#قصص_الأنبياء(٢)
#السيرة_النبوية
#الحلقة_مائتين
#أحداث_السنة_التاسعة_من_الهجرة
#كعب_بن_مالك_الجزء_الثاني
اتكلمنا المرة إللي فاتت عن قصة كعب بن مالك رضي الله عنه وشوفنا صدقه واعترافه لرسول الله ﷺ بإنه مكنش عنده أي عذر تخلف بسببه،
رسول الله ﷺ رد وقال:
"أَمَّا هَذَا فَقَدْ صَدَقَ، فَقُمْ حَتَّى يَقْضِيَ اللهُ فِيكَ"
يعني بيقول إن كل الناس إللي قبل كده جاءوا يعتذروا ويتحججوا بأسباب؛ كلهم كانوا كاذبين لكن كعب بن مالك هو الوحيد إللي صدق في كلامه،
فقال له استنى بقى لحد ما ربنا يقضي في أمرك ويقول نعمل إيه معاك،
فخرج كعب بن مالك من عند رسول الله ﷺ، وخرج وراه رجال من بني سَلَمَة، فقالوا لكعب:
وَاللهِ مَا عَلِمْنَاكَ أَذْنَبْتَ ذَنْبًا قَبْلَ هذَا😕
لَقَدْ عَجَزْتَ فِي أَنْ لَا تَكُونَ اعْتَذَرْتَ إِلَى رَسُولِ اللهِ ﷺ بِمَا اعْتَذَرَ إِلَيْهِ الْمُخَلَّفُونَ😒
فَقَدْ كَانَ كَافِيكَ ذَنْبَكَ اسْتِغْفَارُ رَسُولِ اللهِ ﷺ لَكَ🤷♂️
يعني بيقولوا له احنا منعرفش عنك إنك عملت ذنب كبير قبل كده أو تخلفت عن غزوة، ودي أول مرة، إيه المشكلة يعني، مكنتش عارف تعتذر لرسول الله ﷺ بأي عذر كده زي ما اعتذر باقي الناس إللي تخلفوا،
كنت اعتذر ورسول الله ﷺ يستغفر لك وخلاص انتهى الموضوع،
كعب بيقول:
"فَوَاللهِ مَا زَالُوا يُؤَنِّبُونَنِي حَتَّى أَرَدْتُّ أَنْ أَرْجِعَ إِلَى رَسُولِ اللهِ ﷺ فَأُكَذِّبَ نَفْسِي"
يعني قعدوا يؤنبوه ويلوموه ويقولوا له إيه إللي انت عملته ده، حد يقول: والله ماكان عندي عذر؟!
إيه يعني لما تتخلف عن غزوة واحدة من غزوات كتير، كفرت يعني...دي حاجة بسيطة، وأهه رسول الله ﷺ استغفر لهم وعايشين حياتهم عادي،
وفضلوا يقولوا له كلام زي كده،
ومن كتر ضغط كلامهم عليه كعب كان عايز يرجع لرسول الله ﷺ ويكذب نفسه ويقول له لا يا رسول أنا كنت بكذب ده أنا كان عندي عذر وأنا كنت ناسي وافتكرت دلوقتي،
فبعدين سألهم:
هَلْ لَقِيَ هذَا مَعِيَ مِنْ أَحَدٍ؟
يعني في حد في نفس موقفي ده، تخلف وهو معندوش عذر، وقال لرسول الله ﷺ، قالوا له:
نَعَمْ، لَقِيَهُ مَعَكَ رَجُلانِ، قَالَا مِثْلَ مَا قُلْتَ، وَقيلَ لَهُمَا مِثْلَ مَا قِيلَ لَكَ😕
يعني فعلا في رجلين قالوا نفس كلامك لرسول الله ﷺ ورسول الله ﷺ رد عليهم بنفس الكلام إللي رد عليك بيه،
فسألهم مين الرجلين دول فقالوا له:
مُرَارَةُ بْنُ الرَّبِيعِ الْعَمْرِيُّ، وَهِلَالُ بْنُ أُمَيَّةَ الْوَاقِفِيّ!
قَالَ كعب: فَذَكَرُوا لِيَ رَجُلَينِ صَالِحَينِ قَدْ شَهِدَا بَدْرًا، فِيهِمَا أُسْوَةٌ، فَمَضَيْتُ حِينَ ذَكَرُوهُما لِي👌
يعني همّ ذكروا له رجلين صالحين حضروا غزوة بدر، وكل إللي حضر غزوة بدر له مكانة عظيمة وهم أفضل الناس،
فهو لما شاف إن في ناس أحسن منه وقالوا نفس الكلام إللي هو قاله لرسول الله ﷺ اطمأنت نفسه وإن إللي عمله ده كان صح،
وأخد القرار إن مش هيرجع يكذب نفسه زي ما كان بيفكر يعمل، ورجع لبيته واستنى قضاء ربنا زي ما رسول الله ﷺ قال له،
