ပြီးပြည့်စုံခြင်း || ဘာသာပြန် [COMPLETED]

[ 5 ]

Unicode

နှစ်ရက်အကြာမှာ ဝမ်ကျားနင် ဒါရိုက်တာချန်ဆီကနေ ဖုန်းလက်ခံရရှိသည်။ တစ်ပတ်အကြာမှာပြုလုပ်မည့်တီဗီပရိုဂရမ်တွင် ပါဝင်ခွင့်ရကြောင်း အသိပေးခြင်းပင်။

ဝမ်ကျားနင် တည်တည်ငြိမ်ငြိမ်ပြန်ဖြေလိုက်၏ :

"ကောင်းပါပြီ"

ဖုန်းချလိုက်ချိန်မှာ ဝမ်ကျားနင် ဒီဂိမ်းကို အလေးအနက်ရင်ဆိုင်ဖို့ စိတ်ပိုင်းဖြတ်လိုက်ပြီ။ လူရွေးပွဲဆိုတာထက် ကစားပွဲတစ်ခုလိုပဲ သူ ယူဆချင်သည်။ သူက တခြားလူတွေကို ကြွားဝါချင်တာမဟုတ်ဘဲ သူ့အနာဂတ်လမ်းကို သူကိုယ်တိုင် ထွင်လိုခြင်းဖြစ်သည်။

ဆုံးဖြတ်ချက်ချပြီးတော့ ဝမ်ကျားနင် ခေါ့ရှင်ဟန်တို့မိသားစု၏အချက်အလက်များကို စတင်ရှာဖွေလိုက်သည်။ ခေါ့ရှင်ဟန်၏မွေးရာပါချို့ယွင်းချက်ကို တခြားသူများသိလို့မရပေ။ ‌သူ TV ထဲပါလာမှာကို သူ့မိဘတွေအား မမြင်စေချင်။

သို့သော်လည်း ခေါ့ရှင်ဟန်၏လက်ရှိအနေအထားမှာ မိဘများကို ဆက်သွယ်ဖို့ဖုန်းနံပါတ်ရော၊ ယုတ်စွအဆုံး အစ်ကိုဖြစ်သူကို ဆက်သွယ်ဖို့တောင် ဖုန်းနံပါတ်မသိ။

ခေါ့ရှင်ဟန်၏ဦးလေးဖုန်းနံပါတ်ကို ဝမ်ကျားနင် ရှာတွေ့တာမို့ ဆက်ကြည့်ပြီး မေးမြန်းလိုက်သည်။ ထိုအခါမှ သူ့မိဘတွေ ကွယ်လွန်သွားနှင့်ပြီဖြစ်ကြောင်း၊ အစ်ကိုဖြစ်သူနှင့်လည်း ဆက်ဆံရေးအဆင်မပြေကြောင်း သိလိုက်ရ၏။ ယခု ခေါ့ရှင်ဟန်တို့ညီအစ်ကိုက အဆက်အသွယ်မရှိပေ။

တကယ်တော့ ဒါလည်း တစ်မျိုးကောင်းတာပဲ။ ထိုသို့မဟုတ်လျှင် ဝမ်ကျားနင်က ခေါ့ရှင်ဟန်၏မိသားစုနှင့် ဘယ်လိုဆက်သွယ်ပြောဆိုရမလဲ လုံးဝသိမှာမဟုတ်။
ခေါ့ရှင်ဟန်၏အစ်ကို ဆိုးသည်ဆိုသောအချက်ကတော့ ဝမ်ကျားနင်ကို နည်းနည်းစိတ်မသက်မသာဖြစ်စေပြီ။

ည‌ပိုင်းတွင် ဝမ်ကျားနင်က အင်တာဗျူးအောင်သည့်အကြောင်း စူးရှန်ကို ပြောပြလိုက်သည်။

စူးရှန်က အံ့အားသင့်သွားပြီး

"ဟမ်? သူ တကယ်ကြီး မင်းကို သဘောကျတယ်လား"