الجنة ليست لها

الجزء السابع

حسين

شنو ممكن يحس الطفل لما يفقد الامان
لما يفقد الحضن الدافي
لما يفقد المهدئ الي يخلي ينام براحة وستقرار
يمكن عادتاً الاطفال احضان امهم هية الراحة والاطمئنان
صح امي كانت حنونه وحضنهة دافي علينه
لكن الامان كل الامان لما اغمض عيني واغفه بحضن ابويه
يوميه او ليليه اني انام على ايدة وكعد الصبح الكة روحي بفراشي
العصر اعرف هذا الوقت يفتح الباب ويدخل اول ميشوفني منتضرة
يضحك
ويدخل ايدة بجيبه ويطلع الي الي احبه اني وفطومه اختي
يشيلني ويبوسني ويرجعني للكاع منزلني
وظل افتر ورا وين ميروح اكعد بصفة من تخلي امي الصينيه
يوكلني يالله ياكل هوة
امي من تنزعج من نحوسيتي بالبجي اسمعها تصيح عبدالله تعال الة خلصني
عندي عيد يعني راح يشيلني ويطلعني ويشتريلي

عائلة زغيرة ودافيه
العب ويه اولاد عمومتي واختي ومن واحد يضربني اشتكي الابويه علي
وهوة ميقصر رغم كلهم يعرفوني مابيه اذيه

نايم نومة الظهر مثل كل يوم امي تنيمنه بعد ما تغدينه وتغسل النه
كعدت من نومي وتذكرت اني ما منتضر ابويه
نزلت من غرفتنه ركض وطلعت للكراج نفس مكاني اوكف يوميه بالحديقه تحت شجرة النبگ اوكف انتضرة
صارت السمة على ظلام وهوة ماكو يعني من تصير ظلمة مو يعني صار ليل اذا صار ليل ابويه شلون يرجع اني اخاف من اليل

فجأة صار الوضع مو طبيعي اعمامي وجدي انخبصو بيبي تصرخ وتبجي فجأة
امي تبجي عماتي يدكن على وجوهن
عمي جاسم يركع راسه بالحايط
عمي فاضل وعمي محمد يبجون ويدكون على روسهم
جدي يطلع ويرجع وكل شويه مخابر احد
شبيهم ليش مخبوصين وبس يصيحون باسم ابويه
ليش يصيحون باسمه
هوة ليش اتاخر
هوة ليش ما اجة اني مو انتضرة
كلهم ملتهين بروحهم وناسين اكو طفل يباوع بالوجوه ويريد تفسير الهذا الوضع الديشوفه وما مألوف اله سابقاً
شفتهم محد بحالي اجيت كعدت يم فطومه سالتهة شبيهم يبجون
واني دمعتي على طرف جفني منتضرة تنزل
وشفافي تبرطم وماسيطر  عليهة
كالت ابويه مات
كلمة غريبه ماعرف معناها ولا اعرف تفسيرها
شنو يعني مات
جاوبتني يعني بعد ميجي راح ميرجع
زادت البرطمة بشفافي وسالتهة بصوت شبه باكي
وين راح ليش ما اخذني ويا ليش مات

بجت فطومه واني على بجيتها بجيت واني ما مفتهم غير هوة راح ميرجع
زعلان بابا من عدنه
لو ماما متعاركة وياه
لو متعارك ويه احد وزعلان منه
ومع ذلك انتضرته يجي
هوة تاخر بس راح يجي

صار موعد نومتنه واني نعسان واحتاج الي ينيمني
اجيت على امي
ماما نعسان
امي كالت روح بفراشك وتغطه بالبطانيه وهية تبجي تحاجيني
كتلها اخاف وحدي بالغرفه
صاحت بيه روح ويه فطومه نام
ماعرف ماعرف اريد مثل يوميه بحضنه يدفيني
صاحت عمتي على امي وكالت الهة
الطفل ما يفهم روحي نيمي لا تصيحين علي
صعدنه تنيمني اريد اغفه وهية تطب طب على جتفي مغطيتني
ما مرتاح اكو شي ناقص مو هيج متعود انام
ليش ماكدر اغفة اكو شي غريب عليه ما متعودة
برطمت وماعرف اني ليش مانام
وكعادة اي طفل البكاء وسيلتة للتعبير عن انزعاجة
بجيت وبجيت وبجيت وكل ما امي تكلي نام ازيد بالبجي وصوتي يعلة
عماتي صعدو فوك اخذوني من امي واني احس انهاريت ماريدهم ماريدهم
مفطوم اني وريد الي فطموني منه
اجاني الصوت الي يطمني ويستريح كلبي اله
صااح
نزلووو جوة خل يجي يمي ينام
ايي راح انام بحظنه اي راح ارتاح
نزلتني عمتي جوة ورحت اركض واني دموعي تسبقني ورتميت باحظانه
يطب طب الي على جتافي ويكول
نام جدي نام لا تبجي يا بعد جدك
واصبح مأوى طفولتي هذا الحضن الدافي