ظليت كاعدة عالصينيه وصافنة
امد ايدي عالأكل وخلي بحلكي
ورجلي او ولدي صافنين علية
بتي كالت يمة
مترحين البيبي مو كالت خاله بالمستشفى
باوعت عليها وجني ما شايفتها جن اني بالدنيا وحدي
بس اني وامي
اتخايل من جانت تلزمني من ايدي وتخلي هديل على جتافها من نطلع للسوك
والعلاكة بايدها الثانيه شايلتها
وهديل زغيرة حاظنتها من راسها لا توكع من جتفها
كبرت شويه وصارت صديقتي مو بس امي
نطلع للزيارات سوة
ما خلينه امام الما زرناه اني وياها
مرة عطلت السيارة بالطريق وتاخر الوقت وبقينه بالسيارة كاعدين ننتضر يصلحها
ودنيا ليل صارت
بس ابد ما خفت مطمنه امي ويايه
نروح نشتري ملابس سوة
تاخذني وياها للسوق العربي نشتري درازن دشاديش يا دوب تكفي النه اني وخواتي
نروح للاسواق المركزيه اني وياها ونجيب اقمشة تخيط منهن دشاديش الهة
لو ملابس ولادي الاخوتي
ونرجع بالامانه الحمرة ام الطابقين
ننزل يم بيتنا الجبير الزاهي بحديقته يتلكنه خواتي
يفرتشن بالغراض
وطلع الملابس الرجالي لو الولادي
وعبدالله دومه معترض ميريد من السوق المركزي ميعجبه
وترجع تطي فلوس يروح يشتري من السوك هوة وجماعته
ازوجت اني اكبر خواتي
نضرة امي اليه بيوم عرسي
نضرة صديقه راح تروح من عدها صديقتها وتبتعد
حزن الي بكلبها جبيرعلى فراكي
بيوم ولادتي باول طفل الي
كتلهم ماروح مستشفى اذا مو امي تجي ويايه
اجتي تركض ملهوفه تتعثر بمشيتها
اول ما دخلت وشفتها بس كالت هاا يمة منى
واني بچيت
بچيت من الالم لان اريد اولد واني بجر ماعرف شنو بيها الولادة
وماكدرت اطلع تعبير عن المي غير بالدموع بس مانزلن بس من شفت امي
امي بالمستشفى مدعومة والضربه ب الظهر والسايق الدعمها مهزوم
رجلي ظل يباوعلي وشافني فاصله عن الدنيا بس ايدي بالاكل اكل وبلع الكمه وكثر ما فاصله اغص بيها وماحس من تنزل
منى
منى احاجيج
ترحين الاهلج هسة
باوعت الة
كلي
اوديج الامج ترحين
كتله ليل
كلي ميخالف باعي روحج شلون صرتي
همة بالمستشفى لو بالبيت اتاكد ونروح شتكولين
هزيت راسي
اني السبعه وكلها تعرفني بالمواقف شلون اتصرف
بس يم امي وصير اني الضعيفه الي تريد من امها تدليها
اسمعه خابر وحدة من خواتي وحتى ماعرفت منو هية
وكال زين زين احنه جايين
كومي منى لبسي خل انروح امج مطلعيها بالبيت
عدها عمليه بس بعد يومين ومطلعيها على مسؤليتهم
لبست وطلعنه بليل اني ورجلي اكرم
والطريق كله صافنه من الجامة
اتخايل ابويه من يصيح عليها جبريه چاااي
لو عبدالله من يكعد عالصينيه مال الدولمة ويحجي على خواتي رهف واخلاص
يكلهم لتاكلون الدولمة فارغ اكلوها بالخبز وهنة يحبنها بدون خبز
امي تخبز الخبز الطيب
تدخل من ورا البيت وجهة احمر من حرارة التنور
أنت تقرأ
الجنة ليست لها
Любовные романыالجنه تحت اقدام الامهات وضعها الله سبحانه جزاء للتي تستحقها فهل يا ترى ستكونين ممن يستحقونها فأن كان لكي فيها نصيب فنصيبي منكِ سيطردكِ منها قريباً بقلم قمر الزمان 💋💋
