خربشة قصة

القصة 69

#أقول شنو بس ، ربنا يهديني وأوقف  😂😂

#خربشة_قصة

_ ولو إحتجتي أي شيء يا قمر أنا موجود و...

قال قمر !  اسمي ... صوت ضربات قلبي حجب عني سماع باقي كلامو .

.....

_ أنا ما فاهمة حاجة

شكيت لاختي الكبيرة ، عاينت للمادة وتاني عاينت لي

_ الله ! الشيت دا بشوفك كل يوم شايلاه فاتحاه ومركزة فيه تقولي لي ما فاهمة هسي .

ما بتعرف اني لمن بفتح الشيت ما بشوف كلمات بشوف صاحب المادة ، وقفتو ، ولا هيبة شكلو وطباعو ، أقول شنو في بسمتو  غيتو أنا بضيع حرفيا فيها .

_ قمر ... يا بت هوي بسم الله مالك سرحتي وين

_ احم ... ولا شيء ، اها كنتِ بتقولي شنو

_ اووف منك ، يا بت عرس صحبتي يلا عشان نمشي

_ نعم !! ... لا لا أنا غيرت رأي ما عايزة أمشي معاك يا زولة عندي جامعة

_ كيف يعني ، أنا ما صدقت ناس أمي وافقوا أقعد كم يوم ،   دا حالتي  أنا الوزيرة ، يا قمر  بطلي هبالة ويلا جهزي شنطتك عشان تمشي

زفرت زعلانة علي محاضرتو الحأضيعا 
ناس بيتنا رفضوا اختي تمشي تبيت في عرس صحبتا  الا وانا معاها فمضطرة أمشي وأفوت علي يوم كامل ما أشوفو

يوم الحنة ولاني ما بحب الجوطة والتجمع  شلت شيت استاذ إلياس ومعاي كرسي  بعيد شوية بس شايفة الناس وشايفني

_ للدرجة دي مادتي صعبة

إنتفضت لمن وقعت من الكرسي ، أنا بتخيل ولا تهيئ من كترة تفكيري فيه ؟!
ولا يكون طلع من عقلي لاني هسي كنت بتخيلو في الشيت؟!!

عاينت لضحكتو  ونزلت عيني محرجة ، اتمنيت الارض تبلعني هسي بس أرجع تاني عشان أملى عيني من هيئتو دي .

جاب كرسي وختاه جنبي وانا اصلا اتعدلت وقعدت ماسكا الشيت

_  إنت بتعمل شنو هنا ؟

ضحك وقال

_ المفروض واحد في عرس أختو يعمل شنو ؟

اتصدمت ، بعرف انو صحبة اختي عندها أخوان بس ابدا ما حاولت أعرف منو هم .

_ أيوا  ، والله ما عارفة

_ بس أنا بعرفك بتجي كتير ما أختك هنا وخاصة قبل العرس

_ ما إنتبهت ليك

_ ما قلتي لي ما فاهمة شيء ولا إجتهاد بس

لو يعرف انو لا دا ولا دا ، كنت بشوفو في مادتو ، شهر بس لمن اتعين وبدا يدرسنا كمعيد شقلب بيها راسي وشتت كياني الم موزون

_ في حاجات ما فاهماها فبراجع

_ طيب أنا موجود جيبي طوالي بشرح ليك