𝐓𝐡𝐚𝐭 𝐒𝐡𝐨𝐮𝐥𝐝 𝐁𝐞 𝐌𝐞 [ One Shot ]

TSBM (Unicode)

'That Should Be Me'

နှလုံးသားကို ဆော့ချင်လား..?
ဘဝကြီးကို ခြယ်လှယ်မလား..?

ပန်းနုရောင် စတော်ဘယ်ရီရေခဲမုန့်တွေက တစ်ယောက်သောသူရဲ့ နှုတ်ခမ်းဖျားပေါ်မှာ ကပ်တွယ်လို့ ပေကျံနေတယ်။ စိုရဲထွေးအိနေတဲ့ လျှာဖျားကလေးက နှုတ်ခမ်းလုံးပေါ်ရှိ creamတွေကို သပ်ယူလှုပ်ရှားနေပြန်တယ်။

သေးသွယ်တဲ့ မျက်ဝန်းကလေးက အံ့သြသွားဟန် ဝိုင်းစက်ပြီးမှ ယစ်မူးဟန်နဲ့ စင်းကျသွားတယ်။

ဒီအထာတွေဘဲ.. !
ဒီအပြုအမူတွေနဲ့ပဲ သူ့နှလုံးသားကို ဖမ်းချုပ်ထားလိုက်ပုံများမှာကတော့ ဟိုး..အရင့်.. အရင်တွေကတည်းက ဖြစ်တယ်။

"စားလို့ကောင်းတယ် "
"မင်းကြိုက်တဲ့ဆိုင်ကပဲလေ "

ချိုသာသာစကားရဲ့ အပြန်မှာ သူ့ရှေ့က ထိုသူဟာ ပြုံးရိပ်ကလေးတွေ သမ်းတော့မလိုလို..။

"လျှိုကျဲကျဲကို လက်ထပ်မှာလား.."

မျက်လွှာချလိုက်တဲ့ မျက်လုံးလေးမှာက မကြည်ဖြူမှုတွေ အထင်းသား။ ဆူထွက်လာတဲ့ နှုတ်ခမ်းထော်လေးမှာတော့ အလိုမကျခြင်းတွေ အများသား။

မထင်ထားမိဘူး..။
သူ့ထက် (၆)နှစ်ငယ်တဲ့ ကောင်ဆိုးလေးဆီမှာမှ သူ့ရဲ့စိတ်နဲ့ခန္ဓာကို မြှုပ်နှံမိလိမ့်မယ်လို့လေ။

"လက်ထပ်စရာလားကွာ..
ကိုယ်မှသူ့ကို မချစ်ဘဲ.. "

ဆူထော်ခဲ့တဲ့ နှုတ်ခမ်းကြွက်သားတွေက ပြေလျော့သွားပြီးနောက်မှာ ခေါင်းလုံးလေးက တဆတ်ဆတ်ညိမ့်တယ်။

ထိုသူဟာ သူ့ဆီကို စကားမဆိုတော့ပြန်..။

"ကိုယ်ချစ်တာက"
"ကျန့်ကော!! "

လျင်လျင်မြန်မြန် ထရပ်လိုက်တဲ့ ကောင်လေးက သူ့အနားကိုရောက်လာပြီး သူ့ရင်ခွင်ထဲကို တိုးဝင်ဖို့ ကြိုးစားနေတော့ ကောင်လေးစိတ်တိုင်းကျအောင် သူ့မှာရင်ခွင်ဖွင့်လို့ ကြိုလိုက်ပါသေးတယ်။ ဒီရင်ခွင်ဟာ ကောင်လေးရဲ့ အပိုင်ဖြစ်နေပြီးသားကိုး။

"ကျွန်တော့်ကို ခွံ့ကျွေးနော်.. ဟီး.."

မျက်နှာချိုသွေးနေတဲ့ကောင်လေးကို ရင်ခွင်ထဲမှာ တင်းနေအောင် ဖက်ထားလိုက်မိတယ်။ ခေါင်းစဥ်မရှိတဲ့ ဆက်ဆံရေးကြိုးစလေးကို ကောင်လေးကသာ ဖြတ်တောက်လိုက်ရင်တော့ဖြင့် သူ့မှာ ရူးသွားနိုင်လေတယ်။ ရူးသွားခဲ့ရင်တောင် ကောင်ငယ်လေးကို ဂရုမစိုက်နိုင်တော့မှာကိုပဲ စိုးရိမ်ရပါတယ်။