خربشة قصة

القصة 59

#خربشة_قصة

_ جاي الليلة بمفاجئة ليك يا لُدن

عاينت ليه وللهفتو ، غمضت عيني وتاني فتحتها ، لهفتو وفرحو الفي وشو أجبرني ابتسم ليه

_ ما عايزة تسأليني شنو هي المفاجئة ؟!

سألني بلهفتو الم قّلت  ، عاينت لعينو ودمعت

_ لو قل عدد غسيل الكلية يمكن أفرح

لاحظت لبسمتو البدت تزبل بس رجعا قصبا عنو عشان ما يحسسني بشيء ، مسك يدي وقال

_ يا لُدن قلنا شنو أنحنا ، رجعتي تاني لليأس ؟ وأنا معاكِ

_ ما هو عشان إنت معاي أنا صامدة كدا ...

شهقت شوية وقلت بصوت مقطع من البكى

_ يا مهاب ما تم لعرسنا إسبوع حتى وأنت جاري معاي للغسيل ، شهر عسل ما إستمتعت بيه زي اي راجل و....

_ لُدن  !

قال إسمي بشوية إنفعال ، ذقنو بترتعش ،  ظاهر عليه بحاول يمنع دموعو  ،واصل يعاتبني

_ ليه بتعيدي في الموضوع وتزيدي ، أنا دايرك كدا

_ بحالتي المتأخرة دي  ... شوف بقيت ك...

_ بقيت أحلى في نظري والله ، إيمانك وسعيك ترضيني رغم تعبك ببقى ما بستحقك لو ما قدرت دا

مسكتو علي وحضنتو بكل ما لي من قوة ضعيفة أنهكت جسمي المتأثر بالغسيل ، لولا مهاب ما ح أصمد زي ما أنا كدا متأكدة

حسيت بيه مسح وشو وبعدني يعاين لي مبتسم

_ عايزة تبقي المرة النكدية خلاص ، بوظتي فرحة المفاجئة

_ صدقني يا مهاب إنت أحسن حاجة حصلت لي وأفضل مفاجئة

باس باطن يدي كم مرة وبعدو قال بفرحة بكي وضحك في نفس اللحظة

_ حتتزرع ليك كلية ، حتعملي العملية لقينا المتبرع

لسا كنت مصدومة في إنفعالو الخلاني أسعد زولة في الدنيا

_ ب ...ب بجد

حضني شديد حتي صوتو ما طلع من فرحتو   ، يا رب خليه لي.
.......

في المستشفي عاينت لنفسي شاحبة لوني بهت جدا ، ضعفت لدرجة بعيدة ، حتي شعري إتكسر

_ سرحانة وين ؟ ما تخافي العملية بسيطة ما عايزك تخافي ولا اي شيء

_ ربي وإنت معاي ما خايفة ، بس خايفة ما أرجع لشكلي الزمان وإنت تمل م...

_ عارفة متين ما بحبك ؟!

_ متين ؟!

_ لمن تبقي ما لُدن ، ما مرتي واحدة تانية  ، لو مهما كنتِ أنا دايرك لاخر نفس في عمري ، فعشان كدا إتجهزي للعملية .

لمن صحيت من العملية النجحت الحمد لله وسمحوا بالزيارة ،  كنت قايلة إني ح أشوفو أول واحد ، أيوا أمي وأهلي حوليني بس وين ضهري وحبيبي وزوجي

_ أمي وين ماهر ؟ نادوه لي

مسحت دمعتا وقالت ببسمة

_ جاي يا لُدن هسي إرتاحي إنتِ

في كل لحظة بعاين الباب بس ما ظهر ، خفت يكون زهج مني وتعب من ممارضتي ، وأنا في عز تفكيري  شفت منظر إتصدمت منو

جايبنو علي في كرسي متحرك   ، زابل ، تعبان ...من تعبي ما قدرت أعمل اي حركة ، هو كان المتبرع ، عشان كدا رفض يوريني منو الداير يتبرع لي 

_ ما ... ما تقول لي إنت..الإتبرعت يا مهاب

إبتسم وعاين لي

_ عندي كليتين ممكن أعيش بواحدة  بس قلبي واحد ما بقدر أخسرو.