#جنة_وهدان
الحلقة العشرون
................
🌹 بسم الله والصلاة والسلام على رسول الله 🌹
عن عبد الله بن عمرو رضي الله عنهما أنَّ النبي صلى الله عليه وسلم قال: ((أربع من كنَّ فيه كان منافقًا خالصًا، ومن كانت فيه خصلة منهنَّ كانت فيه خصلة من النفاق حتى يدعها: إذا اؤتمن خان، وإذا حدَّث كذب، وإذا عاهد غدر، وإذا خاصم فجر ))
أنهى عبد المتجلى اتفاقه مع زين على زواجه من ابنته خلال يومين ولكن جاءه اتصال من شاكر أغضبه قال له فيه ...بابا دكتور ( فواز ) طالب إيد تالين وأنا وافقت وصراحة شوفتها فرصة أنها تنسى البغل زين ده .
فأنا وعدته النهاردة يجي ويجيب المأذون معاه ونحطها قدام الأمر الواقع ويكتب عليها ونخلص بقا من همها .
فانفعل عبد المتجلى عليه قائلا بغضب ...كيف ده يعني ؟؟
هو سلچ بيض ؟وإيه نخلص من همها ده ، هي كانت چاعدة على چلبك ، اتحشم يا واد وإلا هتشوف وش تاني خالص مني .
شاكر بحدة ...لا يا بابا مش كده بس صراحة أنت دلعتها كتير أوي، وأنا مش هسكت لغاية مانلاقي الفاس وقعت في الرأس وألاقيها في يوم دخلة بيه علينا وتقول ده جوزي .
وده لا يمكن أبداً ،عشان كده هتتجوز الدكتور ده النهاردة وأنا ورؤوف اتفقنا على كده خلاص .
كور عبد المتجلى يده بغضب وضرب بها على المنضدة أمامه قائلا...اتفچتم كده لحالكم والله عاد مت أنا إياك .
شاكر...بعد الشر عليك ، بس ده لمصلحتها ولما تيجوا بالسلامة هتلاقوا كل حاجة متحضرة ،سلام دلوقتي عشان فعلا بحضر لليلة دي .
ثم أغلق الهاتف في وجه والده ، فتغيرت ملامحه .
تالين بذعر ...مالك يا بابا حصل إيه ؟
زين ...خير يا عمي فيه إيه ؟؟
عبد المتجلى بحزن وأسى ...زين يا ابني ، تچدر تچوز بتي دلوك عشان لو رچعت بيها مش هتچدر تشوفها تاني، اخوتها مصممين يكتبوا كتابها النهاردة .
فوضعت تالين يدها على فمها بصدمة أما زين فوقف منفعلا قائلا ...ليه هي سايبه كده ، يچوزوها غصب عنيها ، لااا طبعا ودلوك هكتب عليها وتكون مرتي في الحلال .
وهدان ..وأنا الشاهد عليكم .
تالين ...بس إزاي وهنروح فين بعد كتب الكتاب ولسه مجهزناش أي حاجة .
فوقف وهدان هو الآخر ...على الصعيد معايا ،هناك أمان وعزوة ومحدش واصل هيچدر يوصلكم هناك .
تالين بدهشة ...الصعيد !!
إزاي أنا عمري ما عشت هناك ؟؟
وهدان ....اعتبريها فسحة يا دكتورة ولا عندك حل تاني .
