الجنة ليست لها

الجزء العاشر

سلمى

واكفه بينها وبين ابويه واسكت بيها وكلها منتهى سكتي وجفي اشر لا تجاوبين
وهية عبالك تعاند وتعلي صوتها اكثر وتكله انته ما مسؤل بية
ابويه فقد اعصابة وسمطها براچدي فر راسهة فر
خلاها متراجعه ليورة ومعليه صوتها اكثر صارخة بصوت عالي
يبووووووووو
يبووووووووو
خليت كف ايدي على حلكها مترجيه تسكت لا تثير اعصابه اكثر
بهاي الاثناء نزل من فوك جاسم يركض على صوت صريخها
كال شكو شكو
وهية مستمرة بالصريخ والصياح وابويه كل ما هية تصرخ يهد عليها اكثر
الى ان ادخل جاسم وكلها  لا تصرخييين هيييي  عيب من الناس شتكول علينه

جان تكله امشي لك ابو العرك  تعرف العيب انته

يا يمة بعد اني اريد اخلصها من جوة ايده صرت صد الها
تولاها راشدي يمنه يتلگاه راشدي يسرة  كفخات وراشديات
كمت اصرخ عليهم يعوفوها
الله اكبر ثنينكم عليهاااااا
هية عصفور جوة ايدهم
ما انكر هية تستاهل الكتله
لكن مو من عدنه احنه لان الكل راح اطلعها مظلومه
اخر شي خليت جسمي منحني كله عليها بحيث جاسم يريد لزمه منهة ميلكة
بس جسمي
ضميتها ضم منهم ليش وهية سكتت غلط ودعاوي ما خلت شي الما كالته
كتلها وج اني خفت عليج وحصلت الكفخات مكانج ونتي هذا السانج الطويل
وخلت وصعدت تركض للدرج  فوك الغرفتها
اباوع جهالها مخلوسين  ويتصارخون من منظر امهم وهية تنكتل خليت حسوني على يمناي وفاطمه على يسراي وحضنتهم
وكتلهم لا تخافون ماما ماكو شي ماكو شي

نزلت تركض منتهى وعبايتها على راسها وغلطت وعدت وصفت وراحت بليل ذاك الاكشر البيت عمها
طبعاً امي جانت لازمة ابويه حته ما يكتلها
بس ما كدرت اله قوي دفعها
ورهف خلصته علينه بس تبجي من منظر الي شافته

ورا ما طلعت ظليت احجي على جاسم وقساوته شلون هيج يضربها ما يصير
وهوة منهار يكلي ما شفتيها شلون واكفه جنه رجال بوجهي وتغلط

اصلاً جان جاسم مايطيقها ولا تجمعهم لا كلمة ولا موقف بس من جان المرحوم موجود نوعاً ما اكو سلام بينهم

كعدت امي وخلت ايدة على راسه وكالت ما راح نخلص
رهف كالت
خل تروح موتتنه كاعدين بالهباطه من مشاكلها
هذن مو جناينه غربه ما طلع الهن صوت بيوم وابويه شكد يحترمهن وامي
اله هذي عود بت خالنه عشتو
امي كالت بقت خوة من وراها
امداني ماخذت حجايته الله يرحمة كلي يمة خطبيلي من خوات صديقي حسين خوش بنات وحبابات 
صوجي كلة صوجي والبنات جنت اعرفهن خوش بنات شجاني ورحت على بت اخوي اركض
واني الي غيرت رايه وكتله خل نروح على خالك احسن من بناته ناخذ
هاي تاليها

توقعنه خالي ابو علي يجينه ورا ساعه لو ساعتين شو الثاني يوم وماكو احد بين منهم
ويوم ثالث ندكت بابنا واجة خالي الجبير الي بالبصرة
وخالي ابو علي وزوجته
امي رحبت وهلت بيهم اخوتها وتلكتهم
لكت الوجوه ثكيله والسلام سطحي
سالت خالي الجبير ابو سلام
شوكت وصلت اليوم
كال الها لا من البارحة واصل وبتت ابيت ابو علي