අනාත අහස යට

1

කව්රුවත් අහපු නැති
සුන්දරම ගී තනු
පරණ ගිටාරයෙන් වැයෙන්නැති
කව්රුවත් අහපු නැති
මිහිරිම ගීත
මියුරුම කටහඬින්
පාළු කාමරයක ගැයෙන්නැති
ප්‍රේක්ෂකාගාරයේ අත්පොලසන් හඬ,
රසිකයන්ගේ ආදරය,
වේදිකාව මත්තේදී දැනෙන
ඇඟ කිලිපොලායන ඒ හැඟීම,
මේ සියල්ලම වෙනුවෙන්
ඒ හිතුත් මැරි මැරී ඉපදෙන්නැති
ලෝකයක් සනසන්න නිමවපු
අරුත්බර පදමාලා
මනබඳින තනුද සමගින්
ලෝකයෙන් හැංගිලා යන්නැති
කිසිදාක වේදිකාවේ ඉඩ නොලද
දසදහස් ගණනක
නමක් නැති සංගීතඥයෝ
හදවතේ මිහිදන් කල
අහිංසක හීන එක්කම
මහපොළවට මිහිදන් වෙන්නැති...