الجنة ليست لها

الجزء ال حادي عشر

لنا مع الامهات حكايه

ابراهيم وعبدالله نقتلو بيوم واحد وبطريقه وحدة ونالو الشهادة سوة

بس عبدالله ماعدة مرة مثل المرة الي عد ابراهيم

بيوم جتنه بت عمتي الجبيرة وياها مرت ابراهيم
جايبين ملابس وغراض الاطفال المرحوم
امي ما قبلت
وكالت الهم انتو هم عدكم ايتام
بت عمتي كالت
هاي وصية ابراهيم
شفته بالمنام يوصي بينه على جهال عبدالله
كلي لا تعوفيهم اتفقديهم
وبجت
باوعت على مرته كاعدة متلبسه بالسواد
بنت شابه جميله جدا جداً في مقتبل حياتها العشرين
هادئة ثگيلة
توزن الكلمة قبل لتكولها
تتبسم بلا صوت من تصير سالفه وبيهة ضحكة
حتى ما رجعت الاهلها بعد وفاته ومن طلعت السنه
بقت بغرفه وحدة هية وبناتها بيت اعيالها
وبيت عمتي كلش يحترموها ويحبوها هية والبنات

هذا عنوان الامومة

من ضمن السوالف كالت بت عمتي

كريمة
تدرين ام فاضل شنو الي كاتلني قهر فوك قهر ابراهيم
مات اخويه وما تهنة بعائلته
راد يطلع ابيت وحد وكلي
راح اكمل بيتي بناء وحول بي الغرفه بعد ما تكفينه ابناتي الاربعه
واني ما رضيت كتله وين تروح وتعوفنه بناتك بعدهن زغار خل يكبرن
وهاي تاليها لا تهنة ابيت ولا تهنة ابناته
وظلت تبجي
لو مخليته طالع بيت وحد
لو مخليته مطلعه من نفسة
لو شهر واحد عازل
جان يمكن شي يهون على شي
فوك ظيم فقدانه بعد هم الندامة ماكلتني اكل
وهاي مرته لا عدهة ولد يسندها

والبنيه كاعدة وتسمع كلام حماتها وساكتة

ورجعت سألت
منتهى ماتجي تشوف جهالها
ماتخابر تسأل عليهم

جاوبناها ابد

والاحاديث طالت عن نفس الموضوع
عاد كريمة معاتبه امي

ام فاضل لو مبقيها الجهالها اقلها

ام فاضل
شبيج كريمة هاي البنات يمج وحلفيهن اني شلون جلبت بيهة وهية اصرت اله اطلع
كتلها لا ترحين منتهى ابقي الخاطر جهالج بس هية ما صبرت

رهف
وازيدكم من الشعر بيت
المرحوم جان مشتري الهة معرض ومشتري الهة كلاصات وتحفيات وماعين وشغلات حلوة
ورة ما طلعت وعمها كال الغرفه مريدها
صعدت افرغها ابويه كال الي حته يشوف الها شراي
تدرين لكيت المعرض فارغ
كلشي مابي
لا ماعون لا كلاص لا تحفيه
كلشي ماكو
فتحت الكنتور
لا جرجف لا فرشه
مفرغتهن كلهن وبايعتهن بسكوت وحنه مندري
وشوكت منعرف
محولتهن فلوس
وجانت متحضرة الهذا اليوم الي تروح بي حته ميبقه بالغرفه غير الاخشاب والفراش

ظلت مرت المرحوم ابراهيم فاتحة حلكها
كالت صراحة اني شلت خطيتكم
كلت شدعواهم ما تحملوها جان صبرتو