#كحل_عرب
(احضان باردة)
((( بقلم زينب ماجد )))
الحلقة_١٦
(يوم الأربعين )
يشاتل بالگلب دايات
داية تلوب مِن داية
لــِ عريان السيد خلف ||
الاء : طلعت من الغرفة كوة افتح بعيوني ، وهو يحجي ويا امه بالتليفون ويكللها : درب جديد هذا يمه ؟ وين اخذها .. بيتي واجيبنها شبيج يمه .. جج استغفر الله واتوب اليه ، يمه هاهيه هسه اجي ونتفاهم
سد التليفون وهو يأفف ، سألته : خير شكو
- امي وسوالفها الما تخلص
- شبيها
- تكلي تجي تاخذ عائلتك وتشيل من البيت ما اريدنك بعد عدي .
- يا عائلة
- قصدها كوثر والجهال
- ووين تريدهم يجون ؟
- عود اجيبهم هنا ..
- لا بالله
- هسه عوفي الحجي ، راح اصلي واطلع ، تحتاجين شي
- ترجع لو لا ؟
- لا ابات هناك
- هنا ، ممحتاجة شي .
طب للحمام سبح وطلع بسرعة صلى وراح لبيت اهله ، اني كمت لملمت البيت الجهال كعدوا بدلت الهم ملابسهم .. دخلت سبحت وصليت ، اتذكرت جبنا دجاجة سفري ما اخذها وياها هسه الكاها محمضة ..
مشيت بساع فتحت العلاليك .. شميتها ريحتها تخبل ، خليتها بالصينية مال الفرن وحميتها ، وطلعتها حطيتها اني والجهال وكعدت اوكلهم واكل واباوع وياهم على بابار ...
انفتح الباب وطب علاء .. ضايج حيل
عرفت صايرة مشكلة ورجع ، ما حجيت شكو ولا كلتله شنو ولا اريد اعرف ، بساع بادرت وكتله ( هم زين رجعت يلا تعال كابلنا )
- الف عافية ، تعشوا ما مشتهي .
كمت للغرفة طلعتله دشداشة خفيفة مال بيت وانطيتها اله ، خذاها من ايدي وكتله : دكعد تفوتك والله خوش دجاجة .
- ما مشتهي ، ارجعي لعشاج .
انطيته ورحت جبت ماعون عزلتله نص من الدجاجة .. وخليتها على صفحة ، شبعت جهالي ، وهم يصيحون ويتناكرون بيناتهم ، وهو دايخ ، كومتهم غسلتهم وكعدتهم بالتلفزيون اللي بالأستقبال ، اجيته لكيته جار الريموت ومطلع اخبار ومنتجي الدنيا طالعة من عينه.
مشيت عنه .. رحت غسلت المواعين وسويتله عشا اله ورتبتله الصينية وجبتله ، من شافني سويتله عشا كام بدل ، وكعد كبال الصينية : بس سراحية مي جيبي .
رحت جبتله واجيت ، كعد ياكل ، تليفونه دك ... سداه وشمره ، ردت اتجاهل واكول معلي ، بس الفضول اشتغل عندي اريد اعرف شكو ،حجيت : صاير شي ؟
