مساء الخير ، الساعة قاربت انه نبدي يوم جديد
حبيت انزللكم قصتي القصيرة تحجي عن قصة طفلة عانت كثيراً من هموم كهموم الكبار ..
لا تنسون التصويت ( نجمة ) وتعليقاتكم الحلوة ..
يلا نبدي بسم الله
#قراءة_ممتعة
_________________________________
من يوم وعيت على الدنيا واني اشوف ابوية يكرهني ، ما فد يوم حجه ويايه ولا باوع بوجهي ، اني هسه عمري عشر سنوات ، طول هالسنوات ولا مرة كعدت على سفرة الطعام ويه ابوية لان دائماً يأمر امي اذا هو موجود اني لازم ابقى بالغرفة وما اطلع منها ابداً ، واذا اريد اكل امي تجيب الاكل للغرفة .
ما فد يوم سمعته ذكر اسمي على لسانه ، ولمن يريد يذكرني يكول ( ذيج العرجة ) ، وكأنني اني الي اختاريت قدري ، هذا الشيء جان كلش يقهرني ويخليني ابجي بدون توقف .
عندي ثلاثة اخوان ، اني اكبرهم ، ورايه تالا عمرها خمسة سنوات وبعدين مرتضى عمره سنتين ، واخيراً حسن عمره ستة اشهر .
علاقتي بيهم كلش زينة بس اذا ابوية ماكو ، اما اذا موجود يأمرهم يبتعدون عني وما يحجون ويايه اي كلمة ، واذا واحد من عدهم خالف هذا الشيء يا ويله يا سواد ليله يضربه ، حته مرتضى الي بعده ما يفتهم يملخه ، لهذا امي كامت متخلي احد يدخل للغرفة ويشوفني بوجوده .
فد يوم جنت العب ويه تالا بلعاباتها ، جانت عدها لعابتين يتشابهن بس وحدة سمرة والثانية شكرة ، فتعاركنه على اللعابة الشكرة ، كل وحدة منه تريدها ، تالا كامت تبجي وتجرها من ايدي واني كذلك اجرها منها .
كلتلها بعناد
- لا هاي الي ، انتِ اخذي السمرة .
ردت وسط دموعها
- ناي ، لا السمرة الج ، الشكرة الي .
بينما وحدة تصيح على الثانية والهوسة كبت بيناتنه ، رجع ابوبة من الشغل بالمناسبة بابا يشتغل مدرس فيزياء ، اول ما دخل شافنه وسمع صياحنه ، اجه عليّ ركض وعيونه حمر من العصبية ، وعروك وريده بارز من كصته ، كالي بغضب وصياح
- ولج كم مرة كتلج لا تحجين ولا تلعبين وياهم ، بس انتِ جلدج يحكج .
راح جاب عودة الماسحة وضربني بكل قوته على ايدي ورجلي وظهري ، واني ابجي واصيح بس ماكو رأفة بقلبه بالعكس اذا يعلى صوتي من الوجع يزيد قوة الضربة .
