الجنة ليست لها

البداية

وصلت للبصرة والجوو حار يكتل
هية بغداد تشوي شوي مو عاد البصرة
ظليت ادور على بيت خالي حسب العنوان الي اطته الي امي ومن سؤال السؤال  اندليتهم
دكيت الباب طلعولي كومة جهال ناس تركض قبل ناس حته يشوفون منو دگ بابهم
كتلهم ابوكم وين
وهمة مفهين بوجهي
ههههههه بس والله حلوين كولهم شكران وعيون ملونه
طلعت وراهم مرة ماعرفتني ولا عرفتها بس على الاكثر مرة خالي
سألتني منهو انته
كتلها هذا مو بيت خالي سالم
كالت وصلت
منهو انتة
كتلهة اني ابن جبريه حماتج اخت سالم رجلج
يعني سالم يصير خالي واني اسمي عبدالله

ضحكت وهلت ورحبت بية اني اعرفها فطيرة الى درجة الغباء لذلك فصخت هويتي كدامها حتى تعرفني

خطيه خالي ورطو وزوجوه هاي الفطيرة وظاله بس تكوم جهال علي
وهوة رغم مريض يشتغل ويعيشهم

دخلتني جوة واني اكمز من امشي لا ادوسلي جاهل من جهال خالي الي ماعرف عددهم شكد

قدمتلي مي شربت من عطشي وكتلها من رخصتج الدولكة انطيها الي اشرب منها عطشان والطريق طويل بهالحر
صكيت الدولكة وسألتها على خالي
كالت بعدة بالمحل ماجاي اصبلك تتغدة
كتلها لا اروحله للمحل وارجع وياه
طلعت منهم
وقبل لا اوصل للباب الخارجي الي هية من ظمن البيت
بيوت البصرة قديمة ومعروف تصميمهة
باب الخارجي داخل البيت من ظمن الحولي
يعني تفتح باب تطلع للشارع مباشر ماكو كراج او طرمة
لا هوة باب هوة داخل البيت
المهم
جانو بنات ثنين واكفات بعمر توة شابات تقريباً 16 او 15 سنة
اكيد بنات خالي الكبار ذني
درت وجهي وطلعت السوك قريب من بيته
وعالوصف وصلت الة سلمت علي
وتلكاني خالي بالاحضان مكيف بيه ابن اخته وراح ابقه يمة هاي الفترة موضح اله سبب بقائي
والرجال ماعدا اعتراض بالعكس مكيف بية

ماعرف شنو المعنى من النقل للبصرة واني ماباقيلي بس شهرين عالتسريح
شمروني هالشمرة تقضي المدة مالتك وراها تستلم كتابك

هم ميخالف بس كون نخلص مو ثلاث سنين عبالك دهر
اني مستحي منه ماريد ازاحم علي
بس امي وصتني من تروح للبصرة تمر الخالك وبات عدة من تنزل مجاز
عدي بعد خال لاخ بس ذاك عدة جناين وزحمة
اقلها هذا خالي سالم بناته زغار وكلهن شهرين ورجع البغداد يعني بس نزولين عدي

المهم والله 27 يوم التحاق وسبعه اجازة ابيت خالي
وفد يوم جتي يمهم اختهة المرت خالي سلمت عليها وريد اطلع
صاحتني كالت تعال احاجيك ليش مستعجل
رجعت كعدت يمهة ولنهة تسالني بعد التسريح شناوي تسوي
كتلهة ارتاح فترة والكالي شغل
كالت او ورا الشغل شيصير
كتلها شيصير يعني
كالت ما ناوي تزوج
جاوبتها
خل  اسرح اول وشوف طريقي والزواج موجود وين يطير
كالت ليش ماتاخذ بت خالك الجبيرة احسن الك من الغريبه
صفنت وجاوبتها
بعدهن زغار
كالت والزغير يكبر كلهة سنه والثانيه تلكاها مرة شكبرها
كتلها الله كريم
صراحة ماخال ابالي الزواج هسة بس اريد اخلص المدة وسرح وتحرر مو طكت روحي
والله هيج وهيج خلصت الشهرين ورجعت البغداد راجعت التجنيد ونطوني كتاب التسريح