ်သန်းစအချိန် ။ ချန်တိုင်းပြည်၏ နန်းမြို့တော် ။

ပုံမှန်ဆိုလျှင် ဤအချိန်မျိုးသည် အင်မတန်ကိုလူသူစည်ကားသည့်အချိန်ဖြစ်သည်။ ယခုမူကား လမ်းဘေးဝဲယာဈေးဆိုင်တန်းများ အားလုံးဖျက်သိမ်းထားပြီး လူသွားလူလာမဆိုထားနှင့် ခွေးတစ်ကောင်ကြောင်တစ်မြီးတောင် အစရှာမရချေ။

ခမ်းနားကြီးကျယ်သည့်မြို့တော်ကြီးက တိတ်ဆိတ်ငြိမ်သက်လျက်။ မင်္ဂလာရှိသည့်မီးပုံးနီများ ချိတ်ဆွဲရမည့်အစား အမင်္ဂလာသဘောဆောင်သည့် မီးပုံးအဖြူများကို အိမ်ပေါက်စေ့ချိတ်ဆွဲထားသည်။

လမ်းမတစ်လျှောက်တွင်လည်း သေဆုံးပြီးဝိညာဉ်ကိုပူဇော်သည့် စက္ကူများနှင့်ပြည့်နှက်လျှက် ။

အသင်သာ လူနေအိမ်များအတွင်းသို့ နားစွင့်ကြည့်မည်ဆိုလျှင် မတိုးမကျယ်သော ငိုရှိုက်သံကိုကြားရချေမည်။ တူညီဝတ်စုံဖြူတို့ကို ဝတ်ဆင်ထားသောပြည်သူတို့ကို မြင်ရပေမည်။

ဤကား နိုင်ငံတော်ဈာပနပေတည်း။

________________________________

"အရှင်မင်းကြီး ကြွချီလာပါပြီ !!!!"

ညီလာခံခန်းမအတွင်းသို့ ရာဇအိန္ဒြေအပြည့်၊ တည်ငြိမ်ရင့်ကျက်သောအသွင်အပြင်နှင့် လှမ်းဝင်လာသည်က တိုင်းပြည်၏ အသစ်စက်စက်ပြည့်ရှင်မင်း ပိုင်လီဟုန်ရီဖြစ်လေသည်။

အသစ်စက်စက်ရှင်ဘုရင်တစ်ပါးကား နဂါးဝတ်ရုံတော်ကိုဆင်မြန်းထားခြင်းမရှိ၊ အဖြူရောင်နဖူးစည်းကိုစည်းနှောင်လျက် အဖြူလွလွ အသုဘဝတ်စုံကိုသာ ဆင်မြန်းထားလေသည်။

ညီလာခံခန်းမအတွင်းရှိ မှူးမတ်များအားလုံးသည်လည်း အသုဘဝတ်စုံကိုသာဆင်မြန်းထား၍ နှလုံးသားနုသူတစ်ချို့က ခေါင်းငုံ့၍ မျက်ရည်ခိုးသုတ်နေလေသည်။

အရယ်အပြုံးကင်းမဲ့သောမျက်နှာထားနှင့် ရာဇပုလ္လင်ပေါ်တည်တည်တင်းတင်းထိုင်နေသော ပိုင်လီရှင်ဘုရင်ကား ကြည်ညိုဖွယ်အတိ။ နှုတ်ထွက်စကားတစ်ခွန်းစီတိုင်းက မာန်အပြည့်နှင့် တိကျစွာထွက်လာသည်ချည်းပင်။