ابن الاجاويد

البارت 1

#البارت الاول

النشر راح يكون مع نزول الكاتبة البارات القصة

#ابن_الاجاويد

بقلمي "أسماء ديمير "

مديت راسي من باب المطبخ اباوع ، على الهوسه الي باب بيتنه ، بعدت غرتي الي صارت على عيوني حتى اشوف زين ،

خاله اصبعي بحلكي وخايفه اول مره اشوف بابا بهل الاعصاب ، ياايمه شبي ، ومنو هذا الي يحاجي بابا ، بابا واكف على عرض الباب وحاجب الرؤيه عني ماجاي اشوف زين ..

ماما واكفه غاد منه لازمه جتفه تهدي بي ، هو صوته طالع ويرفع بيدي ، جنه يطرد الي واكف كباله ، لم زاح بابا شوي عن الباب ، شفت عمي جعفر شايل جنطته بأيده جنه يريد يبقي يمنه ..

تالي فزيت من صياح بابا هو يكله ، امشي منا جعفر الباب يتعذرك ابعد عني انته ومصايبك انا رجال على كد حالي مابيه حيل مشاكلك ..

-هيج صارت سالفه يااخوي ، اجي احتمي يمك تطردني ..

-لو علي اخليك فوك راسي بس اني رجال راعي ولايه وعدي بنات لا تبليني يرحم موتاك ..

-مع الاسف عليك قاطع كل هاي مسافه من كربلاء لديالى تالي تسد بابك بوجهي .

-جعفر خويه اخر كلام عدي دير ظهرك وارجع منين ماجيت انا حتى افلوس ماضلت عدي بسببك واني اتشاكفلك من ناس ياهو جاي داك بابي يشكي منك ..

-وين اويلي انه هسه كلي ابات بالشارع ..

-ارجع منين مااجيت خوش .. سد الباب بوجهه حيل ..

درت ظهري بسرعه ورجعت اركض للغرفه خايفه من عصبيه بابا يايمه ، صاير كبره حتى امي خافت منه ..

دخلت للغرفه بسرعه ، مينا كاعده تقره ماتحركت ولا كامت ، ولج تعاي شوفي شنو صاير بره ..

كالت بفهاوه شكوو ..

- بابا تمالخ ويه عمو الا شوي يضربه ،

حجت باستغراب :- هذا منو يضرب بابا معقوله ؟!

-'اي والله ولج وجهه دعه دم احمر من العصبيه ، هذا عمج فد يوم يجلطه لبابا

- هم عمج عووذه هذا شوكت تنكطع رجله منا ادري ابتله بابا صار اخوو

- نوب جايب جنطته وياه يمكن يريد يعيش يمنه ، بس بابا طرده خطيه

- هم عوزه يعيش يمنه تلكي مسوي مكسوره وشارد منها وجاي لهنا ..

- يسوي مكسوره ويعوف مرته وجهاله معقوله

- يسويها عمج ليش نسيتي الي سواه ذاك اليوم ، تالي اجت عالم علينه هداده ، بسببه بعنه سياره وسددنه فلوسهم ، وعمج طلع منها ، فوكاها انهزم حتى لايسدد وشمرها على بابا ..