#السمرة
#الجزء_الاول
#الكاتبة_مريم_اليوسف
قريتنا القرية السمرا مشهورة بشجرها ونهرا
وناسها في منهم الطيبة والسكرة وفي منهم قاسية وعقول متحجرة
بقريتنا رح يصير فيها قصص حب معمرة وقصص فاشلة مبتكرة
ورح يكون فيها الخبث والطيبة والقلوب المتكسرة
ورح يكون فيها الهيبة والغرور وناس مابتقبل السيطرة
...........................
وقف سرفيس على مدخل هي الضيعة .. ونزل منها اشخاص ودخلو القرية .. على مدخل القرية موجود لافتة مكتوب على ((قرية السمرة))
دخلنا الضيعة وصرنا نتعرف على هالضيعة .. هون فيها شب صغير بالعمر عم يجر وراه مجموعة ابقار .. وهنيك في بستان ومجموعة ناس معهن مضخات على ضهرهن والظاهر عم يرشو مبيدات للحشرات .. وهناك في مجموعة ولاد عم يلعبو طابة ومحددين حدود المرمى بحجار متوسطة الحجم .. والبيوت الريفية المتفرقة .. بس مانها عمار قديم بالعكس كلها عمار جديد .. وكل بيت مزين بالورود حولو وحواليه .. ومنها ورود ممددة على السطح لتعطي للبيت منظر خلاب وحلو .. وبوسط الضيعة في ساحة كبيرة ومجموعة عالم عم ينصبو خيمة عرس او شادر انا بقلو 😅 .. هالخيمة عم يعمروها بشكل كبير من ٣ جوانب .. وبخلو بقلبا ساحة فاضية .. وعم يركبو اضوية كبيرة على عواميد وكمان عم يظبطو البفلات (مكبر الصوت) .. الظاهر في عرس بالضيعة ..
بنروح ع بيت بقلب هالضيعة
داخل هالبيت في مرى تلاتينية كلا انوثة وجاذبية .. شعرا طويل واسود وهية سمرة ..بس سمارها حلو .. واسمها كمان سمرا
قاعدة سمرا بالصالون ولافة رجل على رجل وحاملة موبايلا وعم تكبس فيه الظاهر عم تحكي مع حدا .. والابتسامة على وجها شبر
داخل الموبايل : المرسل : لك ليش عم تغطي كتير وماعم تحكيني طيب انا عم اشتقلك
سمرا: لك اااخ لو تعرف شو صاير فيني
_سلامتك من الااااخ .. خبريني شو صاير
سمرا :ما بنت جوزي خلصت مدرسة وصرلا فترة قاعدة بالبيت وماعم اقدر اخد راحتي نهائيا ..
_كيف خلصت مدرسة .. ماقلتيلي عم تقدم بكالوريا
سمرا :صح .. بس كانت معطلة وعن تدرس .. يعني ماباخد راحتي غير لما بتروح ع الفحص
_ يعني اليوم عندا فحص لحتى عم تحكي معي
سمرا : اي 😭😭 واخر فحص
_ييي علينا وكيف بدنا نصير نحكي
سمرا :والله مابعرف .. بس لا تخاف بدبر حالي
_ بس انا هيك مابيمشي حالي .. دبريها بدنا نحكي فيديو متل اول
سمرا :ههههه شو اشتقتلي
_لك اشتقتلك وبس .. ياريت لو اقدر اجي لعندك
سمرا :يوووه .. شو تجي وماتجي بدك تفضحني انت بالضيعة ..ولا بدك جوزي يدبحني .. خلص ع الفيديو عم نحكي وننبسط 😉
_لك ايو فيديو اذا صرلك شهر مافتحتيه
سمرا :طيب شو اعمل بحالي عم قلك ظروفي
_هلأ في حدا عندك
سمرا :لا
_لك فتحيه شوي خليني اشبع منك
حكت سمرا وقالت :لك اوووف .. تضرب شو غليظ
ردت عليه وقالت :اجا جوزي ... باي باي
سكرت الموبايل ورمتو على جنب وصارت تحكي :بس يحنتر .. العما ولووو .. وهلا بنص النهار بدو ينقبر يحكي فيديو روح انقلع ... اذا ماكنت مروقة اخر رواق لاتحلم
قامت بجسمها الممشوق الحلو .. وراحت ع المطبخ رفعت الغطا عن الطنجرة وصارت تحرك الاكل يلي عم ينطبخ ع الغاز .. خففت النار تحت الطنجرة ورجعت قعدت مكانها وحملت الموبايل
لقت واصلها مسج واتساب :كيفك ياقمر .. شو وينك غاطة
ابتسمت وفاتت ردت :لك اهلين بالغلا .. كيفك
_مشتقلكك😘😘
ركزت قعدتا والابتسامة على وجهها وتابعت حديثا
____________________
بأحدى للمدارس
قاعدين طالبات على مقاعد متفرقة عم يقدمو امتحانات وعيونن بالورقة وعم يكتبو .. وفي مراقبين عم يتجولو بيناتن .. شكلن عم يقدمو امتحانات البكالوريا
شوي وبنرجع بنتعرف عليهن بكونو خلصو الفحص 🙂😅
________________
سمرا منسجمة بالحديث ع الموبايل ... سمعت صوت سيارة وقفت عباب البيت .. بسرعة طفت الموبايل وخبتو تحت المخدة يلي ع الكنبة وراحت ع المطبخ تشوف الطبخة .. انفتح الباب ودخل رجل اربعيني مهيوب ومحترم .. دخل وصار ينده :سمرا .. يا سمرا
طلعت سمرا من المطبخ وقالت :اهلين حبيبي عمار
عمار :انا مسافر
سمرا :ليش دورك اليوم ع الكميون (قاطرة مقطورة)
عمار : عأساس لا .. بس مالك تعب شوي .. قلت انا بروح عنو
سمرا :ييي علينا ماعم نشوفك منيح
عمار :ولا يهمك حبيبتي .. بكرا بنعوضا
سمرا :طيب و المى مين بدو يجيبا
عمار :اصلا مانو مشغول بالي غير على المى .. عم اتصل فيها مسكرة خطها
سمرا :اكيد مسكرة خطا بتكون بالفحص
عمار :رح انطر شوي بركي بتكون خلصت وبروح بجيبا وبأمن عليها .. وبعد بسافر
سمرا : طيب خليها تجي لحالا
عمار :لاااا.. المى ما بتيجي غير معي
قربت سمرا لجنبو وقالت :مابصير هيك يارجال .. خلي البنت تعتمد عحالا شوي .. لك خطوة مابتخليها تخطي لحالا حرام عليك بطل عندا ثقة بحالها .. لك ع الشارع مابتسترجي تطلع اذا ماكنت معها انت
عمار :هيك احسن .. انا ابوها وسندها وحاميها
سمرا :ما اختلفنا .. بس انت هيك عم تأثر سلبا ع البنت .. انو حلوة الحرص والخوف بس مو لهالدرجة .. البنت صار عمرا ١٨ سنة ولهلأ لما بدا تقطع الشارع بدا تمسك ايدك
عمار :يعني بدك تقنعيني انو تربيتي غلط
سمرا :ماقلت غلط .. بس تركها تغامر تجازف .. يعني بعد عمر طويل انت مانك دايملا
سكت شوي عمار وقال معك حق الظاهر انا عم خاف عليها زيادة عن اللزوم
سمرا :اي والله .. وبعدين ليك نحنا الحمد لله قاعدين بضيعة كل اهلا مناح واكابر وكلن امينين .. يعني مابينخاف عليها هون
عمار :طيب انا رح ابعتلا رسالة تجي مع رفقاتا بالميكرو
سمرا :اي هاه .. من زمان
عمار وقف وقال: بدكن شي من الاردن
سمرا :سلامة قلبك حبيبي .. تروح وترجع بالسلامة
عمار :انتبهي ع الولاد وع المى
سمرا :من عيوني
عمار :باي حبيبتي
سمرا وقفتو وقالت :ليك حبيبي شوبدي قلك
عمار :قولي
سمرا :تخلينا نروح اليوم ع العرس
عمار :صحي لمين هاد العرس
سمرا :لبيت ابو معاذ
عمار سكت شوي وكأنو عم يفكر
سمرا :شووو .. بدا تفكير
عمار :روحي انتي بس المى لأ
سمرا :لك حراام عليك خلي هالبنت تتنفس .. لك والله هون بالضيعة محدا بيعرفا
عمار :احسن مابدي حدا يعرف بنتي
سمرا : مابدك يجي نصيبا للبنت وتزوجا
عمار :لساتا صغيرة .. ومابدي اعرض بنتي على حدا انا وخصوصا بهيك اجواء
سمرا : لك ماتعرضا .. لك ياربي ليش ماعم تفهم علي .. لك والله بتنبسط كتير اذا راحت وحضرت العرس .. وانا رح خليها جنبي لاتخاف
عمار :طيب ماشي .. روحو
سمرا :اي هاه .. دخيلو المتفهم انا ..
عمار ابتسم وقال: عنجد محدا بيعرفا بالضيعة
سمرا :لا والله .. في بس جيرانا يلي بيجو لعنا .. اما باقي العالم محدا بيعرفا.. مزال انت مابتخليها تخطي خطوة برات البيت لحالا .. غير بالسيارة .. وبالسيارة محدا بينتبهلا .. حتى رفقاتا ماتخليها تروح لعندن .. انت خافيها عن العالم الخارجي
عمار :بس هيك احسن .. وكمان هية ما اعترضت
سمرا :لا ما احسن .. لك البنت احلا ايام حياتا ماعم تشوف منن شي .. غير البيت والمدرسة ... وكمان ليش بدا تشتكي اذا انت عودتا على هيك .. خلص تعودت البنت ع هيك .. ويمكن بلشت تحس ع حالا بس ماعم تسترجي تقلك
عمار : خلص .. خلص .. طلعتيني هلأ الاب الظالم .. خلص رح خليها تاخد راحتا .... بس تحت نظري
سمرا :حلو هيك .. لا تشد ولاترخي
عمار صار يتلفت حواليه وقال :صحي وينن بشار وبراء
سمرا :منيح يلي فطنت تسأل عنن
عمار :لك هدول ولاد مابينخاف عليهن متل البنت .. اي ماقلتيلي وينن
سمرا :بشار مع عمو قال في شجرة مشمش عندو راحو يقطفوها .. وبراء عم يلعب مع ولاد الضيعة بالطابة
عمار :طيب انتبهي عليهن .. واذا بدك شي بعتيلي رسالة .. قبل ما اقطع الحدود
سمرا :مابدي غير سلامتك تروح وترجع بالسلامة
قربت باستو على خدو وطلع
طلع وتنهدت وقالت :اوووف فقعني وهو بنتي وبنتي .. تضرب منك الها..
رجعت ع الموبايل وقرأت الرسائل
_ليكي ام السوس اليوم رح يعرضو المقابلة يلي عملوها معنا .. عن مشاريع الشباب فتحي التلفزيون وشوفيني 😎😎
ردت :عنجد ايو ساعة
_يمكن بعد شوي .. ع الفضائية
_ماشي هلأ بفتح وبتفرج عليكن
_يلا بحكي معك المسا .. اليوم عنا شغل كتير بالمعمل
_لا الله معك شوكت
حطت الموبايل ع الشحن وقامت فتحت التلفزيون لتشوف المقابلة
______________________
ع اطراف الضيعة
موجود معمل كبير .. ومكتوب على هالمعمل
البان واجبان الصداقة
صفت سيارة نقل صغيرة والها صندوق مقفل .. متل سيارات نقل البضائع .. بس هاد الصندوق يلي فيها عبارة براد صغير
انفتح باب السائق ونزل منها شب طويل حليوة .. مهيوب اسمو منار بيتاوب بنعس وبيتقدم بخطوات عباب المعمل بيطلع بوجهو شخص تاني كمان حلو وشخصية .. بس اقصر منو بشوي اسمو اياس.. لابس مريول ابيض وكفوف طبيات باديه وجزمة بيضة .. بيشلح الكفوف وبيرميهن بالحاوية يلي بتبعد عندو بضعة امتار .. ليجو بقلب الحاوية ..
بينزل وبيقعد ع درجات الباب بتعب وبطلع من جيبتو باكيت دخان وبطلع سيجارة بشعلها وبصير ينفخ..
بقرب منو منار وبيقعد جنبو وبقلو
اياس: شو هلأ فايق
منار :اي هلأ فايق .. انتو خلصتو
اياس : اي خلصنا .. لسه العمال جوا عم ينضفو ويجلو
بيطلع شب تالت اشقراني عيونو خضر ومربي لحيتو كمان شقرا هلأ بالاجمال كلن مربين دقونن لانو هية موضة واسمو شوكت وبقول :منار ايمت جيت يا حنون
منار :هلأ ..
شوكت :طيب قوم اياس لنحمل البضاعة للحنون يطلع يوزعا
منار :لا لا .. لاتحملو شي
اياس :ليش
منار : شو نسيان انو عرس المغضوب معاذ اليوم
اياس :بس يامنار مبارح ما وزعت والبرادات مليانة .. وين بدنا نحط بضاعة اليوم بتحمض
منار :طيب ماتحكو من مبارح .. كنت طلعت مبارح
اياس :ليش مابتعرف انو اليوم عرس معاذ
منار :لك مفكرو بكرا ..وعأساس بروح اليوم وبوزع .. قام طلع العرس اليوم
شوكت: وكيف عرفت انو العرس اليوم
منار :وانا جاي شفتن عم يركبو الشادر 😅
اياس :وين عقلك انت
منار :لك والله مابعرف
طلع شب رابع من جوا حليوة متل رفقاتو واسمو محمد وقال :هاه انتو هون .. شو عم تعملو
منار وقف وقال :خلصونا قومو جيبو البضاعة وحملوها
شوكت :بتلحق تروح وتجي قبل مايبلش العرس
منار :مابعرف .. بلله استعجلو خلوني روح واجي بسرعة
اياس : يلا تعو شباب
دخلو ودخل معن منار ..
اياس للعمال :شباب يلا بسرعة .. خلونا ننقل البضاعة
دخل شوكت ومحمد يساعدو العمال
منار :بشرفك ولوو تعا معي
اياس : ع وين
منار :شو ع وين .. نودي البضاعة وبنرجع
اياس :لا ماحذرت .. نحنا قبل طلوع الضو عم نشتغل وانت هلأ فقت .. بدي روح ارتاح شوي لجهز حالي للعرس
منار :شو ندل
اياس :شوف محمد او شوكت يروحو معك
منار :خلص بلا .. بروح لحالي مابدي منية حدا منكن
اياس :احسن
منار : بدك تروح لعندي عالبيت
اياس :اي بدي جيب اركيلتي
منار :خدلي اركيلتي كمان وزبطا
اياس : والله بتلحق .. خدها انت
منار :بشرفك ولووو .. لك مابوصل ع الضيعة الا للمغرب بدي اتحمم والبس بكون بلش العرس
اياس :طيب تكرم رح اخدلك اياها وزبطا وغيرو
حط ايدو عكتفو وقال :والله كفو
اياس : بدك تلبس البدلة ماهيك
منار :اي البدلة .. ولا غيرتو رأيكن وبطلتو تلبسو نفس البدلات
اياس :لا لا .. لساتنا متل ما اتفقنا ... نفس البدلات .. بس انو بدلتك جاهزة
منار :اي اي جاهزة
اياس : طيب عطيني مفتاح سيارتك التانية
منار :والله مع معاذ
اياس : اممم .. يلا مامشكلة
منار : يلا تعا نساعدن مشان نلحق بسرعة
دخلو وصارو يحملو صناديق فيها سطولة لبن صغيرة وسطول فيها جبن
وهنن ماشين جنب بعض متجهين لعند السيارة
حكي شوكت :بعد شوي بدا تطلع مقابلتنا ع التلفزيون
محمد :عنجد
شوكت :والله .. شو مابدكن تتفرجولا
منار :بالنسبة الي مابدي شوف شي .. بالحقيقة ماني عم طيق شوفكن بدي شوفكن ع التلفزيون كمان
اياس : لاتنسى انو انت المعلم تبعنا وانت يلي اكتر واحد حكي بالمقابلة
منار : يعني هالمقابلة ماكان الها لزوم نهائيا .. بهالبلد بس يشوفو حدا عم يشتغل ومستور بتديق عينن عليه .. العما ولوو
شوكت :ليش لتقبل يعملو معنا هالمقابلة من الاصل
منار :ماحبيت خجل المذيعة 😂😂
محمد :شفت شقدها حلوة
شوكت :والله ضررب 😂😂😉👍
هدول الشباب الاربعة رح عرفكن عليهن عن قرب
منار شب محترم كتير وتقيل .. بس تقيل عحالو ومع الناس كتير متواضع وبحب الخير .. اياس ابن خالتو لمنار وكمان اخلاقو وتفكيرو بيشبه منار كتير .. شوكت شب مغرور جدا بجمالو ومفكر اذا اشقر وعيونو الخضر كل البنات راكضين وراه وكل يوم بيحكي مع بنت وبيترك بنت .... محمد شب طيوب كتير ولا هو مغرور ولا حتى محترم 😅 بايع هالدنيا وماشي .. في رفيقن الخامس وهو معاذ يلي عرسو اليوم .. هو شب حلو كمان بس عندو شوية غرور متل شوكت
صح هون رفقاتنا كل واحد عقلو شكل وتفكيرو شكل .. بس بمحبتهن لبعض كلن نفس الشي .. ومع بعض للموت
بس ياترى رح يجي شي ويفرقن 🤷♀️🤷♀️
___________________
عباب المدرسة يلي عم يقدمو فيها البنات فحصهن
واقفين بنتين وطلعو بنتين وتجمعو مع بعض
البنات هنن (المى و مريم وغزل و ديمة)
المى بنت حلوة ونعومة جمالها عادي بس جمال بشرتها وبياضها بيلفت يمكن لانها مابتشوف الشمس من حرص ابوها عليها وشخصية كتير خجولة
مريم بنت بتلبس نضارات ومبينة بنت مجتهدة وجدية .. وبالنسبة لجمالها حلوة عادية
غزل بنت شعرا كيرلي سمرة ناعمة
ديمة كمان حلوة وناعمة ومبين انها بنت عاقلة وهادية
ديمة : كيف فحصكن بنات
مريم :ممتاز
المى :منيح
غزل :ماشي حالو
ديمة :وانا مابعرف
المى فتحت موبايلا ولقت رسالة من ابوها .. وتغيرت ملامح وجها لخوف
المى :يا بنات بابا باعتلي رسالة تعي مع رفقاتك مارح يقدر يوصلني
مريم :اي شوفيها
المى :لك كيف بدي روح ع البيت لحالي .. وكمان بابا بحياتو ماخلاني روح لحالي عشي مكان .. اكيد صاير معو شي
ديمة :المى لا تجني
المى :شو ما ماجن .. اكيد صاير شي
كبست ع الاتصال لتحكي مع ابوها .. بس ماكان عندو تغطية
المى بصوت خايف :خارج التغطية 😥😥
غزل :لك شو الجديد.. ما ابوكي عطول لما بسافر بصير تلفونو خارج التغطية
المى :لا لا .. الرسالة من نص ساعة .. يعني ماحلو يطلع برات البلد
مريم :بركي بعتلك اياها ع الحدود
المى :عم قلكن لاا .. هو اليوم ماعندو شغل وكمان عأساس يجي ياخدني
غزل:المى مشان الله حاج جنانك
المى :انا متأكدة انو في شي .. ياربي دخيلك كلشي الا بابا 😭😭
ديمة : اتصلي بخالتك سمرا
المى: اي والله جبتيها
طلبت رقم خالتها وحكتها
(المى: كيف خالتي
سمرا :اهلين حبيبتي
المى :وينو بابا ..خالتي
سمرا :صار عندو شغل وراح
المى :عنجد
سمرا :والله
المى :يعني بابا منيح
سمرا :اي حبيبتي منيح ..
المى :طيب كيف بدي اجي ع البيت انا
سمرا :مع رفقاتك
المى :طيب ماشي
سمرا :حبيبتي لازم تعتمدي عحالك .. بابا مانو دايملك .. المى حبيبتي لازم تكوني قوية
المى :ماشي ماشي خالتي .. بدك شي
سمرا :لا توصلي بالسلامة
اجت لتسكر المى .. سحبت الموبايل منها غزل : الو .. الووو.
سمرا :اي معك
غزل :خالة سمرا انا غزل
سمرا :اهلين غزل
غزل :خالة نحنا رايحين عكافيتيريا معلش المى تجي معنا
المى :لا لا .. مابدي اجي مع حدا
سمرا :اي حبيبتي غزل خدوها معكن .. خليها تشوف العالم
اخدت المى الموبايل وقالت :بس ياخالتي
سمرا :لك بنتي لايمت بدك تضلي هيك .. طلعي وفوتي وشوفي الدنيا
المى :طيب وبابا
سمرا :ابوكي عندي ولايهمك .. طلعي مع رفقاتك وانبسطو
المى :طيب على مسوؤليتك
سمرا :ماشي ع مسؤوليتي
المى :باي
سكرت وقالت تفضلو )
مريم :انو عادي شوفيها بتضلي خايفة
المى :لك بابا عودني على هيك
ديمة :لك دخيل ابوكي
غزل :خلصونا تعو نفتل شوي بالسوق وبعدا نروح نشرب شي لاحقين ع الضيعة
المى :سووق كمان ؟؟
دفشوها قدامن وقالو :لك امشيي.. حاج تعقيد
البنات متل ماشفنا المى كتير خجولة ومترددة بكلشي بس ما بيعني انها غبية ... مريم مبين شخصية جدية وذكية ... غزل وديمة نفس الشي انو متلن متل غيرن من بنات هالايام كل همن جمالن وشعرن ولبسن وكمان دراستن .. وطبعا قلوبهن كلها طيوبة
___________________
بالمعمل
ركب منار بسيارتو وانطلق .. وبغرفة صغيرة داخل المعمل الكل مجتمعين وقاعدين قدام التلفزيون
شوكت :هاه بلشت المقابلة
مسك الريموت وعلا الصوت
___________________
بالبيت عند سمرا
قاعدة بالصالون
حطت الموبايل جنبا بقهر وقالت :والله هالبنت صار عندا عقدة من ورا ابوها
اتطلعت ع التلفزيون ولا طلعت المقابلة علت الصوت وقعدت تتفرج
المقابلة : (( المذيعة واقفة قدام المصنع ومعها الميكروفون وعم تحكي : يسعد اوقاتكم من وين ما كنتو .. واليوم رح نقدملكن حلقة جديدة من مشاريع الشباب والسواعد الموحدة .. نحنا اليوم واقفين امام معمل البان واجبان الصداقة .. هاد المعمل البسيط بصير بقرية صغيرة اسمها السمرة .. هاد المعمل بديروه مجموعة من الشباب الطموحين يلي ماقدرت توقف بوجهن ظروف الحياة ومشاكلها .. مجموعة من الشباب يلي في متلهن كتير بهل البلد وتغلبت عليهم البطالة .. بس هدول الشباب ما استسلمو وصارو ايد وحدة ليحسنو وضعن ووضع ناس كتير بهالقرية .. وهاد المعمل المتواضع صار باب رزق اغلب سكان هالقرية الجميلة .. تعو خلونا نتعرف على المعمل وعلى الشباب ليحكولنا كيف بلشوا هالمشوار
دخلو عملو جولة بالمعمل وشافو الالات وكيف العمال عم تشتغل ..
المذيعة :هي عملنا جولة على المعمل وشفنا كيف العمال عم يشتغلو بكل نشاط .. والاهم انو كتير متأنين بشغلن وكمان نضافتهن .. وهلأ خلينا نروح ونحكي مع الشب يلي لمعت براسو هالفكرة وهو طبعا المؤسس ..
مشو ع الغرفة يلي بيجتمعو فيها شباب المعمل.. دقو الباب وفاتو وكان منار باستقبالن
المذيعة قربت وسلمت عليه وقالت :حضرتك الاستاذ منار
منار :اي انا منار واهلا سهلا فيكن .. تفضلو ارتاحو
قعدت المذيعة قدام منار وقالت :رح اخد من وقتك شوي
منار :اكيد تفضلي
المذيعة : بدي تحكيلنا كيف بلشت بهاد المشروع .. وشو الدوافع يلي خلتك تبادر لهيك شي
منار :بالاول بدي عرف عن حالي اسمي منار الحسن .. خريج ادب عربي
المذيعة :اها .. دارس جامعة
منار :مابس انا .. تقريبا كل يلي معنا هون معن شهادات واقل شهادة هية البكالوريا
المذيعة : شي مؤسف جدا
منار : طبعا شي مؤسف .. انا تخرجت وصرت دور عشغل .. وطبعا هون بتعرفي انتي بدك واسطات لتقدري تتوظفي .. واذا مثلا توظفت بدن يشلفوني اخر الدنيا .. وعشان شو عشان كم الف اخر الشهر .. فأنا قلت خلي الوظايف لاهل الوظايف هي الشغلات مابتناسبني ... نحنا الحمد لله منطقة زراعية يعني خيراتها كتير وقلت الا ما نلاقي شي مشروع يناسب ضيعتنا
المذيعة :حلو كتير .. وكيف خطرت عبالك الفكرة
منار :انا بالاول قلت بدي اطلع وافلح الارض وازرع فيها شي شغلة وانطر موسمها .. بس بصراحة انا مالي مراق ابدا بالفلاحة والزراعة .. صفنت فيها ولقيت عنا بالضيعة كل بيت عندو بقرة او بقرتين .. والحلاب يلي بيجي بياخد الحليب من ضيعة تانية وبينقلن ع المدينة هنيك في معمل ... يعني بكل الضيع يلي حوالينا مافي معمل حليب .. جمعت رفقاتي وقلتن بدنا نعمل هيك وكلن وقفو معي .. جمعنا المصاري لي معنا ونقصنا شوي .. تدينت من ابي وعملنا هالمعمل .. وصرنا نستورد كل الحليب يلي بضيعتنا وبالضيع المجاورة .. والحمد لله الله فتحا بوجهنا واللبن والجبن يلي بنصنعو عليه اقبال كبير وشغالنا عم يكبر وسيطنا عم يكبر وهيك صار
المذيعة :الله يرزقكن يارب ويفتحا بوجهكن اكتر واكتر .. اي قلي استاذ منار هاد المعمل يعني بيعتبر الك
منار : لا لا .. هاد الي ولرفقاتي
المذيعة :يعني متل الشركاء
منار : بالظبط والارباح بتنقسم علينا بالتساوي
المذيعة :كم رفيق انتو
منار :خمسة .. انا ومحمد واياس وشوكت ومعاذ
المذيعة : وكيف مقسمين الشغل عليكن
منار :مثلا انا بوزع اللبن والجبن على المحلات وعم اطلع ع المحافظة ووزع هنيك .. في شوكت هو عبارة عن حلاب بلم الحليب الصبح بكير من بيوت الناس .. في اياس هو المسؤول عن شو بيدخل ع المعمل وشو بيطلع في محمد ومعاذ مسؤولين عن العمال وكمان بساعدوهن .. وهيك
المذيعة : وكم عامل عنكن بالمعمل
منار :حوالي ٢٠ عامل
المذيعة :من الضيعة ؟
منار :طبعا
المذيعة :حلو كتير والله يوفقكن .. وياريت في هيك نماذج منكن بكل المحافظات بيقدرو يعتمدو عحالن وين ماكانو
منار :تشرفت فيكي وبهاللقاء الظريف اللطيف
المذيعة :بدنا نقوم نتعرف عرفقاتك اذا مافي مانع
منار :طبعا تفضلي )
رفعت سمرا الريموت وسكرت التلفزيون وهية عم تعض على ابهامها وقالت :اي ماتبلى يا منار .. شو هالجمال والشخصية .. اااخ بس لو اقدر اوصلك .. مامتل هالجربان شوكت .. بس وحياتك لجيبك لتحت صرمايتي وانا سمرا
وقفت وراحت لتشوف طبختها يلي ع الغاز
_________________
بالمعمل
العمال كلن طالعين واياس ومحمد وشوكت عم يسكرو البوابة
اياس :كيف لقيتو هاللقاء
محمد :حلو كتير
شوكت :بس مافيه غير منار
محمد :اذا مع كل واحد بدن يعملو لقاء بدن يضلو طول اليوم .. وكمان منيح انو حكي منار انا كنت رح اتلبك
اياس :وانا مالي مراق لهيك شغلات
شوكت : قولتكن .. المهم بدكن تروحو لعند معاذ نشوف شو بدو مساعدة
محمد : انا لا .. صرلنا جمعة عم نساعدو .. وماضل شي
اياس :مظبوط ..يادوب روح نام شي ساعة وبعدا اتحمم والبس وجهز الاراكيل
محمد :اراكيل شو
اياس :اركيلتي واركيلة منار .. يمكن مايلحق
محمد :رايح ع بيت منار تجيب الاراكيل من هنيك
اياس :اي .. اركيلتك هنيك ؟
محمد :ليش وين عم نسهر غير هنيك .. اي هنيك
شوكت :وانا كمان اركيلتي هنيك .. بشرفك جبلي اياها معك حنون
اياس : ماحزرتو اركيلتي واركيلة منار وبس .. بدك اراكيلكن تعو خدوهن
شوكت :تضرب من بين الرفقة
اياس :هاد الموجود .. انا لو مامنار قلي يمكن يتأخر ماباخدلو اياها
محمد :لا والله فيك الخير
شوكت :لكن خلونا نروح ع البيت لعندو نجيبن ونروح
محمد :يلا جيب السيارة لكن
شوكت :يلا
راح لجنب المعمل ركب بسيارة بيك اب مفتوحة من ورا .. ومحطوط فيها بيدونات حليب .. هي يلي بلم فيها حليب .. دورها واجا فيها لعند رفقاتو .. فتحو الباب ركبو معو وانطلقو
_______________________
سيارة منار واقفة قدام محل لبيع الالبان والاجبان
وهو داخل المحل وعم يحكي مع صاحب المحل
صاحب المحل :يا منار يستر على عرضك نزلن كلن .. والله عندي طلبيات
منار : والله مافيني كمان في عالم موصيتني
صاحب المحل :بشرفك دبرها
منار :لك والله ماني حابب خجلك بس عاطي كلمة لمحلات غيرك .. تلفوني من الصبح ماهدي وهنن كل شوي يتصلو فيني ويقولولي وينك ووين صرت
صاحب المحل :بعطيك زيادة
منار : لاحول ولاقوة الا بالله
صاحب المحل :ماقلت انو اليوم عرس رفيقك نزلهن واتكل ع الله مشان تلحق العرس
منار : طيب رح نزلك بس مو كلن .. رح خلي معي شوي لانو في واحد مأمني على مية سطل لبن و٢٥ قالب جبنة بدو اياهن ضروري
صاحب المحل : خلص اتفقنا ..
منار :لكن انده للشغيل يجي ينزل معي
صاحب المحل يا ولد .. تعا نزل مع منار
مشي اتجاه الصندوق وفتحو .. وصارت تطلع منو هوا مسقع ..
طلع منار وصار يقربلو الصناديق وهداك صار يدخلن ع المحل
قرب صاحب المحل وقلو :مافي جبنة مشللة ومجدلة
منار :لا .. في طلب كبير ع اللبن وماعم نلحق
صاحب المحل : اي والله بهالشوب العالم ماعم تطلب غير اللبن .. بس انتو لازم تكبرو شغلكن
منار : ان شاء الله .. ان شاء الله
خلص منار ونط من السيارة على الارض .. بتضرب عينو على الدولاب وبلاقيه نازل
منار :هلأ وقتك اوووف 😤
اجا صاحب المحل من جوا ومعو مصاري عم يعدن .. وقال :تفضل عمي
منار :شقد حسبتهن
: متل ماقلتلك مع الزيادة
منار :لا عمي .. ع الحساب القديم
: لك والله مافي منك يا منار .. روح الله يوفقك
منار :تسلم يارب ..
صاحب المحل رجع عد المصاري واخد منهن شوي واعطى الباقي لمنار
منار :معوضين .. عم وين في كومجي هون
: خير شوفي
منار :الدولاب مبنشر
: ييي .. بس لاتخاف لقدام شوي جنب الكافيتريا في دخلة بهي الدخلة بتلاقي كومجي
منار : ماشي .. يلا بخاطرك
راح ركب ورا الدركسيون ومشي
_________________
بكافيتريا متواضعة دخلو البنات وقعدو على طاولة
مريم :شو تشربو
المى :مافي كرسون ؟؟
مريم :ههه لا هي الكافيتريا اخدم نفسك بنفسك .. انو كافيتريا متواضعة .. وكمان مانها بنص المدينة
المى : اممم
مريم :المهم شو تشربو
المى :انا قهوة متل الاكابر😅😅
ديمة :وانا قهوة
غزل :بدي تلاتة بواحد
مريم :ماشي .. تكرمو
مشت مريم لعند البوفيه لتجيب لرفقاتا
______________
عند الكومجي
واقف منار واديه بجيابو وفي شب واقف عند الدولاب وضربو ضربتتين برجلو وقال : فكلك اياه ولا بس انفخو
منار :لا لا فكو .. لانو عطول عم ينفس
الكومجي :رقعتو ؟؟
منار :اي .. خلص اخي اتكل ع الله وغيرو .. مابدي عل قلبي فيه
الكومجي :بتأمر .. تفضل ارتاح لبين ماخلص
منار : انا واصل ع الكافيه يلي جنبكن وجيب فنجان قهوة بركي بصحصح
الكومجي : متل مابدك .. بس شوبدي قلك
منار :قول
الكومجي : محمل لبن بهالسيارة
منار :شو شايف مكتوب ع البراد
الكومجي :البان واجبان
منار :اصبح شو محمل فيها
الكومجي :قصدي في معك لبن
منار :اي
الكومجي :زكاتك بدي سطل وشقد مابدك حقو تكرم ..
منار :هههه انت اعمل الدولاب ولايهمك
الكومجي :عرااسي والله
منار :مابطول
الكومجي :ماشي
مشي منار اتجاه الكافيتريا ودخل ووقف ع البوفيه وقال :لو سمحت فنجان قهوة
:تشربو هون ولا تاخدو معك
منار :لا ماخدو معي
:تكرم
التفت عيمينو وشاف مريم و صاحب المحل عم يعطيها صينية عليها قهوة ونسكافيه وقال :شو مريومة هون
التفتت عليه وقالت :منار ؟؟ .. كيفك يا ابن خالتي
منار :منيح كيفك انتي
مريم :انا تمام التمام.. شو عم تعمل هون
منار :سيارتي عم غيرلا الدولاب هون في كومجي قريب
مريم :ايو سيارة
منار :البراد
مريم :وكيف بنشرت .. كنت محمل .. عملت شي حادث ؟؟
منار :هههه دغري بتصير تحلليها .. اطمني منيح وماصابني شي
مريم :اي الحمد لله
منار :انتي احكيلي شو عم تعملي هون
مريم : اليوم كنا عم نقدم اخر فحص بكالوريا
منار :اي حلو كتير .. وشو توقعاتك
مريم:اذا ما الاولى التانية 😅😅
منار :هههه حلو واثقة من حالك
......
عند البنات
المى :مين هاد يلي واقفة معو مريم
اتطلعو غزل وديمة وقالو :هاد منار ابن خالتا .. مابتعرفيه
المى :لا
غزل :هههه احسن
ديمة :شايفين شو حلو وجنتل
غزل :اي عنجد هالشب حلو ومهيوب
.........
مريم :اي بهالمناسبة جيت انا ورفقاتي نشرب شي قبل مانروح ع الضيعة
منار :المدرسة يلي قدمتي فيها قريبة يعني
مريم :اي هون
اجا صاحب الكافيتريا وقال :تفضل القهوة
اخدها وحكي : اذا بدكن بوصلكن بطريقي انا ان كترت نص ساعة وبخلص .. بتكونو انتو شربتو قهوتكن
مريم :هههه شو تاخدنا .. نحنا ٤ وين بدك تقعدنا اذا مافي مكان غير لواحد
منار :اممم ٤ والله صعب .. خلص دبرو حالكن 😅
مريم :ولايهمك
منار :يلا مابدي اخرك بردت قهوتكن
مريم :ماشي .. سلم
تركتو ومشت وهو لحقها بنظرو انو بشكل عام .. وتجي عينو بعين المى .. هية لما شافتو عم يتطلع عليها بسرعة نزلت نظرها .. بس هو تبسمر مكانو .. تفاجئ فيها .. حس حالو تلخبط ..ومابدو يرفع نظرو عنها .. وشرد فيها وهية متجاهلتو
صاحب المحل :بدك شي غيرو استاذ
التفت عليه وقال لا شكرا .. طلع من جيبتو مصاري عطاه وطلع .. بس وهو طالع ما عم يتطلع قدامو .. كان عم يتطلع عليها
وهية كمان رفعت نظرا اتطلعت عليه ورجعت بعدت عيونا عنو بسرعة وحكت : مريم عنجد هاد ابن خالتك ؟
مريم التفتت لتشوفو اذا رايح وطلع عنجد رايح وقالت :اي
المى :مابعرفو
ديمة :هههه مشان الله تسكتي .. ليش انتي مين بتعرفي من الضيعة
غزل :صحي المى انا ليش بحسك من كوكب تاني
المى :هههه شو غلاظ
غزل :لك صحي بدكن تروحو اليوم ع العرس
مريم :انو شو هالسؤال طبعا اي
ديمة :انا كتير متحمسة 😍😍
غزل :ياي وانا كمان .. رح ضبط حالي واطلع حلوة كتير
مريم :مشان شوكت 😒
غزل :يروح ينكب .. مافشر لسه اتطلع فيه
المى قاعدة وساكتة
ديمة : شو عدا مابدا
غزل :لك مغرور كتير .. واذا اشقر وعيونو خضر ماضروري يكون حلو .. الله وكيلكن نفسيتو يلا خليني ساكتة
مريم :لا بزمتك كفي 😂😂
غزل :الله وكيلكن بيشبه البس (القط) يلي عند بيت جدي اشقر وعيونو خضر .. حتى البس احلى منو 😂
ديمة :عنجد احكيلنا شو صار
غزل : لك مابعرف .. بالاول كان حلو ومهضوم بعدين صار يبعتلي صورو .. وكل شوية يبعتلي بالله ما شخصية وبالله ماني حلو .. وانا سايرو .. بالاخير صار بدو يغمق بالحكي وانا مارضيت
المى :شو يعني يغمق
ضحكو كلن
مريم :الله عليكي يا المى شو انك بريئة 😂😂
المى :امانة ولوو لاتخلوني هيك مابفهم شي .. والله بحس حالي صغيرة لما بقعد معكن .. اماني فهموني
ديمة :يعني يغمق يحكو حكي بزيء
المى :متل شو
غزل :هوهووو علينا شبك المى ..
مريم :المى حبيبتي يعني حكي .. انو مثلا بقلا تصوري وانتي لابسة حفر .. او شو لون جسمك ..
المى :اي اي فهمت عليكن
غزل :الحمد لله 😩 .. المهم قلتلو انا هاد الحكي مابحكيه .. انت اذا بدك اياني بتعرف بيت اهلي .. ومابدك اياني كل واحد من طريق
ديمة :وشو قال
غزل : قال انا ماعم طور علاقتنا .. وانا يلي مابدي اياه وانا عم اعمل حجج مشان بعد
المى :وبعدين
غزل : احطلوا.. كذاب بدو يتسلى
مريم :مظبوط وانا سألت اخي اياس عنو قلي انو بحب يتسلى ما اكتر
ديمة : ياريت يكون متل اياس 😊😊
مريم :احم .. احم
ديمة :بصراحة مريم عنجد بشلة اخوكي مافي غير منار واياس بتحسيهن رجال .. عنجد مشالله عنن كلن هيبة
غزل :اي مظبوط .. اي لما بيمشو بالضيعة هيبة .. ما متل البس البراري شوكت
ديمة :انو بدي افهم انو الشباب مين مفهمن انو البنت بتحب الشب الاشقر
غزل :هههه مابيعرفو انو البنت بهمها الجمال قدا ما بهما الحضور والشخصية والهيبة
مريم : ههههه اخ منكن انتو التنتين 😅😅 شو متفضين .. المهم قولولي شوبدكن تلبسو
غزل :بلوزة وبنطلون
ديمة :حابة البس فستان
مريم :اي لانك رايحة ع شي صالة .. حبيبتي نحنا بضيعة .. يعني بدك تلبسي سبور مشان تعرفي ترقصي وتدبكي
ديمة :اصبح رح البس كمان كنزة وبنطلون وبوط
مريم :وانتي المى
المى :انا؟؟
مريم :اي انت .. شو ماعزومكن
المى :اي .. بس بابا مابظن يوافق
مريم :ليش لحتى مايوافق
المى :والله مابعرف .. يمكن لو انو هون كان سمحلي روح معو ساعة وبرجع غير هيك لا
مريم :حبابة ولوو دبريها .. اسألي مرت ابوكي
المى :والله مابعرف
ديمة :خالتك حبابة واكيد رح تسمحلك تجي معنا
المى :بعرف انها حبابة .. بس مشان بابا
غزل :شو يعني ابوكي هلا عرف .. بكون صار خارج القطر
المى :هلأ انا مابعرف بالبيت بسألها وبرد عليكن خبر
مريم :اوكي .. بس عملي جهدك تجي ها .. والله كتير رح ننبسط
المى :ماشي .. ماشي
ضحكت غزل وقالت :حاسة انو عم ننزعها ل المى
مريم :وين عم ننزعها .. بالعكس عم نفتحا ع الدنيا احسن ما تضل غشيمة
المى لما سمعت هيك قالت :رح اجي ع العرس
مريم :حلووو
المى :مابدي كون غشيمة
ديمة :ولا يهمك الثلاثي المرح معك والله ليطالعوكي عن حالك 😂😂😂
صارو يضحكو 😂😂😂😂😂
______________________
منار ماشي بسيارتو اتجاه الضيعة .. وساند ايدو ع الباب وشارد وفي تساؤلات داخلو :مين هي .. اول مرة بشوفا .. اكيد مو من ضيعتنا .. بس سبحان الذي خلقها على هالجمال .. ياريت ارجع شوفها مرة تانية
____________________
عند المغرب
نايمة المى بغرفتها .. دخلت لعندا مرت ابوها وقالت :المى .. يا المى
فتحت عيونا وقالت :اي خالتي
سمرا :قومي حاجتك نوم .. صارت الدنيا المغرب
تجلست وقالت : ييي شقد نمت وماحسيت
سمرا :لانك ارتحتي وامنتي انك خلصتي فحص .. ونمتي مرتاحة البال
المى :اي والله يمكن
سمرا :اتصل ابوكي
المى :عنجد ؟؟ ايمت راجع ؟
سمرا : مامبين معو قال
المى :امممم
صارو يسمعو صوت اذاعة برا وتشويش
المى :شو هالصوت
سمرا :مافي عرس بالضيعة اليوم اكيد عم يضبطو البفلات
المى :صحي خالتو بدنا نروح ع العرس
سمرا :اكيد بدنا نروح
المى بفرح :عنجد ؟ وبابا؟
سمرا :سألتو وقلي روحي
المى :روحي ولا روحو
سمرا :لا روحو .. يلا قومي جهزي حالك
قامت من تختها وقالت :يلاا 😍
________________
ببيت تاني بالضيعة
وبغرفة نوم مريم عم تفيق اخوها
مريم :ايااس.. يا اياااس
وهو نايم :لك شووفي
مريم :صارت الدنيا بعد المغرب
تجلس بسرعة وقال :شووو
مريم :من ساعة عم فيقك
اياس مسك تلفونو وقال :منيح محدا متصل فيني
مريم :متل مين ؟
اياس :انو حدا من الشلة .. يلا منيح
مريم :شو بدك تلبس اخي
اياس :الطقم الكحلي .. ليش عم تسالي
مريم : انو بدي اخي يطلع احلى واحد
اياس :هههه بس مارح تميزيني عن رفقاتي
مريم :ليش
اياس :كلنا لابسيين نفس التياب
مريم : ما دخل .. ما قالو القالب غالب .. متأكدة انك رح تطلع احلا واحد .. بكفي اني اختك
اياس :اها .. اي منيح 😂😂
مريم :انا رايحة البس .. لا تروح خدني معك
اياس :ماشي
طلعت خطوتين ووقفا اياس : مريم .. مريومة
مريم :نعم
اياس :الك ولا للديب
كتفت اديها وقالت :شووو
اياس : الله يوفقك يا اختي الحلوة ..جهزيلي راس الاركيلة
مريم :😤😤😤 .. طيب ماشي
اياس :بصراحة هنن راسين
مريم :كمااااااان 😩😩 امري لالله اخي بحبك وماردلك طلب
اياس :لك احلى اخت بالدنيا 😘😘
مريم :وينن
اياس :ليكي الكيس هداك فيه العدة كلها
_____________________
ببيت ديمة
واقفة قدام المراية وعم تحط ع تمها حمرا .. وجنبها غزل وقالت :لك خلصينا
ديمة : عشووو مستعجلة اذا لسه محدا راح
غزل :شو محدا راح .. الكل صارو هنيك
ديمة :بس صوت الاغاني لسه ما طلعت
غزل : قال سمعت بدن يجيبو مطرب
ديمة :ومينو
غزل : مابعرف .. بس هيك سمعت
ديمة :المهم .. طالعة حلوة
غزل :كتيير .. وانا
ديمة :قمررر
انفتح الباب عليهن وكانت امها لديمة : ماما رايحين معنا
ديمة : اي ماما رايحين معكن
امها :يلا استعجلي
ديمة :ثواني
امها لغزل :خالتي اهلك راحو
غزل : مابعرف اذا راحو ولا لأ بس انا قلتلن انو جاي معكن
امها :ماشي .. يلا لاتطولو
ديمة :يلا بس لالبس برجلي
طلعت امها وديمة قربت لتحت التخت وسحبت كرتونة كندرة جديدة وطلعت منها كندرة حلوة بكعب عالي
غزل :بدك تلبسي هي؟؟؟
ديمة :اي حلووة ؟؟
غزل :وكيف بدك تمشي فيها
ديمة :بدبر حالي
غزل :تسطفلي .. صحي قولتك المى بدا تجي
ديمة :مابعرف ..قالت بدا تجي .. بس بماتغير رأيها
غزل :يا ريت تجي رح ننبسط كتير 😍
ديمة :والله مارح خلي حدا الا واحكي عليه 😂😂
غزل :ولاتنسي تحفظي العالم كيف عم ترقص
ديمة :طبعا مشان نقلدن 🤣🤣
غزل :الله لايسلطنا ع مخلووق 😂😂😂
______________________
عند شوكت واقف قدام المراي عم يتأمل حالو بغرور ..
اخد الفرشاي ومشاها على شعراتو كـ لمسة اخيرا وقالت : اي ماتبلى
اخد الموبايل وقال لشوف سمرا رايحة ع العرس
فتح ع اسمها واتصل
__________________
سمرا كمان عم تشيك ع حالها .. رن موبايلا .. اخدتو وردت
سمرا :اهلا ابو الشوش
شوكت :جاي ع العرس
سمرا :اي
شوكت :وجوزك وينو
سمرا :مسافر
شوكت : مين بدو يجي معك ع العرس
سمرا :ولادي وبنت جوزي
شوكت :طيب منيح .. بقدر شوفك عجنب برات الشادر بالعرس
سمرا :امممم ليش
شوكت :حابب شوفك عن قرب
سمرا :وانا كمان
شوكت :لكن دبريها حنوني
سمرا :من عيوني
شوكت :باي ياحلو
سكرت الخط وهية مبتسمة وعم تغض ع شفتها
انفتح الباب ودخل ولد عمرو عشر سنين
بشار :ماما مطولة
سمرا :لا جاي وين اخواتك
بشار :عم يلبسو برجليهن
سمرا جاي
وقفت وكانت لابسة بنطلون اسود قماش وفوقو بلوزة سودة واديها شاش وفيها لمعة دهبية
طلعت لعند المى يلي لابسة كنزة شوي فضفاضة والقبة مفتوحة لعند كتافها .. والكمام تلت رباع وشعرها عاملتو ضفيرة ونازلة على صدرا .. وبنطلون خصر عريض ورجل ديقة وعليه بوط اسود هادي صح كانت بسيطة بس كتير حلوة .. حتى سمرا حسيت بالغيرة منها
سمرا : شو جاهزين
المى : اي جاهزين
سمرا : يلا قدامي لكن
طلعو وراحو ع العرس .. راحو مشي لانو المسافة قريبة .. اول ما دخلت المى شافت رفقاتا قاعدين جنب بعض ورفعولا باديهن
المى :خالتي رايحة لعند رفقاتي
سمرا :ماشي
مشي وراسها بالارض وراحت لعند رفقاتا
وسمرا شافت وحدة من جاراتا وقعدت جنب
سمرا :كيفك ام محمود 😊
والولاد راحو يلعبو مع الولاد
قربت المى وقعدت مع رفقاتا كانو قاعدين بالصف الاول من الكراسي
المى :ليش قاعدين هون
مريم :وين بدنا نقعد
المى :هيك قدام الكل خلونا نرجع لورا شوي
ديمة :بالله شوو مابنعود نشوف شي ..
يتبع...
YOU ARE READING
السمرة __بقلم مريم اليوسف ___
Adventureقريتنا القرية السمرا مشهورة بشجرها ونهرا وناسها في منهم الطيبة والسكرة وفي منهم قاسية وعقول متحجرة بقريتنا رح يصير فيها قصص حب معمرة وقصص فاشلة مبتكرة ورح يكون فيها الخبث والطيبة والقلوب المتكسرة ورح يكون فيها الهيبة والغرور ون...
