الجنة ليست لها

الجزء الثاني والعشرين

ليش هيج سويتي بروحج يا يمة
انتي تعبانه وصحتج على كدج
هسة زين هاي  نومتج بالفراش

ماكدرله اذا مو هيج يطلع من شوري

يمة ترة  حسين كبر
ومن حقه يطلع ويه اصدقائة
ترة انتي راح تنفري منج بهذا حرصج الزايد الماله داعي

اي اي ماله داعي
لما يوكع الفاس بالراس عود ذيج الساع كومن ولولن

يمة ليش تفاولين علي
ترة هذا اسلوبج وتعيري بامة راح يخليه يضوج منج
الولد ما يتعير يا يمة
احنه طمرنا ذكر اسمها كل هاي السنين حتى ما يتاثر بيها
ونتي تصيحين كدام الكل امة ما امة
هوة وين شاف امة
وين ربت منه كله سنتين مدري ثلاثه الي شافها بيهن

لعد جذب مو امة راحت وعافتهم وتونست واني اكلتها

شلون يمة الحجي ميفيد وياج
لعد منو كال للموت جهال عبدالله ميطلعون من هذا البيت
منو بفاتحة ابويه يوصي
اذا متت اني انتن من بعدي تكملن الرساله
ولد عبدالله بامانتكم

لا ميفيد والله البارحة الخاطر رياجيلكم خليته يدخل
والا اني هذا الحجي ميصرفلي وانتن لا اظلن اشجعن بي

يمة شنشجع منه
ترة كل الولد يطلعون يتونسون يجتمعون
قابل بس انتي عندج ولد
العطله تجي اتوسل بيج تخلي يشتغل حتى يطلع ويشوف ناس ويكتسب شخصيه
وانتي متقبلين
وتعالي قنعيني انتي صدك تخلينه برة بالشارع
انتي اذا ما فراشه ينفرش كدام عينج ويتغطه وينام تظلين مثل الذيب تك عين مفتحة ما مطمنه

اي مو محتاجين شغله احنه يصرف عليه

يمة مو قصة يصرف عليج بس خلي يتعرف على الناس وانواعها
خل يفهم الدنيا
شراح يتعلم وانتي حابسته يمج

ماريدة يلتقي بالناس
شيتعلم منهم غير طيحان الحظ

يوووووووووو يمة ترة انتي هواي مصعبه الحياة
ترة مابقه شي واكف  على حاله كله مشت
بس انتي بقيتي واكفه بمكانج والسوداويه الي بداخلج ترة لازم تغيرين نظرة التشائم الي انتي بيهة

هااااا يعني ماكو ارهاب
يعني ماكو قتل
ماكو تفجيرات
ماكو خطف

لا يمة اكو ماكول ماكو بس مو معناها نكعد بالبيت ونتجتف وننتضر الموت يجينه
ترة الحياة ماشيه طبيعي والشوارع كله سيارات
طلعي وشوفي شلون متروسه بشر
اني ماكول الي سواه حسين صحيح وتاخرة الوقت متأخر
لكن يمة ترة انتي السبب هالكد ما ضاغطة علي ترة حيتمرد عليج
وترة ماكو بشر يموت قبل يومه كلنه نموت حسب ما مقدرلنه رب العالمين من ساعه ويوم

اي انتن بهذا كلامجن تشجعنه اكثر

يبووووو ماكو فائدة ويه امي الي بداخلها ما يتغير ابد واكفة عند نقطه معينه
وبعد ما تقدمت
واكفه بيوم الي طلع المرحوم وبعد ما رجع
وما تقدمت ابد ونظرتها سوداويه
وكلة هذا ظهر عليها بعد ما ابوية توفه
متملكها شي اسمة خوف
خاف يقتلو
خاف يخطفو
خاف يفجرو