خربشة قصة

القصة 60

#خربشةالليلة وصلت ، تعليقاتكم تهمني ... يلا نشوف رأيكم

#خربشة_قصة

" مشتاق ليكِ لدرجة ما إتخيلت في يوم أصل ليها ... "

قريت رسالتو وحاولت ما أبكي ، وكعادتي للاسبوعين الفاتو أحفظ الرسالة البتجيني في وقت محدد في اليوم ، وبعد أخلص منها أرجع وأقرا الرسائل حقت اليومين الفاتو ، بس ما برد ليه

" ما كفاية عذاب فيني "

ختيت يدي علي خمشي يمكن أمنع الآه العايزة تطلع مني لمن قريت الرسالة الوصلتني منو تاني  .

ختيت تلفوني وإتكورت في نفسي ، سمعت امي من بعيد تتكلم بس أنا في قلبي الخفق ألف خفقة في الثانية من شوقي ليه ، فتحت صورتو وبعاين ليها ولا شعوريا إتمردت دمعة من عيني

_ بدل تموتي نفسك وتموتي الراجل معاك أرجعي البيت بلاش عوارة .

بلعت ريقي وغمضت عيني ، قلبي المجروح منو لسا بفتش فيه ، بس عقلي رافض مجرد إسمو

_ أنا فترت منها  يا محمد إتكلم معاها يمكن توقف البتعمل فيه دا .

سمعتها بتتكلم مع أخوي ، مجرد ما دخل غرفتي جات جسمي شوية قشعريرة ، كيف لا وأخوي بذكرني بيه ، بصحابو البقي زوجي وروحي .

_ أها يا قرد السمان

_ بشتكيك لمعتدل ع....

إنتبهت لفلت لساني ، متعودة يناديني اخوي بقرد السمان ومعتدل دايما بالمرصاد ليه
" إلا ومرتي "  الجملة دي بتخليني أسعد انسان في العالم بس هسي وين .

بسمة اخوي محمد ما زحت من وشو ، زفر وقال

_ رفيف لو بتكابري فدا في الفاضي

مسحت دمعة نزلت مني

_ طيب والعملو هين ولا قليل ، أنا يجي يا محمد يشك فيني ويقول بدخل رجال غراب وهو ما موجود وما معاي زول للبيت ؟!

_ لو ما عارفك دايراه كان قلت بتختلقي حجج والسلام عشان تزعلي منو ، وانتِ عارفة بسبب الشيطانة جارتك وافتراءها ، تجي تلوميه

_ طيب ما يفكر ولا حبة بس من يسمع كلامها يجي يصرخ فيني

_ أولا ردة فعلو بحترمها لانو سألك وما إتهمك زي ما بتقولي ، والانفعال طبيعي جدا في موقف زي دا وبالذات لراجل بحب مرتو زيو وغيور .

نهاية كلمتو دي خجلت منو الصراحة وقفلت أديتو ضهري   ، فضحك ومشى خلاني

سامعاه هو وأمي بتكلمو بس تفكيري مشى لليوم داك لمن جارتي كذبت عليه وقالت إني دخلت راجل البيت ، وطبعا بطريقة غير مباشرة  .

غمضت عيني وزفرت تاني فتحت رسايلو بعاين ليها وبعدو لصورتو بتفرس تعابيرو البجد إشتقت ليها فهمست