ပြီးပြည့်စုံခြင်း || ဘာသာပြန် [COMPLETED]

[ 2 ]

Unicode

ဈာပနအခမ်းအနားပြီးဆုံးသည်အထိ
ဝမ်ကျားနင်က အသံတစ်စမထွက်တော့။
ပရိသတ်တွေ ပန်းလာချချိန်မှာတောင် သူ ရှေ့တိုးမကြည့်ဘဲ နေရာမှာ မလှုပ်မယှက်ရပ်နေမိခဲ့သည်။

ခင်ပွန်းဖြစ်သူကို မှီရင်း ထွက်သွားသောဝမ်ချွေ့လန်၊ ကုမ္ပဏီ၏ CEO နှင့်အတွင်း
ရေးမှူးတို့ သူ့ဘေးကနေဖြတ်လျှောက်သွားတာကို တွေ့လိုက်သည်။ နောက်ကနေ လိုက်ပါလာတာက သူ့အေးဂျင့်နှင့်လက်ထောက်။ တကယ်တော့ ဝမ်ကျားနင် ဒီကိုမလာခင် ဂရုတစိုက်တွေးတောထားတာရှိသည်။ ဈာပနအခမ်းအနားပြီးလျှင် သူ့လက်ထောက်ဖြစ်သူကို နှစ်ဦးတည်းစကားပြောဖို့ကြိုးစားမည်၊ သူ့သရုပ်မှန်အကြောင်း ဖွင့်ဟမည်။ အဘယ်ကြောင့်ဆိုသော် ဝမ်ကျားနင်၏ personal life နှင့်အလေ့အကျင့်တွေကို အများဆုံးသိထားတာက သူ့လက်ထောက်ဖြစ်တာမို့။ သူ သေချာပေါက် သူ့သရုပ်မှန်ကို အတည်ပြုနိုင်လိမ့်မည်။ နောက်ပြီး သူ၏ အေးဂျင့်နှင့်အမေဖြစ်သူကို သွားရှာရမည်။

သို့သော်လည်း ယခုတော့...

ဝမ်ကျားနင် လုံးဝ လမ်းစပျောက်သွားသလိုခံစားရသည်။ သူက ယခုလိုကောင်လေးပုံစံဖြစ်နေပြီး သူ၏မူလခန္ဓာကိုယ်က မီးသဂြိုဟ်ခံလိုက်ရပြီမို့ ပြန်သွားဖို့မဖြစ်နိုင်တော့။ လက်ရှိ ဤခန္ဓာကိုယ်က သူတို့အတွက် လုံးဝ သူစိမ်းသက်သက်ဖြစ်နေသည်။

ဘယ်လိုပဲပြောပြော သူ့ကို ယုံကြမှာလား?

ယုံတယ်ပဲ ထားဦး၊ သူက ဝမ်ကျားနင်
အနေနဲ့ ဆက်နေနိုင်ပါ့မလား။

သူ့ဗီလာကို ပြန်သွားလို့ရဦးမှာလား။

သူစာချုပ်ချုပ်ထားတဲ့ဇာတ်ကားမှာ
ဆက်ရိုက်ခွင့်ရပြီး ဝမ်ကျားနင်အစစ်က‌
သေရွာကနေ ပြန်လာပါတယ်လို့ တစ်ကမ္ဘာလုံးကို ကြေညာမယ်ပေါ့?

ထို့ပြင် အခုလေးတင်မြင်လိုက်ရသော ဝမ်ချွေ့လန်၏အကြည့်ကို သူ အမှတ်ရသွားသည်။ လူတွေက သူ့ကို အရူးတစ်ယောက်လို၊ ဒါမှမဟုတ် ငွေမက်တဲ့လူလိမ်တစ်ယောက်လိုပဲ ထင်သွားကြမှာ၊ ဟုတ်တယ်ဟုတ်?

သူ့ဘဝကြီးတစ်ခုလုံးက ပုံပျက်ရွဲ့စောင်းသွားနှင့်ပြီ။

ဘယ်အချိန်က မိုးစရွာသလဲဆိုတာကို သူ
မသိလိုက်။ ပရိသတ်များပင် သုသာန်ကနေ တဖြည်းဖြည်းထွက်ခွာနေပြီဖြစ်သည်။
ဝမ်ကျားနင် တစ်ကိုယ်တည်း ထီးထီးရပ်ကျန်ခဲ့ရာ လုံခြုံရေးဝန်ထမ်းများက ခပ်စိမ်းစိမ်းကြည့်စပြုလာပြီး သူ့ကို အသံတိတ် နှင်လွှတ်နေသယောင်။