Cāi Cāi || ချိုက်ချိုက် || [ မြန်မာဘာသာပြန်] (Completed)

Chapter (49)

Chapter (49)

Act 7 : Fan Letter (1)
ပြန်လည်ဆုံတွေ့ကြသည့် မျက်စိတစ်မှိတ်လေးအတွင်းမှာပဲ ရက်ပေါင်းနှစ်ထောင်နီးပါး ရှိသွားခဲ့လေပြီ

— လွန်ခဲ့သောငါးနှစ်၏အမှတ်တရများမှာ  ရုတ်ခြည်းအဆုံးသတ်သွား၏။

ထန်ယီမင်သည် ပရိသတ်များထဲတွင်ထိုင်နေကာ စင်မြင့်ပေါ်ရှိမီးရောင်များကို  မျှော်ကြည့်လိုက်သည်။

စင်ပေါ်ရှိကောင်လေးသည် ကခုန်ဖျော်ဖြေရင်း  ကျယ်လောင်စွာဖြင့် သီဆိုနေလေသည်။ သူ့အသံလေးမှာ လွန်ခဲ့သည့်ငါးနှစ်ကအတိုင်း မမေ့နိုင်လောက်သည်အထိ စူးရှနေဆဲဖြစ်သည်။

တကယ်ကို မယုံနိုင်စရာကောင်းလှ၏။

အွန်လိုင်းပေါ်တွင် စကားစမြည်ပြောပြီး ရယ်မောပျော်ရွှင်ခဲ့သည်မှာ မနေ့တစ်နေ့ကအတိုင်းပင်။ သို့သော် ပြန်လည်ဆုံတွေ့ကြသည့် မျက်စိတစ်မှိတ်လေးအတွင်းမှာပဲ ရက်ပေါင်းနှစ်ထောင်နီးပါး ရှိသွားခဲ့ပြီဖြစ်သည်။

...

ကျောင်းသားများအားလုံး ပြီးပြည့်စုံစွာအစမ်းလေ့ကျင့်ခဲ့သည့် Kinky Boots ပြဇာတ်သည် နောက်ဆုံးတွင်တော့ အောင်မြင်စွာဖြင့်ပြီးဆုံးသွားခဲ့၏။

အဆုံးသတ်တွင် စင်မြင့်ကြီး၏ ဘေးနှစ်ဘက်နှစ်ချပ်ရှိအပေါက်များမှ တလပ်လက်တောက်ပနေသော ရွှေရောင်ဖဲကြိုးများ ဖြာထွက်လာတော့သည်။ ရှန်းချိုက်ကတော့ ပုံကြီးချဲ့ထားသောမျက်တောင်အတုများအပြင် အနီရောင်ကိုယ်ကြပ်ဝတ်စုံကို ဝတ်ဆင်ထားရ၏။

ခန်းမကြီး၏အနောက်ဘက်တစ်နေရာဆီသို့ ဖျတ်ခနဲတစ်ချက်ကြည့်လိုက်စဥ် ထူးဆန်းနေသလိုဖြင့် ရင်းနှီးနေသောရုပ်သဏ္ဍာန်တစ်ခုကို သူ အလွယ်တကူရှာတွေ့လိုက်သည်။

ရှန်းချိုက်သည် ထိုလူ၏အသွင်အပြင်အား အကြိမ်ပေါင်းများစွာ စိတ်ကူးယဉ်ခဲ့ဖူး၏။

ထိုအမျိုးသားသည် အရပ်ရှည်ပြီး  မျက်ခုံးမျက်လုံးလှကာ နွေးထွေးသောအပြုံးလေးဖြင့်  အရပ်ရှည်သောသူဖြစ်လောက်မည်ဟု သူထင်ခဲ့ဖူးသည်။ သို့သော် ယခုထိုအမျိုးသားနှင့် အမှန်တကယ်မျက်နှာချင်းဆိုင်ရချိန်တွင် ရှန်းချိုက်စိတ်ထဲတွင်ပေါ်လာသော နာမဝိသေသနအားလုံးကတောင် ထိုလူ၏ရုပ်သွင်ကို လုံလုံလောက်လောက်မဖော်ပြနိုင်ပေ။