عروسة والحبايب زافيها
حلو ثوب العرس لايگ عليها
البدله بيضة كاعده على جسمها
هية طويله ورشيقه
وبالصالون سوولها تسريحة مرفوعه تخبل
ومكياج اجمل من مكياج يوم الحنه
والشفة المليانه مزينها الون الماروني
الطرحة او البرگع
نازل على اكتافها
ماسك الورد بيدها شايلته
وقرآن زغير خليناه بصدرها ميبين ولا يتعب بالشيل
وبنات خالتها وبنات عماتها وبنات عمامها
كلهن مبدلات ومحاوطات العروس
الي تصفك ولي تركص
ولي تعدل بيهة كل شويه
ولي تبشبش باذنها ماعرف شيعلمن بيهاا ههههههههه
اخر لحظات وجودها في بيت اجدادها
بيت احتواها وكبرها لكن تأثير النفسي ما نطاها المجال تحس بالنعمة الي جانت عايشتها
تبحث عن استقرار عن حياة عن شيء يملئ الفراغ
وصلت الزفة
وكعادة اي عروس من تقرب اخر لحظات وجودها ابيت اهلها
ترتبك وترتعش وتظل نظراتها تتجول عالي حواليها
وقلبها يضرب ضربات عنيفه
يعلن عن تأثيرة بالموقف
تبحث عن الاطمئنان في وجوه كل الحاضرين
كل البنات اجمعن يمي خايفات يحتمن بية
ههههههه علاوي مانع اي بنت تروح بالزفه غيرنا احنه الكبار
كتلهم مالكم دخل اني اطلع تطلعن وياي اشوف منو يرجعجن
ليش كم يوم زافين بنيه
انتن خواتها توصلنها البيت رجلها ترافگنها
منو عدها هية
محضرين الكب انلبسه الها قبل لا تطلع
لان بدلتها دلعه ومكشوفه الصدر الا من حمالات كرستال
دخل امير بقاطة وبجماله الاسمر
وعمامة زافي العروسته
رجال كبايريه
دققت بوجها ابحث عن الفرحة
اخاف الولد مغصوب وتتبخر كل امالنه باحتواء هذه البنت العنيدة الثائرة
شفت ابتسامة هادئة طالعه من محياه
أشرلي باصبعه علامة اوكي
معناه راضي عن صالونها
البارحة جنه نتخابر اني وياه وكلة
راح تتفاجأ بشعرها والتغيير الصار
دخلت وراه هديل بهلهولتها الصادحة
وهوساتها خواته ملتمات حول امهن يصفكن
وحبايب امير من العمات والاقارب وحته بيبيته ام ابو جايه الزفه حفيدها الاكبر الابنها
والمزيقى ادك بكراج بيت الجد
يم شجرة النبگ واكفين الفرقة
الاصدقاء والاصحاب واولاد العم وكل محبين امير واهلة
يردحون ويركصون ويهوسون للعرس المبارك الغاليهم العريس
عرس امير هيل وطش بالولايه
عرس امير هيل وطش بالولايه
نشكر من كال اخذوها
نشكر من عمها وابوها
اليوم يومك ياا بطل
اليوم يومك ياا بطل
عمها فاضل ومحمد وجاسم واكفين بالباب
علاوي ابن عمها وحسين اخوها وياهم
الچكليت ترس المكان
وعادة كل الاطفال بالاعراس تنزل تلم الي يوكع بالكاع
ومحد يتحرك من الكبار الى ان الزغار تكمل جمع الچكليت من الارض
أنت تقرأ
الجنة ليست لها
Romanceالجنه تحت اقدام الامهات وضعها الله سبحانه جزاء للتي تستحقها فهل يا ترى ستكونين ممن يستحقونها فأن كان لكي فيها نصيب فنصيبي منكِ سيطردكِ منها قريباً بقلم قمر الزمان 💋💋
