ငါ့ယောကျာ်းကမာဖီးယားဘော့စ်[Myanmar Translation-Book 2]

Part 19-သူ့ကိုပြန်ခံစားရအောင်လုပ်မယ်!။

Unicode

နေ့လည် ၁၁နာရီ၁၅မိနစ် အချိန်မှာ ဂျက်လေယာဉ်တစ်စီးက အပြည်ပြည်ဆိုင်ရာလေဆိပ်မှာ ဆင်းသက်ခဲ့ပြီး အပေါက်ဝကထွက်လာတာက မိုဟန်လု။အချိန်မဖြုန်းဘဲ မဲနက်တောက်ပြောက်နေတဲ့ SUVကားကြီးပေါ်တက်ကာ လူတွေသတိမထားမိခင် လေဆိပ်ကနေထွက်ခွါလာခဲ့တယ်။

လေယာဉ်ဆိုက်ကတည်းက ဟန်လု အီရန်ရဲ့နံပါတ်ကို မဆက်မပြတ်ခေါ်ဆိုနေခဲ့ပေမဲ့ ဖုန်းကော်လ်ကမဝင်တော့ စိတ်ပူလာပြီ။ပေါင်ကိုလက်နဲ့ပုတ်ကာ စိတ်မရှည်ဖြစ်ပြီး အိုမီဂါရဲ့အလုပ်ခွင်ဆီသို့ ကားဒရိုင်ဘာကို မကြာခဏဆိုသလို အမြန်မောင်းခိုင်းနေတယ်။

ရောက်သွားတဲ့အချိန်ထိ မိုဟန်လုက ဖုန်းခေါ်ခြင်းကိုကြိုးစားနေဆဲ။မိနစ်အနည်းငယ်လောက် ကားထဲထိုင်ပြီး အဆောက်အဦးကိုကြည့်ကာ အီရန်အပြင်ထွက်တာနဲ့များ တိုးမလားစောင့်နေတယ်။နေ့လည်စားစောစောစားမလား..ဒါမှမဟုတ် ရိုးရိုး၁၅မိနစ်နားချိန်များယူမလားဆိုပြီးတော့။ဒါပေမဲ့ တကယ်တမ်းတော့ အချည်းအနီးသာ။ဘယ်အီရန်အန်ဒရူးမှ အထဲကထွက်မလာခဲ့ဘူး။

ဟန်လုက သက်ပြင်းရှည်တစ်ချက်ချလိုက်ပြီး ကားထဲကထွက်ဖို့ဆုံးဖြတ်လိုက်တယ်။ခပ်မြန်မြန် ဆံပင်ကိုသပ်တင်ကာ ဝတ်စုံကိုပုံကျအောင်လုပ်ပြီးမှ ကားထဲကဆင်းလာတယ်။အိုမီဂါရဲ့အလုပ်နဲ့ဆက်စပ်တဲ့ ခိုင်လုံတဲ့အကြောင်းပြချက်တစ်ခုခုမရှိရင် သူ အီရန်ရဲ့အလုပ်ခွင်ကို တော်ရုံမသွားဘူး။ဘာလို့လဲဆိုတော့ အီရန်က သူ့ကိုမလာဖို့တားမြစ်ထားတယ်။

အယ်လ်ဖာရဲ့အိမ်မွေးတိရစ္ဆာန်တစ်ကောင်အဖြစ် သတ်မှတ်ခံရမှာစိုးတဲ့အတွက် သူက မိုဟန်လုလိုလူမျိုးနဲ့ ကာမဆက်ဆံရေးတစ်ခုရှိတာကို လူတွေမသိစေချင်ဘူး။အလုပ်မှာလည်း အဲ့ဒီအကြောင်းကြောင့် ပြဿနာပေါ်လာမှာမလိုလားဘူး။အလုပ်ကြိုးစားလို့မဟုတ်ဘဲ အယ်လ်ဖာနဲ့အိပ်ခဲ့တာကြောင့် အလုပ်မှာဒီလိုရာထူးရခဲ့တာလို့ လူတွေထင်မှာ..လူတွေပြောမှာမျိုး မဖြစ်ချင်ဘူး။

မျက်နှာသေနဲ့ အဆောက်အဦးဆီလျှောက်သွားတော့ ရဲဝန်ထမ်းတွေရဲ့အာရုံစိုက်မှုကို ချက်ချင်းခံလိုက်ရတယ်။အဲ့ဒီ့လူတွေထဲက တစ်ယောက်က အယ်လ်ဖာရောက်နေကြောင်း ရဲမှူးကိုမြန်မြန်သွား သတင်းပို့တော့ ရဲမှူးကထွက်လာပြီးတော့ အယ်လ်ဖာကိုကြိုဆိုတယ်။