အဓိကဇာတ်ကောင်Shouအဖြစ်မှ ကြမ်းရမ်းတဲ့Gongဘဝသို့ : Myanmar Translation (Unicode)

Part - {33}

အရိုးသားဆုံးပြောရရင် ကျွန်တော် ဒီလိုမျိုးတွေလည်း တွေးခဲ့ဖူးပါတယ်။ ကျွန်တော် ဒီကမ္ဘာကနေ ထွက်ပြေးချင်တယ်။ မူရင်းဇာတ်ကြောင်းပဲဖြစ်ဖြစ်၊ ဟေးလ်ဗာဒီပဲဖြစ်ဖြစ် မရှိတဲ့ ကျွန်တော်နေထိုင်ခဲ့တဲ့ ကမ္ဘာကို ပြန်သွားချင်တယ်။ ကျွန်တော့်ဘေးမှာ ရှိခဲ့တဲ့အရာတွေက တစ်ခဏတွင်း ပြောင်းလဲသွားကြတာကို မယုံနိုင်ခဲ့ဘူး။ ဒါတွေက ဟေးလ်ဗာဒီအဖြစ် ကူးပြောင်းလာခါစတုန်းကတော့ မှန်ပါတယ်။ ကျွန်တော်အခန်းထဲမှာ တစ်ယောက်ထဲ သော့ပိတ်ပြီး တိတ်တိတ်လေး ငိုခဲ့ရတဲ့ရက်တွေက ရေမှမရေနိုင်တာ။

အခုတော့ ကာမန်ဆိုတဲ့ သူငယ်ချင်း ရှိနေပြီ၊ အီဗန်လည်း ရှိနေပြီ၊ ပြီးတော့ အတိုင်းအတာ တစ်ခုအထိ ဟေးလ်ဗာဒီရဲ့ဘဝနဲ့ အသားကျနေပြီမို့ ကျွန်တော် ပြုမူနေကြအတိုင်း မပြုမူဖြစ်တော့ဘူး။ ဒါပေမဲ့လည်း ကျွန်တော်မေ့ပျောက်နေတဲ့ အတိတ်က မှတ်ဉာဏ်တွေက ဘယ်တော့မှ ပျောက်ကွယ်မသွားဘူးဆိုတာကို မတွေးခဲ့မိဘူး။ ကျွန်တော့်ရဲ့ စိတ်နှလုံးတစ်နေရာမှာ လေးလံတဲ့ကျောက်တုံးကြီးလို တည်ရှိနေတဲ့ နောင်တဆီကနေတော့ ဘယ်လိုမှ လွတ်မြောက်နိုင်မှာ မဟုတ်ဘူး။ အဲ့တာကြောင့် ကျွန်တော့်ရင်ထဲမှာ မွန်းကြပ်စေတဲ့အရာတစ်ခု အမြဲရှိနေခဲ့တာ။

ဒါပေမဲ့အခုတော့ အဲ့ဒီ့မွန်းကြပ်မှုတွေ မရှိတော့ဘူး။

ပထမဆုံးအကြိမ်အဖြစ် မတူကွဲပြားမှုတွေ ပြည့်နေတဲ့ကမ္ဘာကြီးက ကျွန်တော့်ကမ္ဘာလို ခံစားရတယ်။ အီဗန်ရဲ့ နှုတ်ခမ်းထိခဲ့တဲ့နေရာကို ငေးငိုင်ရင်း ပွတ်တိုက်မိနေတယ်။ အီဗန်က ကမ္ဘာပေါ်မှာ အလှဆုံးသော အပြုံးကို ပိုင်ဆိုင်ထားတယ်။ မဟုတ်သေးဘူး၊ အီဗန်ကိုက ကမ္ဘာပေါ်မှာ အလှဆုံးပဲ။

ကျွန်တော် ဟေးလ်ဗာဒီရဲ့ ကိုယ်ထဲ ကူးပြောင်းလာပြီးကတည်းက ကျွန်တော့်ရဲ့အိပ်မက်က အီဗန်ကို မူရင်းဝတ္ထုရဲ့ ထူးဆန်းတဲ့ ဇာတ်ကြောင်းဆီကနေ လွတ်မြောက်စေချင်တာပဲ။ မူရင်းဇာတ်ကြောင်းကြီး ပြီးသွားတဲ့အခါကျရင်တော့ ကျွန်တော် အီဗန်ဆီ ဖွင့်ပြောမယ် လုပ်ထားတာ။ ဒါက ဒီအတိုင်း အိပ်မက်သက်သက်ပါပဲ။ ဒါပေမဲ့ အခုလေးတင် အိပ်မက်အသစ်တစ်ခု ဖြစ်တည်လာပြီ။