أيـسَرّ والدُنيـا
لـ الكاتبة زهراء بسام
ببين ما اني اتمشى بشارع المتنبي واباوع ع بسطية الكتب اللي مقابيلي ومُعجبة بجمال كل هالكُتب والكُتاب اللي اول مرة اسمع بيهم غير اللي جاي اقرا لكتبهم ، صادفني طفل صغير يجي بعمر ال7 سنوات تقريبا او 8 بالأكثر ، درت وجهي علي جان ابتسم بوجهي ابتسامة لطيفة كُلش لدرجة خلتني اقرب من يمة ولزمت خدودهُ الحلوين مثل عيونه اللي كلها برائه و طفولة ونقاوه
بادلته بالأبتسامة و عيوني بقوا يتفقدون ملابس،شكل هذا الطفل و وضعهُ
الصراحة اول مرة يصادفني هيج منظر مو لأن ماشايفه فقراء لا لكن مو بهالمنظر ، ع العموم نزلت علي وبوسته وابتسمت اله و كلتله شنو اسمك يا حلو ؟
كلي ايـسر بس اني ايمن فضحكت بوقتها كتله هسه انتَ ايمن لو ايسر؟ كلي لا لا ايسر بس ايمن اني مو ايسر رجعت ضحكت اله ..
كتله شبيك يا امي؟ ف سرعان ما حجيتها هو انتبه ،اندهش بالكلمة اللي حجيتها حتى غرغرت الدموع بعيونهُ وشفايفه صارو يرجفون بـ قوة حتى نزلوا دموعه ع وجناته وكلي امي امي امي ...
كررها 3 مرات واني بس صافنه ع منظر ايسر مدري ايمن حتى مافهمت شنو اسمة وشنو يقصد بالجملة اللي انطانياها ..
ف رجعت كتله شنو اللي خلاك تبجي ؟ اذيتك بشي اني؟
مسح دموعه بكل قوة، باوع عليه وضحك ودموعهُ تنزل ويمسحهن بنفس الوقت النوب من گد ما اتأثرت بالموضوع اني بچيت وياه ...
مد الي ايده وحاول شوية يمسح دموعي بـ ايدينه الصغار اللي يخبلن ..
ضحكت اله وكتله مجاي ابچي حبيبي بس عيوني دخل بيهم تراب .. باوعلي نظرة استهزاء( بمعنى اصلا ماكو تراب )
گتلة هسة بالبيت شنو ينادوك، ايسر لو ايمن ؟
اخذ اله صفنه تقريبا 3دقايق متتالية وباوعلي كلي ايسر بس ولله مو ايسر اني ايمن
ضحكت وياه وكتله تمام حَبيبي وسكتت اريد اگوم واكمل طريقي ..
چان وگفني صوته كلي تعالي اشتري من عندي (بنظرات كلها براءة و ترجي )
گتلة شنو اشتري ؟ كلي اني ابيع علچ وابيع كلنس ومرات مرات امسح احذية .. بس مو دوم امسحهن ولله حسب اللي يريد وحسب السوك اذا بعت اللي عندي من الكلنس والعلج وبعدين اضم الفلوس بجيبي ومن ارجع للبيت اشتري لأختي الصغيرونة حلوة اسمها دُنيا بس هي صدُك دُنيا وكلش حلوة اني مخلي صورة الها بجيبي من جانت طفلة اوكفي اراويج الصورة...
طلع الي الصورة من جيبهُ وراواني ويضحك كلش حيل ومبتسم باوعتلها بنية تخبل وعيونها لون عسلي وعندها غمازات فد تجنن كلش عبالك حورية ،قمر ،مادري يمكن اول مرة اشوف جمال طفل هيج لان ما اميل للاطفال ولا اتقرب الهم اني ..
المهم كلتله شعجب مخلي صورتها بجيبك؟ كال هي الوحيدة اللي تخليني قوي واني صرت قوي بسببها ف كلما اضعف شوية اطلع صورتها واباوع عليها هي الوحيدة اللي صارت الي سند .
بيني لبين نفسي كلت الله يرحم اهله .. وانقهرت علي كلش لدرجة صرت ما اعرف شنو اسوي اله ..
ضليت اباوع بعيونه وهو منطلق يحجي و يحجي ويضحك مرة واللخ يبجي .. بس ابد ما جاب طاري اهله ولا ذكرهم لا بخير ولا بـ شر
گـتلة اريد اشتري هذول كلهم عادي ؟ كلي يلا راح انزل الج من سعرهن ، كتلة لا اني اريد اشتري منك بسعرهم بدون ماتنزل الي ..
الفرحة اللي شفتها بعيونه يمكن مشايفتها حتى بوقت الفرح مالتي .!! المُهم اشتريت منه و بوسته ورحت كلت اكيد الگاه باجر بنفس الوقت والمكان ...
المهم رحت ع سيارتي شغلتها وانطلقت لـ محل حلويات اشتريت هواية من عندة ، رحت محل اللعاب اشتريت اللعاب بنات و اولاد ع گد اعمارهم ، اشتريت ملابس الهم
يالله اني شلون نسيت اسأله هو بيا صف ، والحلوة اخته يا صف ، يلا عود باچر من اروح اله اسأله ، المهم رحت للبيت ونزلت اللي اشتريتهن وياي للغرفة اتقربت من الباب الخارجي فتحتة ودخلت شفت والدي ووالدتي كاعدين يتسامرون.. سلمت عليهم وكعدت يمهم ، سوالفهم تخبل صدقه لله 🖤
وحچيت الهم عن اللي شفته ، لحظه نسيت اعرفكم عَنـي اني أُمنية اسمي ووحيدة لأهلي وصيدلانية كَذلك فاتحة عيادة تجميل وهوايتي قراءة الكتب ، ع العموم شجعوني اهلي كالعادة ع تصرفي هذا ، صعدت لغرفتي رتبت اللي اشتريتهن بصورة حلوة وطلعتهن يخبلن صراحة واكيد راح يفرحون بيهن ، نمت وثاني يوم مارست العمل مالتي بكل حُب وكملت وبنفس الوقت رحت لنفس المكان علمود انطي الاشياء اللي اشتريتهن ...
واني بالطريق اترحمت لأهله ع هيج ابن مثل الورد عندهم بس حرامات الدنيا ظالمتهُ ...
نزلت وبقيت الاغراض بالسيارة ورحت اتمشى للمكان اللي اللتقيت بي وياه .
شفت الناس شلون ديباوعون كلمن ع كتاب وهذا اللي محتار يصور وهذا اللي يشرب كوفي ع العموم اني اباوع بالوجوه اريد اللمح ايسر ماعرف ايمن حتى اسمة ماانطانياه عدل ، رحت شفت واحد يجي بعمره تقريبا
يتبع...
